1 Pita 1 - Ai Vola Tabu (Vakadewa Makawa Vakavoutaki 2021)

¹ Mai vei au ko Pita, nai apositolo i Jisu Karisito. Kivei ira era tiko vakavulagi ni ra sa dui se ki Ponito, ki Kalatia, ki Kapatosia, ki Esia, kei Picinia,

² era sa digitaki tu me vaka na nona lewa eliu na Kalou ko Tamada, me ra vakasavasavataki e na Yalo Tabu, me ra talairawarawa kina me kureitaki talega kivei ira na dra i Jisu Karisito: Me vakalevutaki vei kemudou na loloma kei na vakacegu.

Nai Nuinui Dei ka Bula

³ Me ia na vakavinavinaka vua na Kalou, na Tama ni noda Turaga ko Jisu Karisito, o koya sa vakatuburi keda tale me noda nai nuinui bulabula me vaka na nona yalololoma levu ni sa tucake tale mai na mate ko Jisu Karisito,

⁴ me da taukena kina nai votavota sa sega ni ca rawa, a sa sega ni dukadukali, a sa sega ni malai mai, sa maroroi mai lomalagi me nomudou,

⁵ oi kemudou sa maroroi e na kaukauwa ni Kalou e na vuku ni vakabauta ki na bula sa vakarau tu me vakarairaitaki e na gauna mai muri.

⁶ Ia sa ka oqo dou sa reki vakalevu kina, ia e na gauna lekaleka oqo, ke sa yaga, dou sa vakararawataki e na dauvere e vuqa,

⁷ me sa kune kina na dina ni nomudou vakabauta—ni sa vakatovolei me talei vakalevu sara ka talei vakalailai na koula, ka dina ga ni sa caca rawarawa, ni sa vakatovolei e na bukawaqa—me ka ni vakavinavinaka ka me dokai ka me vakacaucautaki ni sa rairai mai ko Jisu Karisito.

⁸ O koya dou a sega ni raica, ia dou sa lomana ga. O koya dou sa sega ni kunea edaidai, ia dou sa vakabauta ga, ka reki e na reki e sega ni cavuti rawa ka vinaka sara,

⁹ ni dou sa rawata nai cocovi ni nomudou vakabauta, io, na vakabulai ni yalomudou.

¹⁰ A bula oqo era sa taroga ko ira na parofita ka vakasaqara matua, o ira era sa parofisaitaka na loloma ena nomudou,

¹¹ ni ra sa vakasaqara se gauna cava, se vakaevei na gauna sa vakatakila vei ira na Yalo i Karisito sa tiko e na lomadra, ni sa tukuna mada eliu na rarawa i Karisito kei na ka vinaka sara ena qai muri mai.

¹² A sa vakatakilai vei ira, ni sa sega walega e na vukudra, ia ena vukuda era sa yaco me rai talatala e na veika sa qai tukuna mai vei kemudou ko ira era sa vunautaka vei kemudou nai tukutuku-vinaka, kei na Yalo Tabu sa talai mai lomalagi—na veika oqo ka ra sa gadreva na agilosi me ra dikeva!

Na Kaci ki na Bula Savasava

¹³ O koya oqo mo dou qai vauca na tolo ni lomamudou, dou yalomatua, ka vakanuinui tiko me yaco mada nai vakataotioti, mo dou rawata kina na loloma ena kau mai vei kemudou ni na rairai mai ko Jisu Karisito.

¹⁴ Me vaka na gone e dautalairawarawa, dou kakua ni vakatauvatani kemudou kei na gagadre ca eliu ni dou a lialia,

¹⁵ ia me vaka ni sa yalosavasava ko koya sa kacivi kemudou, dou yalosavasava talega koi kemudou e nai valavala kecega;

¹⁶ ni sa volai, “Dou yalosavasava; ni'u sa yalosavasava koi au.”

¹⁷ Ia kevaka dou sa masu vua, me vaka sa Tamamudou, o koya sa lewai ira yadua me vaka na ka era a cakava, ka sega ni digitaka vakailoa e dua, me sa ia e na rere na nomudou i valavala, e na gauna dou sa vulagi tu kina;

¹⁸ ni dou sa kila dou a sega ni voli e na veika e caca wale, e na siliva se na koula, mai na nomudou i valavala sesewa dou sa rawata mai vei ira na nomudou qase;

¹⁹ e na dra talei ga i Karisito, me vaka na lami sa sega ni ca e dua na tikina;

²⁰ o koya sa lesi eliu sa qai tauyavutaki e muri ko vuravura, a sa qai vakaraitaki e na gauna e muri oqo e na vukumudou,

²¹ ia sai koya dou sa vakabauta kina na Kalou, o koya ka vakaturi koya cake tale mai na mate, ka solia vua nai ukuuku; me sai koya ga na Kalou dou sa vakabauta ka vakanuinui kina.

²² Dou vakasavasavataka na yalomudou ni dou sa talairawarawa ki nai vakavuvuli dina e na vuku ni Yalo Tabu, mo dou lomani ira kina na veiwekani e na loloma tawa lasu ia dou veilomani vakai kemudou e na yalosavasava kei na lomakatakata.

²³ Ni dou sa sucu tale, sa segai e nai tei e vuca rawa, ia mai nai tei ga sa tawa vuca rawa, e na vosa ni Kalou sa bula ka tudei ka tawa mudu.

²⁴ “Ni sa vaka na co na tamata kecega, a sa vaka na se ni co nai ukuuku kecega ni tamata. Sa daumalai na co, a sa mira na sena,

²⁵ ia na vosa ni Kalou sa tudei ka tawa mudu.” Ia oqori na vosa ni tukutuku-vinaka sa vunautaki vei kemudou.