Joni 14 - AI VOLA TABU

Sa tukuna vei iratou na nona tisaipeli ko Jisu nai balebale ni nona lako yani vei Tamana; a sa yalayala me solia na ka kecega eratou na kerea e na yacana, 1-14. Sa yalata ko Jisu na Yalo Tabu me vakalecataki iratou ka vakatavulici iratou, 15-26. Sa vakalecataki iratou na nona tisaipeli ko Jisu, ni sa voleka ni lako yani vei Tamana, 27-31.

¹ ME kakua ni rarawa na lomamudou: dou sa vakabauta na Kalou; dou vakabauti au talega.

² Sa vuqa na tikina e na vale nei Tamaqu: kevaka sa sega, au sa tukuna vei kemudou. Au sa lako meʼu vakarautaka na tikina me nomudou.

³ Ia kevaka kaʼu sa lako ka vakarautaka na tikina me nomudou, au na lako tale mai, ka kauti kemudou vei au; mo dou tiko talega kina e na vanua kaʼu sa tiko kina.

⁴ Ia dou sa kila na yasana kaʼu sa lako kina, dou sa kila talega na kena sala.

⁵ Sa kaya vua ko Tomasi, Turaga, keitou sa sega ni kila se ko sa lako kivei; ia keitou kila rawa vakaevei na sala?

⁶ Sa kaya vua ko Jisu, Oi au na sala, kei na vu-ni-dina, kei na vu-ni-bula; sa sega ni torovi Tamaqu e dua na tamata, a ya e na vukuqu ga.

⁷ Kevaka dou sa kilai au, dou sa kilai Tamaqu talega; ia mai na siga o qo dou sa kilai koya, ka raici koya.

⁸ Sa kaya vua ko Filipo, Turaga, vakatakilai Tamamu vei keitou; keitou na qai cegu.

⁹ Sa kaya vua ko Jisu, Niʼu sa tiko dede vakaoqo kei kemudou, o sa sega li ni kilai au, Filipo? o koya sa raici au, sa raici Tamaqu; ia ko sa kaya vakacava, Vakatakilai Tamamu vei keitou?

¹⁰ O sa sega li ni vakadinata niʼu sa dua vata kei Tamaqu, a sa dua vata kei au ko Tamaqu? a vosa kaʼu sa vosataka vei kemudou, kaʼu sa sega ni vosataka vakai au ga; ia ko Tamaqu keirau sa dua vata kaya, sa kitaka na cakacaka.

¹¹ Dou vakadinati au niʼu sa dua vata kei Tamaqu, a sa dua vata kei au ko Tamaqu; se vakadinati au e na vuku ni cakacaka ga.

¹² E dina, e dina, au sa kaya vei kemudou, O koya sa vakabauti au, ena kitaka talega na cakacaka kaʼu sa kitaka, ia ena kitaka na cakacaka e uasivi cake e na ka o qo; e na vuku niʼu sa lako vei Tamaqu.

¹³ Ia na ka kecega dou na kerea e na yacaqu, au na kitaka, me vakarokorokotaki na Tamaqu e na vuku ni Luvena.

¹⁴ A ka kecega dou na kerea e na yacaqu, au na kitaka.

¹⁵ Kevaka dou sa lomani au, dou talairawarawa ki na noqu vunau.

¹⁶ Ia kaʼu na masuti Tamaqu, ena qai solia vei kemudou e dua tale na Dauveivakacegui, me tiko ga kei kemudou ka tawa mudu;

¹⁷ a Yalo sa vu ni ka dina, o koya era sa sega ni vakabauta rawa na kai vuravura, e na vuku ni ra sa sega ni raici koya se kilai koya: ia sai kemudou ga sa kilai koya: ni sa tiko vata kei kemudou ko koya, ka na curumi kemudou.

¹⁸ Au na sega ni laivi kemudou me luveniyali: au na lako mai vei kemudou.

¹⁹ Malua vakalailai mada, era na qai sega ni raici au tale na kai vuravura: ia dou sa raici au: e na vuku niʼu sa bula, dou na bula talega.

²⁰ E na siga ko ya dou na kila niʼu sa dua vata kei Tamaqu, ka dou sa dua vata kei au, kaʼu sa dua vata kei kemudou.

²¹ O koya sa nanuma na noqu vunau ka talairawarawa kina, sai koya o qo sa lomani au; ia ko koya sa lomani au ena lomani koya ko Tamaqu, ia kaʼu na lomani koya, ka vakatakilai au vua.

²² Sa kaya vua ko Juta, (e dua tani ko Isikarioti,) Turaga, o na vakatakilai iko vei keitou e na vuku ni cava, ka sega vei ira na kai vuravura?

²³ Sa vosa ko Jisu, ka kaya vua, Kevaka e dua sa lomani au, ena talairawarawa ki na noqu vosa; ena qai lomani koya ko Tamaqu, ia keirau na lako mai vei koya, ka tiko ga vua.

²⁴ O koya sa sega ni lomani au, sa sega ni talairawarawa ki na noqu vosa: ia na vosa dou sa rogoca, sa sega ni noqu walega, a ya sa nei Tamaqu sa talai au mai.

²⁵ Au sa vosataka na veika o qo vei kemudou, niʼu sa tiko vata kei kemudou.

²⁶ Ia na Dauveivakacegui, a Yalo Tabu, o koya ena tala mai ko Tamaqu e na yacaqu, ena vakavulici kemudou e na ka kecega, ka va-kasa tale na lomamudou mo dou nanuma na ka kecega kaʼu a vosataka vei kemudou.

²⁷ Au sa yalata vei kemudou na vakacegu, au sa solia vei kemudou na noqu vakacegu; au sa sega ni solia vei kemudou, me vaka sa solia ko vuravura. Me kakua ni rarawa na yalomudou, se rere.

²⁸ Dou a rogoca niʼu a kaya vei kemudou, Au sa lako yani, ka lako mai vei kemudou. Kevaka dou sa lomani au, dou na reki e na vuku niʼu sa kaya, Au sa lako vei Tamaqu: ni sa uasivi cake vei au ko Tamaqu.

²⁹ Au sa qai tukuna eliu vei kemudou ni sa bera ni yaco mai, mo dou vakadinata e na gauna sa yaco kina.

³⁰ E ua siga maimuri kaʼu na sega ni veivosaki vakalevu kei kemudou: ni sa lako mai na turaga ni vuravura o qo, a sa sega ni kunea e dua na ka vei au.

³¹ Me kila ga ko ira na kai vuravura niʼu sa lomani Tamaqu; ia me vaka sa vosa vei au ko Tamaqu, au sa kitaka vakakina. Tu cake, tou lako vuni.