Jope 36 - AI VOLA TABU

Sa vosa tiko ko Iliu, a sa tukuna nai valavala ni lewa ni Kalou, 1-12. Sa vunauci Jope, a sa vakavulici koya talega, 13-21. Sa tukuna na lewa kei na kaukauwa ni Kalou, 22-33.

¹ A SA ia tiko ko Iliu, ka kaya,

² Mo vosoti au vakalailai mada, meʼu vakatakila vei iko, ni sa vo tiko na vosa e na vuku ni Kalou.

³ Au na kauta vakayawa mai na noqu vuku, ia kaʼu na vakadonui Koya ka Buli au.

⁴ Ni na sega dina ni lasu na noqu vosa: o koya e daru sa tiko kei iko, sa ka dinadina na nona vuku.

⁵ Raica, sa kaukauwa na Kalou, a sa sega ni beca e dua: sa levu na nona kaukauwa kei na nona vuku.

⁶ Sa sega ni maroroi ira tiko nai valavala ca: a sa ia na ka dodonu vei ira na dravudravua.

⁷ Sa sega ni rai tani vei ira na yalododonu: era tiko ga kei ira na tui e nai tikotiko vakaturaga: io, sa vakataudeitaki ira tiko ka tawa mudu, a ra sa vakalevulevui.

⁸ Ia ke sa vauci e nai vesu, ka tauri e nai vau ni rarawa:

⁹ ke sa qai vakatakila vei ira na nodra cakacaka, kei na nodrai valavala ca sa levu.

¹⁰ Sa basuka na daligadra talega me ra vakatavulici, a sa vakarota vei ira me ra saumaki mai na ca.

¹¹ Kevaka era vakarorogo, ka qaravi koya, era na vakaotia na nodra siga ni ra tiko vinaka, kei na nodra yabaki ni ra sautu tiko.

¹² Ia kevaka era sa tawa vakarorogo, era na mate e nai seleiwau, ka mate ni ra lialia tiko.

¹³ Ta ko ira na yalodauveivakaisini era sa binia na cudru: era sa sega ni tagi vua ni sa vauci ira.

¹⁴ Era sa mate drokadroka ga, a ra sa tiko vata kei ira na tawa savasava.

¹⁵ Sa vakabula ko koya na dravudravua e nona rarawa, a sa basuka na daligadra ni ra vakasaurarataki.

¹⁶ A sa via kauti iko talega mai na vanua osooso ki na vanua lalaga, sa sega ni osooso; me uro talega na ka sa viritu ki na nomui kanakana.

¹⁷ Ia ko sa vakayacora na nodra lewa nai valavala ca: ena tauri iko na lewa kei nai sau dodonu.

¹⁸ Ni sa cudru, mo qarauni iko de yaviti iko tani yani ko koya: ena qai tawa vakabulai iko rawa e dua nai soro levu.

¹⁹ Ena vinakata beka na nomui yau? e segai, se na koula, se na vu ni nomu kaukauwa kecega.

²⁰ Mo kakua ni domona na bogi, e dauyali kina na tamata mai na nodra yasana.

²¹ Mo qarauni iko, mo kakua ni goleva na ka tawa dodonu: ni ko a digitaka o qo, ka cata na rarawa.

²² Raica, sa vueti keda cake na Kalou e nona kaukauwa; o cei e vakatavuvuli me vakataki koya?

²³ O cei sa lesia na nonai lakolako? se ko cei me kaya, Ko sa caka cala?

²⁴ Mo nanuma me vakalevulevuya na nona cakacaka, a ya era sa dauraica na tamata.

²⁵ Sa ra raica rawa na tamata kecega; e rawarawa me raica vakayawa na tamata.

²⁶ Raica, sa levu na Kalou, ia eda sa sega ni kilai koya, sa sega ni kune rawa nai wiliwili ni nona yabaki.

²⁷ Ni sa vakamimiritaka na wai ko koya: sa tau maikina na uca me vaka na kena bewabewa:

²⁸ a ya sa tau mai na o ka mirika na tamata e vuqa.

²⁹ Sa dua beka me kila rawa nai tevutevu ni o, se na domo ni nona vale malo?

³⁰ Raica, sa tevuka ko koya na nona rarama e delana, a sa ubia na dreke ni wasawasa.

³¹ Ni sa lewai ira na veivanua e na ka o qori; sa solia vakalevu na kakana.

³² Sa tabonaka na livaliva e na qeteqete ni ligana: a sa lewa na vanua me se kina.

³³ A kenai rorogo sa tukutuku e na vuku ni uca, kei na karavau e na vuku ni bewabewa.