Jope 18 - Vakavakadewa Makawa

Sa kaya ko Pilitati ni yaloviavialevu ka yalolekaleka ko Jope, 1-4. Sa tukuna tale na ca ena yacovi ira nai valavala ca, 5-21.

¹ Sa qai vosa ko Pilitati na luve i Sua, ka kaya,

² Ko na tinia ninaica na vosa? Mo vakanananu mada, keitou na qai vosa.

³ A cava keitou sa nanumi kina me manumanu; Ka vakasami me ka qeleqelewa e matamu?

⁴ Ko iko ka dresulaki iko e na nomu cudru: Ena biu laivi beka ko vuravura e na vukumu? Se na kau tani beka na uluvatu mai na kena tikina?

⁵ Ia na nodra rarama nai valavala ca ena bokoci; Ena sega talega ni serau na lidi ni nona bukawaqa.

⁶ Ena butobuto na rarama e na nona vale, Ena bokoci vata kaya talega na nona cina.

⁷ A nona lako vakaukauwa ena vakaosoosotaki mai, Ena vakabalei koya talega na nona lewa.

⁸ Ni sa yavana dina ga sa biu kina ki na lawa, Sa lako voli tu e na dela ni cori.

⁹ Ena rawai koya na tudai e na bukubuku-ni-yavana; Ena gumatua vua ko koya na daubutako.

¹⁰ Sa vuni e na qele na kenai cori, Kei na kena soki e na sala.

¹¹ Ena vakarerei koya na ka rerevaki e na veiyasana, Ka na cicimuria na yavana.

¹² Ena kania na nona kaukauwa na viakana, Ena volekata sara na sarisarina na rusa;

¹³ Ena kania na kaukauwa ni kulina: Na ulumatua kei mate ena kania na tikina.

¹⁴ A ka sa vakararavi kina ena cavuivuvu mai na nona vale, Ena vakauti koya vua na tui dauveivakarerei.

¹⁵ Ena tiko ga oqori e nona vale, ni sa sega ni nona: Ena vakamiraki na sulifure ki na nonai tikotiko.

¹⁶ Ena malai na wakana ki ra, Ka tamusuki laivi na tabana ki cake.

¹⁷ Ena yali na ka e nanumi kina e vuravura, Ena sega talega na yacana e na salatu.

¹⁸ Ena vakasevi ko koya mai na rarama ki na butobuto, Ena vakasesei tani e vuravura.

¹⁹ Ena sega na luvena se nona kawa vei ira na nona mataqali, Ena sega talega e vo tiko e nonai tikotiko.

²⁰ Era na vakurabuitaka na nona gauna ko ira emuri, Me vaka sa kani ira na rere ko ira eliu.

²¹ Sa vaka dina ga oqo na nodra i tikotiko na tamata ca, Ka sa vakaoqo na yasana nei koya sa sega ni kila na Kalou.