Apakuki 1 - AI VOLA TABU

A WASE I. —Sa tagicaka, ko Epakuki na nodrai valavala ca na kai Jutia, 1-4. Sa vakaraitaki vua na nodra cudruvi vei ira na kai Kalitea, 5-11. Sa rarawa na lomana e na vuku ni sa ka levu na nodra cudruvi, 12-17.

¹ AI colacola sa raica ko Epakuki na parofita.

² A cava na kena dede, Jiova, meʼu sa tagi, ko sa sega ga ni rogoca? a cava na kena dede meʼu sa qoloutaka vei iko nai valavala kaukauwa, ko sa sega ga ni ia na veivakabulai?

³ A cava ko sa vakatakila kina vei au na ka e cala, na ka rarawa talega ko sa vakaraitaka mai? ia na veikove kei na veivakacacani sa tu ga e mataqu, a sa ia tiko na veileti, io, na veivala sa tubu mai.

⁴ 0 koya o qo sa malumalumu kina na vunau, a sa sega sara ni yaco rawa yani na lewa dodonu: ia na tamata ca sa lawakicataki koya sa yalododonu; a sa yaco yani kina na lewa vakatani.

⁵ Dou raica vei ira na veimatanitu, ka vakananuma, ka kidacala vakalevu sara: niʼu na kitaka e dua na cakacaka e na nomudou gauna, dou na sega ni vakadinata, kevaka ena tukuni vei kemudou.

⁶ Ia, raica, kaʼu na vakauqeti ira cake na kai Kalitea, na matanitu yaloca ka yaloriri ko ya, era lako voli tiko e na veivanua lelevu e vuravura, me ra kovea nai tikotiko sa sega ni nodra.

⁷ Era matanitu vakadomobula ka rerevaki; sa tubu maivei ira ga na nodra lewa kei na nodra ka vakaturaga.

⁸ Sa totolo na nodra ose ka bera na leparite; ka lomakatakata vakalevu cake e na wolifa vakayakavi: sa kabuacara na nodrai valu e vodo e na ose, io, na nodrai valu e vodo e na ose era lako vakayawa mai; era sa vuka me vaka na ikeli sa kusakusa me kana.

⁹ Me ra ia kece na veivakacacani sa ra lako ga mai kina; sa taudonu mai na matadra me vaka na cagi mai cake, a ra sa kumuna na bobula me vaka na nuku.

¹⁰ A ra sa vakalialiai ira na tui, ia na turaga sa nodra ka ni vei vakasewasewani: a koro kaukauwa kecega sa ra dredrevaka; io, sa ra viri qele, ka kabata.

¹¹ Sa yalolevu kina ko koya, a sa lako voli mai, ka vosa cala, ka kaya, O qo li na nona kaukauwa mai vua na nona Kalou?

¹² Sa sega li ni ko mailiu sara, o iko Jiova, noqu Kalou, na noqu Kalou Yalosavasava? keimami na sega ga ni mate; i Jiova, ko sa lesi ira me ia na veicudruvi; ia ko iko, Uluvatu, ko sa tauyavutaki ira me ia na veivunauci.

¹³ Sa savasava na matamu me dredreta kina ni vakaraica na ca, ia na vakasarava na ka e cala sa ka ga ko tawa rawata: sa vakaevei li na kawana ko sa mai vakasaravi ira kina na dauvakacaca, ka sa tiko lo ni sai koya e tamata ca sa tilomi koya sa yalododonu vei rau?

¹⁴ ka sa cakavi ira na tamata me ra vaka na ika ni waitui, ka vaka na ka e qasi, sa sega e dua na nodra turaga?

¹⁵ Sa ka kece sara ga sa ra yavia mai kicake e na nodra siwa, ka kumuna ki na nodra lawa, io, sa ra vakasoqona e na nodra lawa ni yavi: o koya o qo era marau kina ka rereki.

¹⁶ 0 koya o qo era soro kina ki na nodra lawa, ka vakacaudreva nai madrali boi vinaka ki na nodra lawa ni yavi; ni sa kawa ni ka o qo sa uro kina na nodrai votavota, ka vinaka na kedra kakana.

¹⁷ Sa ka o qo li era dausova kina na lewe ni nodra lawa, ka sa vakamatei ira tikoga na lewe ni veivanua, ka tawa lomana?