Jope 37 - AI VOLA TABU

Sa tukuna tiko ko Iliu na nona cakacaka rerevaki na Kalou, kei na kena dodonu na rerevaki koya.

¹ E NA vuku ni ka o qo talega sa sautaninini na utoqu, a sa lade tani e na kena tikina.

² Dou rogoca sara na domona ni sa se mai, kei na kurukuru sa kudru mai na gusuna.

³ Sa vakadodonutaka yani ko koya ki na ruku i lomalagi kecega, kei na nona livaliva ki nai yalayala kei vuravura.

⁴ Sa qai vadugu mai emuri na domona, sa kurukuru ko koya e na domona vakaturaga: ia ni sa rogo tu na domona, ena tawa tarova ko koya.

⁵ Sa ia vakurabui na kurukuru na Kalou e na domona; sa cakava na ka levu eda sa sega ni kila rawa.

⁶ Ni sa kaya ki na uca-vulavula, Mo tau ki vuravura: ki na uca wale talega, kei na uca levu ni nona kaukauwa.

⁷ Sa sogodregata na ligadra na tamata kecega; me ra kila na nona cakacaka na tamata kecega.

⁸ Era sa qai laʼki curu ki na nodra qara na manumanu, ka tiko wale e na nodra tikina.

⁹ Sa lako mai na covulaca mai na ceva: kei na liliwa mai na tokalau.

¹⁰ Sa cevata na wai e na cegu ni Kalou: a sa rabailailai mai na wai.

¹¹ A sa vakaoca na o loaloa ni sa vakatauca na kena uca: sa vakaseva na o lumilumisa:

¹² a sa veikauyaki e na nona vosa: me kitaka kina na ka kecega sa vunautaka ko koya, e na dela ni veivanua e vuravura.

¹³ Sa vakayacora mai ko koya, se me nona kuita, se na vuku ni nona vanua, se me ka ni loloma.

¹⁴ Mo vakatu daliga, Jope, ki na ka o qo: mo tu vakadua, ka vakanananu ki na cakacaka veivakidacalataki ni Kalou.

¹⁵ O sa kila beka na siga sa lesia kina na ka o qori na Kalou, ka lewa talega kina na livaliva ni nona o me tibi mai?

¹⁶ O sa kila beka se sa lili vakavinaka evei na o, na cakacaka veivakidacalataki i koya sa ue sara na nona vuku?

¹⁷ Se sa katakata vakavinaka evei na nomui sulu, ni sa vakacegui vuravura ko koya ni sa mudre mai na ceva?

¹⁸ Drau sa tevuka vata kaya beka yani na lomalagi, e sa kaukauwa, ka vaka nai iloilo sa waicalataki?

¹⁹ Mo vakatakila vei keitou na vosa me keitou kaya vua: ni keitou sa sega ni vakadodonutaka rawa e na vuku ni butobuto.

²⁰ Me na tukuni beka vua niʼu sa vosa? kevaka sa vosa na tamata, ena qai tilomi dina ga.

²¹ Ia o qo, sa dredre ni raici na rarama lumilumisa mai lomalagi, ni sa liwa yani na cagi, ka vakasavasavataka.

²² Sa vaka na koula sa lako mai na mata ni tokalau: sa tu vua na Kalou nai ukuuku rerevaki.

²³ O Koya sa Kaukauwa, eda sa sega ni kilai koya rawa: sa levu ko koya ni kaukauwa, ka caka dodonu, ka vutu ni valavala dodonu: ena sega ni ia na veivakasaurarataki.

²⁴ O koya o qo era sa rerevaki koya kina na tamata: sa sega ni vinakati ira loa era lomavuku.