Zakarja 1 - BÍBLIA

Áminning til viðvendingar

¹ Í áttanda mánaði á øðrum stjórnarári Dáriusar kom orð Harrans til Zakarja profets Berekjasonar, Iddosonar soljóðandi:

² Ógvuliga reiður var Harrin inn á fedrar tykkara;

³ sig tí við teir: So sigur Harri herliðanna: Snúgvið tykkum til mín, sigur Harri herliðanna, tá vil eg snúgva mær til tykkara, sigur Harri herliðanna.

⁴ Verið ikki sum fedrar tykkara, sum hinir fyrru profetarnir ámintu og søgdu við: So sigur Harri herliðanna: Víkið frá tykkara vándu vegum og frá tykkara vándu gerðum! Men teir vildu ikki lýða og góvu mær ikki gætur, sigur Harrin.

⁵ Fedrar tykkara – hvar eru nú teir? Og profetarnir – liva teir ævinliga?

⁶ Men míni orð og míni boð, sum eg havi álagt tænarum mínum, profetunum, raktu tey ikki fedrar tykkara, so at teir vendu við og søgdu: Eins og Harri herliðanna hótti at gera við okkum eftir athavi og verkum várum, soleiðis hevur hann gjørt við okkum.

Fyrsta sjón av teimum átta

⁷ Á tjúgunda og fjórða degi hins ellivta mánaðar – tað er mánaðurin Sjebat – í øðrum stjórnarári Dáriusar kom orð Harrans til Zakarja profets, Berekjasonar, Iddosonar soljóðandi:

⁸ Eg sá sjón á nátt: Maður ríðandi á reyðum hesti var steðgaður millum fjallanna, úti við ta djúpu gjónna, og honum á baki vóru reyðir, svartir, hvítir og flekkutir hestar.

⁹ Og tá ið eg spurdi: «Hvørjir eru hesir, Harri?» svaraði eingilin, ið talaði við meg: «Eg skal greina fyri tær, hvørjir hesir eru.»

¹⁰ Tá mælti maðurin, ið stóð millum fjallanna: «Hesir eru teir, sum Harrin hevur sent út til tess at fara um alla jørðina.»

¹¹ Og teir svaraðu eingli Harrans, ið stóð millum fjallanna, og søgdu: «Vit hava farið um jørðina og sí, øll jørðin er í ró og kvirru.»

¹² Eingil Harrans mælti og segði: «Harri herliðanna, hvussu leingi vilt tú drála enn við at eyðsýna miskunn móti Jerúsalem og Júda borgum, ið hava verið fyri vreiði tíni nú í sjeyti ár?»

¹³ Við mildum orðum og uggandi svaraði tá Harrin einglinum, ið við meg talaði.

¹⁴ Og eingilin, ið við meg talaði, segði við meg: Boða og sig: So sigur Harri herliðanna: Eg brenni av vandlæti fyri Jerúsalem og Zion,

¹⁵ men av miklari vreiði móti hinum ekkaleysu heidningunum, ið gjørdu skaðan verri, enn eg hevði ætlað í vreiði míni.

¹⁶ Tí sigur Harrin soleiðis: Eg komi aftur til Jerúsalem við miskunnsemi; hús mítt har skal verða afturreist, sigur Harri herliðanna, og mátingarband verða tant út um Jerúsalem.

¹⁷ Boða framvegis: Soleiðis sigur Harri herliðanna: Aftur skulu borgir mínar vera á tremur av øllum góðum; Harrin skal aftur ugga Zion og velja sær út Jerúsalem.