NA SAME 149 - AI VOLA TABU

Me ia na vakavinavinaka vei Jiova.

¹ DOU ia vei Jiova na vakavinavinaka. Dou meketaka vei Jiova na meke vou, kei na vakavinavinaka vua e na nodrai soqosoqo na tamata yalododonu.

² Na Isireli, me rekitaki koya sa cakavi koya: na luve i Saioni, me ra rekitaka na nodra Tui.

³ Me ra vakavinavinaka ki na yacana e na bitunivakatagi; me ra meke vua e na lali kei na api.

⁴ Ni sa marautaki ira na nona tamata ko Jiova: ena vakaiukuukutaki ira na yalomalumalumu e na bula.

⁵ Me ra reki vakalevu na yalododonu: me ra meke vakadomoilevu e nodrai mocemoce.

⁶ Me meke vakaidina vua na Kalou na gusudra, a me taura nai seleiwau bati-rua na ligadra;

⁷ me cudruvi ira na veimatanitu, ka turisautaki ira na veimataqali;

⁸ me vauci ira na nodra tui e na sinucodo, kei na nodra turaga e nai vesu aironi;

⁹ me kitaka vei ira na lewa sa volai: era sa dokai vakaoqo na nona tamata yalododonu kecega. Dou ia vei Jiova na vakavinavinaka.