Marika 9 - AI VOLA TABU

Sa matalia na yago i Jisu, 2-10. A sa tukuni Joni vei iratou na nona tisaipeli, 11-13. Sa Vakabula e dua na tamata ka curumi koya e dua na tevoro, 14-29. Sa qai tukuna na nona mate, kei na nona tu cake tale, a sa vakavulici iratou na nona tisaipeli me ratou yalomalumalumu, ka me ratou lomani ira kecega era sa lotu, 30-50.

¹ SA kaya talega vei iratou ko koya, Au sa kaya vakaidina vei kemudou, Sa tu eke e so, era na sega ni tovolea na mate, era na raica mada na matanitu ni Kalou ni sa yaco vakaukauwa mai.

² A sa oti na bogi e ono, sa qai kauti Petero, kei Jemesi, kei Joni, ko Jisu, a sa kauti iratou vakatikitiki ki na dua na ulu-ni-vanua cecere, o iratou vakai iratou ga; a sa matalia na yagona e matadratou.

³ A sa lumilumisa mai na nonai sulu, sa vulavula sara me vaka na uca-vulavula; sa sega na dausavai sulu e vuravura e vakavulavulataka rawa me vakakina.

⁴ A sa rairai vei iratou ko Ilija kei Mosese: a ratou sa veivosaki kei Jisu.

⁵ A sa vosa ko Petero, ka kaya vei Jisu, Vakavuvuli, sa vinaka na nodatou tiko eke; ia me keitou tara mada na vale vakacevaceva e tolu: e dua me nomu, ka dua me nei Mosese, ka dua me nei Ilija.

⁶ Ni sa sega ni kila na ka me kaya; ni ratou sa rere vakalevu.

⁷ A sa dua na o sa vakarurugi rau: a sa dua na vosa sa lako mai na o, sa kaya, O qo na noqu Gone ni toko: dou rogoci koya.

⁸ A ratou sa veiraiyaki vakasauri, a sa sega na tamata tani eratou sa kunea vata kei iratou, o Jisu duaduaga.

⁹ Ia ni ratou sa lako sobu tiko mai na ulu-ni-vanua, sa vakarota ko koya vei iratou me ratou kakua ni tukuna vua e dua na veika eratou a raica, ka malua me tu cake tale mai na mate na Luve ni tamata.

¹⁰ A ratou sa vunia na vosa ko ya me tu ga vei iratou, a ratou sa veitarogi, se cava beka na tu cake tale mai na mate.

¹¹ A ratou sa tarogi koya, ka kaya, Era sa kaya e na vuku ni cava ko ira na vu-ni-vola ni sa dodonu me lako mada mai ko Ilija?

¹² A sa vosa ko koya, ka kaya vei iratou, Sa lako mada dina mai ko Ilija, me vukica na ka kece me vinaka tale; ia ka vakaevei talega na ka sa volai kina na Luve ni tamata, ni sa dodonu me vosota ko koya na ka e vuqa, ka vakalialiai.

¹³ Ia kaʼu sa kaya vei kemudou, Sa tadu ga mai ko Ilija, a ra sa kitaka vua na ka kecega era sa vinakata, me vaka na ka sa volai e na vukuna.

¹⁴ Ia ni sa yaco ko koya vei iratou na tisaipeli, sa raica ni ra sa lewe vuqa sara sa voliti iratou, kei na vu-ni-vola e so era sa veileti kei iratou.

¹⁵ Ia ko ira kecega na lewe vuqa, ni ra sa raici koya, era sa kidacala sara, a ra sa cici mai ka veikidavaki kaya.

¹⁶ A sa tarogi ira na vu-ni-vola ko koya, A cava dou veileti kina kei iratou?

¹⁷ A sa dua vei ira na lewe vuqa sa vosa, ka kaya, Vakavuvuli, au sa kauta mai vei iko na luvequ-tagane, sa curumi koya e dua na yalo galu;

¹⁸ ia e na yasana kecega sa tauva kina, sa waburaka: a sa qai tuburaki vuso ko koya, ka katia na batina, ka ciba yani: ia kaʼu a vosa vei iratou na nomu tisaipeli me ratou vakasava tani; a ratou sa sega ni rawata.

¹⁹ Sa qai vosa ko koya, ka kaya, Ai tabatamata tawa-vakabauta! me bogi vica meʼu tiko kei kemudou? me bogi vica meʼu vosoti kemudou? kauti koya mai vei au.

²⁰ A ra sa kauta mai vei koya: ia ni sa raici i koya ko koya, sa waburaka sara ko na yalo; i a sa bale ki na soso ko koya, ka vakatatoqitoqi ka tuburaki vuso.

²¹ A sa taroga na tamana ko koya, Sa vakaevei na kena dede ni sa tauvi koya na ka o qo? A sa kaya, Ni sa gone ga:

²² a sa biuti koya vakavuqa ki na buka waqa, ki na wai talega, me vakamatea: ia kevaka ko sa rawata e dua na ka, mo lomani keirau mai, ka vukei keirau.

²³ Sa qai kaya vua ko Jisu, Kevaka ko sa vakabauta rawa, sa rawarawa na ka kecega vua sa vakabauta.

