Jemesa 5 - Vakavakadewa Makawa

Sa cudruvi ira na tamata vutuniyau na Kalou ni ra sa tamatai valavala ca, 1-6. Ai valavala e kilikili kei ira na tamata lotu, 7-12. Sa yaga sara na masu, 13-18. Sa ka vinaka na saumaki ira na tamata sa cala, 19,20.

¹ Dou lako mai, oi kemudou na tamata vutuniyau, dou tagi ka qoqolou e na vuku ni nomudou ka rarawa ena yaco mai.

² Sa vuca na nomudou i yau, a sa kania na nomudou i sulu na sarasara.

³ Sa veveka na nomudou koula kei na siliva; ka na tukuni kemudou na kena veveka, ka na kania na lewemudou me vaka na bukawaqa. Dou sa kumuna vata nai yau me yacova na gauna maimuri sara.

⁴ Raica, sa tagi na kedrai voli na tamata daucakacaka, era sa tamusuka na nomudou veiwere, o koya dou sa bureitaka: ia sa curu ki na daligana na Turaga ni lewe vuqa na nodra tagi era sa dautamusuka.

⁵ Dou a marau tikoga e vuravura, dou a daukana tiko; dou a dauvakania na lomamudou, e na siga sa ia kina na dauveivakamatei.

⁶ Dou a lewai koya sa yalododonu, dou a vakamatea; sa sega ni vorati kemudou ko koya.

⁷ O koya ga oqo, na veiwekani, mo dou qai vosota, me yaco mada na nona lako mai na Turaga. Raica, nai vakatau-ni-were sa waraka na vua ni qele e talei, a sa wawa vakadede, me rawata mada na uca sa liu, kei na uca sa muri.

⁸ Dou wawa talega koi kemudou; vakataudeitaka na yalomudou: ni sa roro mai na nona lako mai na Turaga.

⁹ Dou kakua ni dui veikudruvi, na veiwekani, de dou cudruvi: raica, sa tu e na mata ni katuba na Turaga-ni-lewa.

¹⁰ Oi kemudou na wekaqu, vakadamurimuri ira na parofita, e na nodra vosota na ka rarawa, kei na nodra dauvosota, era a vosa e na yaca ni Turaga.

¹¹ Raica, eda sa dauvakatokai ira era sa vosota me ra kalougata. Dou a rogoca na dauvosota nei Jope, dou sa raica talega ni sa tinia vakaevei na Turaga; ni sa yalovinaka sara na Turaga, ka sa dauloloma.

¹² Ia na ka levu sara oqo, oi kemudou na wekaqu, mo dou kakua sara ni bubului, kakua ki lomalagi, se ki vuravura, se ki na dua tani na ka: me io ga na nomudou io; ia me sega ga, na segai; de dou cudruvi kina.

¹³ Kevaka e dua vei kemudou sa vakararawataki, me masu tiko. Kevaka e dua sa marau, me sere.

¹⁴ Kevaka e dua vei kemudou sa tauvi-mate, me kacivi ira na qase ni soqosoqo lewe ni lotu; ia me ra masulaki koya, ka walia e na waiwai e na yaca ni Turaga:

¹⁵ ia na masu ni vakabauta ena vakabulai koya sa tauvi-mate, ka na vakabulai koya na Turaga, ia kevaka ka kitaka nai valavala ca, ena sega ni cudruvi kina.

¹⁶ Dou dui veivakatusa na nomudou i valavala ca, ka veimasulaki, mo dou vakabulai kina. Sa yaga vakalevu na nona masu gumatua na tamata yalododonu.

¹⁷ A tamata sa vakataki keda sara ko Ilaija, a sa masu vagumatua sara me kakua ni tau na uca; a sa sega kina ni tau mai na uca e vuravura, a sa oti mada na yabaki tolu kei na vula ono.

¹⁸ A sa qai masu tale, a sa tau na uca mai lomalagi, a sa vuataka na vuana na qele.

¹⁹ Oi kemudou na veiwekani, kevaka e dua vei kemudou sa lako sese mai nai vakavuvuli dina, a sa vakalesui koya tale mai e dua;

²⁰ me kila ko koya oqo, o koya sa vakalesuya tale na tamata caka cala mai na nonai valavala e cala kina sa vakabula na yalo mai na mate, a sa buluta talega nai valavala ca e vuqa.