Sálmarnir 1 - BÍBLIA

¹ Sælur er maður, ið ei fylgir vándra manna ráði, ið ei stendur á syndara vegi og ei situr í spottara lagi;

² men hvørs hugur stendur til Harrans lóg og yvir lóg hans grundar dag og nátt.

³ Hann er eins og træið, plantað við áarløkir, ið aldin gevur í tøkum tíma, og hvørs leyv ei følnar; alt, ið hann ger, honum eydnast skal.

⁴ Ikki gongst soleiðis vándum monnum, men eins og bos teir eru, ið fýkur fyri vindi.

⁵ Tí skulu gudleysir ei standast í dóminum og syndarar ei í rættvísra liði;

⁶ tí Harrin kennir veg teirra rættvísu, og vegur teirra gudleysu ber av leið.