Jope 34 - AI VOLA TABU

A Sa vaka ko Iliu, ni sa tukuna, na Kalou ko Jope me tawa yalododonu, 1-9. Sa sega ni caka cala rawa na Kalou, 10-30. Sa nona cakacaka dodonu na tamata me vakamalumalumu vua na Kalou, 31-37.

¹ A SA vosa tiko ko Iliu, ka kaya,

² Dou rogoca na noqu vosa, oi kemudou na vuku; ka vakarorogo vei au, oi kemudou sa daukila ka.

³ Ni sa vakatovolea na vosa na daliga, me vaka ni sa tovolea na kakana na gusu.

⁴ Tou digitaka vei kedatou na lewa dodonu: me tou kila vakai kedatou na ka e vinaka.

⁵ Ni sa kaya ko Jope, Au sa yalododonu; a sa lewai au vakatani na Kalou:

⁶ meʼu lasu beka e na ka kaʼu lewai kina? na noqu vue sa na tawa bula rawa, ia ka sega na ka ca e vuna.

⁷ O cei na tamata sa vakataki Jope, me gunuva na veivakalialiai me vaka na wai?

⁸ A sa sala vata kei ira na daucaka ca, a sa lako voli kei ira na tamata ca.

⁹ Ni sa kaya ko koya, Sa tawa yaga vua na tamata me marautaki koya na Kalou.

¹⁰ O koya o qo mo dou vakarorogo kina vei au, oi kemudou na tamata yalomatua: me yawa vua na Kalou, me caka ca; me yawa talega vua sa Kaukauwa, me tawa dodonu.

¹¹ Ni na solia vua na tamata me vaka na nona cakacaka, ena kitaka talega me ra kunea na tamata kecega me tautauvata kei na nodrai valavala.

¹² E dina ga ni na tawa caka ca na Kalou, ena tawa kauta vakatani na lewa ko Koya sa Kaukauwa.

¹³ O cei sa buli koya me lewai vuravura? se ko cei sa vakadodonutaka na vuravura kecega?

¹⁴ Ke sa nanuma na tamata ko koya, ke sa kauta tale vua na yalona kei na nona cegu:

¹⁵ ke sa na qai ciba kece vata ga na tamata, ka lesu tale me kuvu-ni-soso.

¹⁶ Ia kevaka, ko sa vuku, mo rogoca o qo: mo vakarorogo ki na domo ni noqu vosa.

¹⁷ Me lewa beka ko koya sa cata na ka dodonu? ko na vakacalai koya beka sa yalododonu sara?

¹⁸ Me kaya beka vua e dua na tui, O sa ca? vei ira na turaga, Dou sai valavala ca?

¹⁹ Me qai kaya vakacava kina vei koya sa tawa vinakati ira loa na turaga, ka tawa nanumi ira vakalevu na vutuniyau, ka vakalailai na dravudravua? ni ra cakacaka ni ligana ko ira kecega.

²⁰ Era na mate vakasauri sara, a ra na kidroa na tamata e na lomaloma-ni-bogi, ka lako tani yani: era na kauti tani na qaqa ka sega na liga e kauta.

²¹ Ni sa qara tu na matana ki nai valavala ni tamata, a sa raica kecega na nonai lakolako.

²² Sa sega na butobuto, se na yaloyalo ni mate, me ra vunitaki ira kina na daucaka ca.

²³ Ni na tawa virikotora ko koya vua na tamata na ka e tawa dodonu; me rau ia kina na veilewai kaya na Kalou.

²⁴ Ena vorolaki ira rawarawa ga na tamata qaqa, ka lesi ira e so tani me kedrai sosomi.

²⁵ Ni sa kila na nodra cakacaka ko koya, a sa vukici ira e na bogi, a ra sa rusa kina.

²⁶ Sa yaviti ira e na matanavotu me vaka era tamata ca;

²⁷ e na vuku ni ra lesu tani vei koya, ka sega ni via nanuma e dua na nona sala:

²⁸ a ra sa vakayacora kina vua na nodra tagi na dravudravua: a sa rogoca ko koya na nodra tagi era sa rarawa.

²⁹ Ni sa solia na vakacegu ko koya, ko cei me qai ia na veivakararawataki? ni sa vunia na matana ko koya, ko cei me qai raici koya? se sa caka ki na vanua, se na tamata e dua bauga:

³⁰ ka me kakua ni lewa na dauveivakaisini, de ra coriti na tamata.

³¹ Sa dodonu ga me da kaya vua na Kalou, Au sa vosota: au na sega ni ia tale na ca:

³² na ka kaʼu sa sega ni kila, mo vakavulica vei au: kevaka kaʼu sa caka ca kaʼu na sega ni ia tale.

³³ Me caka beka me vaka na lomamu? ena sauma ga ko koya, se ko cata, se ko vinakata; ka sega koi au: ia mo tusanaka na ka ko kila.

³⁴ Me ra tukuna vei au ko ira na tamata yalomatua, me vakarorogo talega vei au ko koya sa vuku.

³⁵ Sa vosataka ko Jope na ka sa tawa kila, a sa tawa vuku na nona vosa.

³⁶ Au sa domona me vakatovolei vakaotioti ko Jope, e na vuku ni sa totaki ira na tamata ca.

³⁷ Ni sa kuria ko koya na nonai valavala ca e na be: sa cobo e na kedatou maliwa, ka vakalevutaka na nona vosacataki koya na Kalou.