३ युहनाल 1 - Muria Far Western

अभिवादन

¹ खरोयते मया किन्तोर ओर प्रिय गयुसिन मिया मुक्याल नना युहन्नाल इद पत्र कोटान्तोना।

² हे प्रिय गोतियाल, बदाम निमा आत्मिक उन्नति कियाला आतोन अदामे निमा सबोय पोल्लोतिगा उन्नति किम अनि सोबाय आयि इन्जोर नना प्रार्थना किन्तोना।

³ बाक्याकि हुचुक विस्वासि लोकुरक वास निमा खरोयते ताकान्तोन इन्जोर निया बारेता खरोयता गवाहि हितुरक असके नना पकाय गिरदा आतान

⁴ नावोर बालक खरोयते ताकान्तोर इदाम केन्जानाताल हजोर गिरदा नाकुन दुसरो बोदायि हिले।

युहन्नाल गयुसना प्रशंसा किन्तोर

⁵ हे प्रिय, बाताल आयि निमा विस्वासि लोकुरकुन अनि विशेषाल वरताह लोकुरकुन मदत कियानाते पकाय इमानदारि मन्तोन।

⁶ अनि ओरक मसिलोकुरा सभाता मुने निया मयाता गवाहि हितोर। अनि बदाम परमेस्वर इच्चा किन्तोर अदाम वरोन दुसरोन मदत कियाला पहाजे इन्जोर अदाम निमा ओरकुन असा मदत किस लोहानुरक ते सोबाय मता।

⁷ बाक्याकि ओरक येसु मसिना पोरोय साटि अविस्वासिनिकेडाल बारायि येतवाय पसियतोर।

⁸ इन्जोर माक खरोयतासंगे बुतो कियाना साटि इदाम लोकुरकुन पाहुन्चार कियाला पहाजे।

दियुत्रिफेस अनि दिमेत्रियुस

⁹ नना मसिलोकुरा सभातुन इदेना बारेते कोटस मतान, मति ओरागा हजोर आयिला इच्चा किन्तोर ओर दियुत्रिफेस नावा अदिकारतुन मानेमायोर।

¹⁰ इन्जोर नना अगा वायानपा ओर बाताल किन्तोर इद पोल्लोतुन नना सबोय लोकुरा मुने वेहका। अनि ओर मावा बारेते खराब खराब पोल्लोंग दुसरोन वेहान्तोर। इदेनतेय ओना समादान आयो मति ओर परमेस्वरना बुतो साटि सबोय नाटेनिगा वलियस परमेस्वरना सेवा किन्तोर ओर लोकुरकुन स्विकार कियाना साटि ओर मना किन्तोर, अनि बोरे इदाम सेवक लोकुरकुन आपुना लोतिगा स्विकार कियाना साटि इच्चा किन्तोर ते ओर लोकुरकुन वने आपुना मसिलोकुरा सभाताल बाहरो पसिहसिन्तोर।

¹¹ हे प्रिय, गलति लोकुरा चेला आयमा मति भला बुतो किन्तोर लोकुरा चेला आम। अनि भला बुतो किन्तोर ओर परमेस्वरनिकेडाल मन्तोर मति बोर गलति किन्तोर ओर परमेस्वरदुन पुनोर।

¹² अनि दिमेत्रियुसना बारेते सबोय लोकुराताल खरोयता गवाहि पुटता मन्ता। अनि माक वने गवाहि हिन्तोरोम, अनि मावा गवाहि खरोय मन्ता इन्जोर निमा पुन्तोन।

आकरि अभिवादन

¹³ नना निकुन पकाय कोटाना मता मति पत्रतिगा कोटान साटि इच्चा हिले।

¹⁴ मति नना निकुन सान्डेय मिलेमायका इन्जोर नाकुन आशा मन्ता असके माक टोडि मुने वळकिकाट।

¹⁵ निकुन शान्ति पुटि। अनि इगाडोरक गोतियाह निकुन नमस्कार वेहान्तोरक। अनि अगाडोर सबोय गोतियाहकना पोरोय येतस येतस नमस्कार इन्कि।