Joni 2 - AI VOLA TABU

Sa cakava na wai ko Jisu me waini, 1-11. Sa lako cake ko koya ki Jerusalemi, ka vakasavi ira na dauveivoli mai na vale ni soro, 13-17. Sa tukuna na nona mate, kei na nona bula tale mai, 18-22. E so na tamata era sa vakabauti koya, 23-25.

¹ IA e nai katolu ni siga sa dua na solevu ni vakawati mai Kena e Kalili; a sa tiko maikina na tina i Jisu:

² a sa sureti ko Jisu, kei iratou talega na nona tisaipeli, ki na solevu ni vakawati.

³ Ia ni sa oti na waini, sa kaya vei Jisu na tinana, Sa sega vei ira na waini.

⁴ Sa kaya vua ko Jisu, Yalewa, a cava vei iko kei au? sa sega ni yaco mai na noqu gauna.

⁵ Sa kaya na tinana vei ira na tamata, A ka kecega sa kaya vei kemudou ko koya, dou kitaka.

⁶ Ia ka sa tu maikina e ono na saqa vatu ni wai, sa dauvakanavasa-vataki ira kina ko ira na kai Jutia, sa tauyarua se tauyatolu nai vakarau.

⁷ Sa kaya vei ira ko Jisu, Vakasinaita na veisaqa ni wai e na wai. A ra sa vakasinaita me vuabale sara.

⁸ A sa kaya vei ira ko koya, Dou qai takiva, ka kauta vua sa lewa na solevu. A ra sa kauta.

⁹ Ia ni sa tovolea na wai sa caka me waini ko koya sa lewa na solevu, a sa sega ni kila se sa maivei: (ia ko ira na tamata sa takiva na wai era sa kila;) o koya sa lewa na solevu sa kaciva na wati ni yalewa,

¹⁰ a sa kaya vua, A tamata yadua sa dauviritu eliu na waini vinaka; ia ni ra sa gunuva vakalevu na tamata, sa qai muri na kena sa vinaka vakalailai ga: ko iko, ko sa maninitaka na waini vinaka ka yacova na tiki-ni-siga o qo.

¹¹ Ai vakatekivu o qo ni veika-mana sa cakava ko Jisu mai Kena e Kalili, a sa vakaraitaka kina na nonai ukuuku; a sa vakabauti koya ko iratou na nona tisaipeli.

¹² Ni sa oti o qo eratou sa lako sobu ki Kaperinaumi, o koya, kei na tinana, kei iratou na tacina, kei iratou na nona tisaipeli: a ratou sa sega ni bogi vuqa kina.

¹³ A SA voleka na nodra solevu ni lako-sivia na kai Jutia; a sa lako cake ki Jerusalemi ko Jisu;

¹⁴ a sa kunei ira e na vale ni soro era sa volitaka e so na karavau kei na sipi kei na ruve, kei ira sa veisaui lavo era sa mai tiko.

¹⁵ Ia ni sa cakava oti e dua na kuita wa qaliqali, sa vakasavi ira kecega mai na vale ni soro, kei na sipi, kei na karavau; a sa sovaraka yani na nodrai lavo era sa veisaui lavo, a sa vukica na veitutu;

¹⁶ a sa kaya vei ira sa volitaki ruve, Kauta tani na veika o qo; kakua ni cakava na vale i Tamaqu me vale ni veivoli.

¹⁷ A sa nanuma ko iratou na nona tisaipeli ni sa volai, Sa kani au na loloma katakata ki na nomu vale.

¹⁸ Sa qai vosa ko ira na kai Jutia, ka kaya vua, A cava nai vakatakilakila ko sa vakatakila vei keitou, ni ko sa kitaka na veika o qo?

¹⁹ Sa vosa ko Jisu, ka kaya vei ira, Dou talaraka na vale o qo, kaʼu na qai tara vakaotia e na bogi tolu.

²⁰ Era sa qai kaya na kai Jutia, A vale ni soro o qo sa vasagavulu ka mani ono na yabaki ni sa tara tiko; ia ko na tara vakaotia e na bogitolu, ne?

²¹ Ia na vale sa vosataka ko koya, a yagona.

²² Ni sa qai tu cake tale mai na mate ko koya, sa nanuma ko iratou na nona tisaipeli, ni sa tukuna ko koya na ka o qo vei ira; a ratou sa vakadinata nai Vola, kei na vosa sa kaya ko Jisu.

²³ Ia ni sa tiko ko koya mai Jerusalemi, ni sa ia tiko na solevu ni lako-sivia, sa lewe vuqa era sa vakadinata na yacana, ni ra sa raica na veika-mana sa cakava ko koya.

²⁴ A sa sega ni vakararavi vei ira ko Jisu, ni sa kilai ira kecega,

²⁵ a sa sega ni yaga vua me dua me vakatakilai ira na tamata: ni sa kila ko koya na ka sa tu e na loma ni tamata.