NA SAME 28 - AI VOLA TABU

A masu ni tamata lotu dina.

A Meke i Tevita.

¹ AU na tagi vei iko, Jiova; na noqu Uluvatu, kakua ni galuvi au; de ko galu vei au, kaʼu na vakataki ira era sa lako sobu ki nai bulubulu.

² Rogoca na domo ni noqu masu niʼu sa tagi vei iko; niʼu sa laveta cake na ligaqu kivakaki na nomu loqi tabu.

³ Meʼu kakua ni vecei vata kei ira na tamata ca, kei ira sa caka ca; ko ira era sa vosaveivakacegui vei ira na kai nodra, ia ka sa tu e na yalodra na ca.

⁴ Solia vei ira me vaka na nodra cakacaka, me vaka na ca era kitaka; solia vei ira me vaka na cakacaka ni ligadra; vakasuka tale vei ira na nodrai valavala.

⁵ Ni ra sa sega ni vakananuma na cakacaka i Jiova, se na ka sa kitaka tiko na ligana; ena talaraki ira sobu ko koya, ka sega sara ni tarai ira cake.

⁶ Vakavinavinaka vei Jiova, ni sa rogoca na domo ni noqu masu.

⁷ A noqu kaukauwa kei na noqui vakaruru ko Jiova; sa vakararavi vua na yaloqu, a sa vukei au mai; a sa reki vakalevu kina na yaloqu; kaʼu na vakavinavinaka talega vua e na noqu meke.

⁸ A nodra kaukauwa ko Jiova, kei nai Vakabula kaukauwa vua sa lumuta ko koya.

⁹ Vakabulai ira na nomu tamata, ka vakalougatataka na nomui votavota; lewai ira talega, ka laveti ira ka tawa mudu.