Aisea 66 - AI VOLA TABU

A yalo dina ka malumalumu nai tikotiko ni Kalou, 1, 2. Sa vakatatabui sara nai valavala ni lotu vaka-Jutia, 3, 4. Era sa vakacegui ko ira na yalodina era vakacacani, 5-14. Era cudruvi na lewe vuqa era sa vuki tani me qarava na ka lasu, 15-17. Era na lesi me rai talatala ni Kalou ki vuravura kecega ko ira na vo lailai era vakabauta, ena yaco na nodra cakacaka, era na raica talega na nodra ca na tamata ca, 18-24.

¹ SA vosa vakaoqo ko Jiova, O lomalagi, sa noqui tikotiko vakaturaga, ia ko vuravura, sai tutu-ni-yavaqu: sa evei na vale dou na tara me noqu? sa evei na tikina me noqui vakavakacegu?

² Ia na ka kecega o qo sa cakava na ligaqu, a sa tu mai na ka kecega o qo, sa kaya ko Jiova: ia na tamata o qo kaʼu na goleva, io ko koya sa yalomalumalumu ka kavoro na yalona, ka sa rerevaka na noqu vosa.

³ O koya sa vakamatea na karavau mei soro, sa yavita na tamata; o koya sa vakacabora na lami, sa muduka na domo ni koli; o koya sa cabora nai madrali, sa cabora na dra ni vuaka; o koya sa cabora nai madrali boi vinaka, sa vosavakalougatataka na ka lasu wale. Io ko ira o qo era sa digitaka na nodra sala, na nodra ka vakasisila era sa vinakata e na yalodra.

⁴ Io koi au, kaʼu na digitaka na nodra veivakaocataki; kei na ka era sa rerevaka kaʼu na vakayacora vei ira; e na vuku niʼu a kaci, ka sa sega e dua e rogo mai, kaʼu a vosa, ka sa sega e dua e rogoca, a ra sa cakava na ka ca e mataqu, kei na ka kaʼu sa sega ni vinakata era sa digitaka.

⁵ Dou rogoca na vosa i Jiova, oi kemu dou sa rerevaka na nona vosa; Sa ra kaya na wekamudou, sa cati kemudou, ka biuti kemudou tani e na vuku ni yacaqu, ka vakane, Me vakarokorokotaki ko Jiova: io, ena rairai ga ko koya mo dou reki kina, a ra na madua ga ko ira.

⁶ A domo ni ue mai na koro! A domo mai na vale ni soro! A domo i Jiova ni sa saumi koya vei ira na nona meca!

⁷ Ni sa bera na nona taratara, sa vakasucuma ko koya; ni sa bera ni yaluma ko koya, sa sucu mai vua e dua na goneatagane.

⁸ O cei sa rogoca na ka vakaoqo? o cei sa raica na ka vakaoqori? Me vakasucumi li na vanua e na siga e dua bau? se me sucu vata li na lewe ni matanitu? ia ko Saioni, sa qai taratara, a sa qai vakasucumi ira talega na luvena.

⁹ Meʼu vakayacora beka na taratara, ka sega ni vakayacora talega na vakasucu? sa kaya ko Jiova: se meʼu vakayacora beka na vakasucu, ka sogota tale? sa kaya na nomu Kalou.

¹⁰ Dou reki vata kei Jerusalemi, ka marautaki koya, oi kemudou kecega sa lomani koya; dou reki vakalevu kaya, oi kemudou kecega sa tagicaki koya:

¹¹ mo dou sucuma na sucuna e dauveivakacegui, ka mamau kina; mo dou lobaka, ka marautaka na kena levu ni nonai ukuuku.

¹² Ni sa vosa vakaoqo ko Jiova, Raica, kaʼu na vakayacora vua na sautu me vaka na uciwai, kei na nodrai yau na veimatanitu me vaka na wai drodro e vuabale: ia dou na qai sucuma, dou na roqoti voli e na sarisarina, ka tenei e na duruna.

¹³ Me vaka e dua sa vakaceguya ko tinana, kaʼu na vakacegui kemudou vakakina: ia mai Jerusalemi, dou na vakacegui kina.

¹⁴ Ia dou na kunea, ena reki na lomamudou, ka bulabula na suimudou me vaka na co: ena kilai na liga i Jiova vei ira na nona tamata, ia ena levaci ira na nona meca.

¹⁵ Ni na lako dina mai ko Jiova e na buka, ena vaka talega na covulaca na nona vale-vodoki; me ia na nona veisaumi e na cudru katakata, kei na nona veivunauci e na yameyame ni buka.

¹⁶ Ni sa buka waqa ena ia kina ko Jiova na veilewai, ena ia e nonai seleiwau talega kei ira na tamata kecega: a ra na lewe vuqa ena vakamatea ko Jiova.

¹⁷ O ira era ia na veivakatabui, kei ira era ia na veivakasavasavataki e na veiwere, ka ra muri koya e dua sa tiko e loma, ka ra sa kania na lewe ni vuaka, kei na ka vakasisila, kei na kalavo, era na vakaoti vata ga, sa kaya ko Jiova.

¹⁸ Ia koi au kaʼu sa kila na nodra cakacaka kei na nanuma ni lomadra: ena yaco ga, kaʼu na vakasoqoni ira vata na lewe ni veivanua kecega kei na dui vosavosa; a ra na lako mai me raica na noqui ukuuku.

¹⁹ Ia kaʼu na tauca e na kedra maliwa e dua nai vakatakilakila; kaʼu na tala e so vei ira era sa vo ki na veivanua, ki Tarisisi, kei Puli kei Luti, era dauloqata na dakai, ki Tupali, kei Yevana, na veiyanuyanu vakayawa, era sa sega ni rogoca na qaui rogo, se raica na noqui ukuuku; a ra na tukuna na noqui ukuuku e na veivanua.

²⁰ A ra na kauti ira kece na wekamudou mai na veivanua, mei cabocabo vei Jiova, e na ose, kei na vale-vodoki, kei na tavata, kei na asa, kei na kameli, ki na noqu ulu-ni-vanua tabu ko Jerusalemi, sa kaya ko Jiova, me vakataki ira na luve i Isireli era kauta mai nai cabocabo e na bilo savasava ki na vale i Jiova.

²¹ Ia kaʼu na kauta talega e so vei ira me ra bete ka luve i Levi, sa kaya ko Jiova.

²² Ni sa vaka na lomalagi vou kei na vuravura vou kaʼu sa cakava, ni na tu ga e mataqu, sa kaya ko Jiova, ena tu vaka talega kina na nomudou kawa kei na yacamudou.

²³ Ia mai na vula e dua ka yacova na vula e dua, ka mai na siga tabu e dua ka yacova na siga tabu e dua, era na lako mai na tamata kecega me ra mai cuva e mataqu, sa kaya ko Jiova.

²⁴ A ra na lako yani, ka raica na yagodra na tamata ka ra vuki tani vei au: ni na sega ni mate na kedra baca, na kedra buka talega ena sega ni bokoci; a ra na ka e vakasisilataki vei ira na tamata kecega.