²⁴ Sa qai tabalaka vakasauri na domona na tama ni gone, a sa kaya, ia ka vakawai na matana, Turaga, au sa vakabauta; vukea na noqu tawa-vakabauta.

²⁵ Ia ni sa raica ko Jisu ni ra sa cici vata mai na lewe vuqa, sa vunauca na yalo tawa-savasava, ka kaya vua, Na yalo galu ka didivara, au sa vakarota vei iko, mo lako tani mai vua, ka mo kakua ni curuma tale.

²⁶ A sa qoqolou, ka waburaka vakalevu, a sa qai lako tani; a sa vaka ko koya e dua sa mate; a ra sa kaya kina e lewe vuqa, Sa mate ko koya.

²⁷ A sa taura na ligana ko Jisu, a sa vakaduria cake; a sa qai tu cake mai.

²⁸ Ia ni sa curu ki vale ko koya, sa tarogi koya lo ko iratou na nona tisaipeli, E na vuku ni cava keitou sa sega ni vakasavi koya tani rawa kina?

²⁹ A sa kaya vei iratou ko koya, O ira vakaoqo era sa sega ni vakasavi tani rawa, a ya ga e na daumasu kei na daulolo.

³⁰ A ratou sa lako tani maikeri, a ratou sa lako voli e Kalili; a sa sega ni vinakata ko koya me dua na tamata me kila.

³¹ Ni sa vakavulici iratou na nona tisaipeli ko koya, ka kaya vei iratou, Sa kolai soli yani na Luve ni tamata ki na ligadra na tamata, me ra vakamatea; ia ni sa vakamatei, ena qai tu cake tale mai e nai katolu ni siga.

³² A ratou sa sega ni kila nai balebale ni vosa ko ya, a ratou sa rere ni tarogi koya.

³³ Sa qai yaco ko koya ki Kaperinaumi; ia ni sa curu ki vale sa tarogi iratou, A cava dou sa veileti kina vakai kemudou e na gau-ni-sala?

³⁴ A ratou sa vagagalu ga: ni ratou a veileti vakai iratou e na gau-ni-sala, se ko cei sa levu cake vei iratou.

³⁵ A sa tiko sobu ko koya, ka kacivi iratou na lewe tinikarua, ka kaya vei iratou, Kevaka e dua sa via liu, ena muri sara, enai talatala rewai-ra talega.

³⁶ A sa kauta e dua na gone lailai, ka vakatikora e na kedratou maliwa: ia ni sa keveta e na ligana, sa kaya vei iratou,

³⁷ 0 koya yadua ena vinakata e dua na gone lailai vakaoqo e na vuku ni yacaqu, sa vinakati au; ia ko koya yadua sa vinakati au, sa sega ni vinakati au ga, ko koya talega sa talai au mai.

³⁸ Sa qai vosa vua ko Joni, ka kaya, Vakavuvuli, keitou a raica e dua sa vakasava tani na tevoro e so e na yacamu, ia ka sega ni muri kedatou ko koya: a keitou sa tarova, ni sa sega ni muri kedatou.

³⁹ A sa kaya ko Jisu, Kakua ni tarova; ni sa sega e dua sa cakava e dua na caka-mana e na yacaqu, me qai vosacataki au rawa.

⁴⁰ Ni sa nodai to ko koya sa sega ni noda meca.

⁴¹ Ia ko koya yadua ena solia vei kemudou e dua na bilo wai mo dou gunuva, e na vuku ni yacaqu, ni dou sai tokani i Karisito, au sa kaya vakaidina vei kemudou, ena sega ni yali na kenai sau vei koya.

⁴² Ia ko koya yadua ena vakacala e dua vei ira na lalai o qo era sa vakabauti au, sa vinaka cake vua kevaka sa vakarubeci e domona e dua na vatu i qaqi, ka biu ki loma ni wasaliwa.

⁴³ Ia kevaka sa vakacalai iko na ligamu, muduka tani: sa vinaka vei iko mo curu ki na bula ka liga dua, ka ca me rua na ligamu ka mo lako ki eli, ki na buka waqa e tawa bokoci rawa:

⁴⁴ sa tawa mate kina na nodra baca, a sa tawa bokoci kina na buka waqa.

⁴⁵ Ia kevaka sa vakacalai iko na yavamu, muduka tani: sa vinaka vei iko mo curu ki na bula ka yava dua, ka ca me rua na yavamu ka mo biu ki eli, ki na buka waqa e tawa bokoci rawa:

⁴⁶ sa tawa mate kina na nodra baca, a sa tawa bokoci kina na buka waqa.

⁴⁷ Ia kevaka sa vakacalai iko na matamu, vecuka tani: sa vinaka vei iko mo curu ki na matanitu ni Kalou ka dua bauga na matamu, ka ca me rua na matamu ka mo biu ki na eli sa waqa kina na buka:

⁴⁸ sa tawa mate kina na nodra baca, a sa tawa bokoci kina na buka waqa.

⁴⁹ Ni na vakamasimataki ko koya yadua e na buka waqa, me vaka ni na vakamasimataki nai madrali kece e na masima.

⁵⁰ A masima na ka vinaka: ia kevaka sa takali mai na masima na kena tuituina, ena vakatuituinataki e na cava? Me tu ga e na lomamudou na masima, dou veilomani talega vakai kemudou.