Jope 32 - AI VOLA TABU

Sa cudru ko Iliu vei Jope kei iratou na wekana e lewe tolu, 1-6. Sa cauravou ga ko koya, ia ka sa doudou ni vosa ni sa so na ka e via tukuna, 6-22.

¹ A SA qai cegu ni vosa vei Jope ko iratou na tamata e lewe tolu o qo, e na vuku ni sa vakadonui koya tiko.

² Sa qai waqa mai na cudru i Iliu na luve i Parakeli na luve i Pusa, mai na mataqali i Rami: sa waqa mai na nona cudru vei Jope, ni sa vakadonui koya, ka tawa vakadonuya na Kalou.

³ A sa waqa talega na nona cudru vei iratou na wekana e lewe tolu, e na vuku ni ratou sa vakacalai Jope tiko, ka sa sega ni vakadinadinataka rawa.

⁴ Ia ko Iliu sa waraka oti na vosa vei Jope, e na vuku ni ratou sa qase vua.

⁵ Ia ni sa kunea ko Iliu ni sa sega na vosa e na gusu-dratou na tamata e lewe tolu ko ya, sa qai waqa mai na nona cudru.

⁶ A sa qai vosa ko Iliu na luve i Parakeli na luve i Pusa, ka kaya, Oi au kaʼu sa gone wale, ia koi kemudou dou sa qase sara; o koya kaʼu a yalolailai kina, ka rere ni vakatakila vei kemudou na lomaqu.

⁷ Au a kaya, Me vosa mada ko na siga e vuqa, ia me vakatavuvuli taka na vuku ko na yabaki e vuqa.

⁸ Ia ka sa tiko na yalo e na loma ni tamata: a sa solia vei ira na vuku na cegu i Koya sa Kaukauwa.

⁹ Era sa sega ni vuku kece na turaga: a ra sa sega ni kila na lewa dodonu ko ira kece na qase.

¹⁰ O koya kaʼu a kaya kina, Dou vakarorogo mai vei au; kaʼu na vakatakila talega na lomaqu.

¹¹ Raica, kaʼu a waraka na nomudou vosa; kaʼu a vakatu daliga ki na nomudoui vakavuvuli, ni dou a qara na ka mo dou kaya.

¹² Ia kaʼu a vakarorogo vei kemudou, ka, raica, sa sega e dua vei kemudou sa vakatakila rawa ni sa cala ko Jope, se vosa tale ki na nona vosa:

¹³ do dou kaya, Keitou sa kunea e na neitou vuku: sa biuti koya sobu na Kalou, ka sega na tamata.

¹⁴ Ia sa sega ni vosaki au: kaʼu na sega talega ni vosa vua e na nomudou vosa.

¹⁵ Eratou a kidroa, eratou a tawa vosa tale: eratou a cegu ni vosa tiko.

¹⁶ Niʼu a wawa tiko, (ni ratou sa sega ni vosa; ni ratou sa tiko lo, ka sega ni vosa tale;)

¹⁷ au a kaya, Oi au talega, kaʼu na vosataka na noqui tavi; oi au talega, kaʼu na vakatakila na lomaqu.

¹⁸ Niʼu sa sinai e na vosa, sa cikevi au na yalo sa tiko e lomaqu.

¹⁹ Raica, na ketequ sa vaka na waini sa sogo deivaki; sa kolai kacabote me vaka na tavaya vou.

²⁰ Kaʼu na vosa meʼu vakacegu rawa: kaʼu na dalaga na tebenigusuqu, ka vosa.

²¹ Meʼu kakua mada ni vinakata loa na tamata e dua, meʼu kakua talega ni veicavilaki niʼu sa vosa vakarokoroko ki na tamata.

²² Niʼu sa sega ni kila na veicavilaki: kevaka kaʼu kitaka, ena kauti au tani vakasauri ko koya ka buli au.