Jeremia 1 - BÍBLIA

Formæli

¹ Orð av Jeremia Hilkiasyni, ein av prestunum í Ánatot í Benjamins landi;

² til hansara kom orð Harrans á døgum Jósia Ámonssonar, Júdakongs, á trettanda ríkisári hans,

³ og framvegis á døgum Jójakims Jósiasonar, Júdakongs, alt til ársloks hins ellivta árs Zidkia Jósiasonar, Júdakongs, alt til íbúgvar Jerúsalems vórðu herleiddir í fimta mánaðinum.

Kallan Jeremia; mandlutræið og ketilin

⁴ Orð Harrans kom til mín soljóðandi:

⁵ Áður enn eg myndaði teg í móðurlívi, kendi eg teg, áður enn tú komst av móðurfangi, halgaði eg teg; til at vera profet tjóðanna havi eg sett teg.

⁶ Men eg svaraði: O, Harri, drottin! Sí, eg dugi ikki at røða, tí at eg eri so ungur.

⁷ Tá segði Harrin við meg: Sig ikki: Eg eri so ungur! Men far allar staðir, hvar eg so sendi teg, og tala alt tað, sum eg bjóði tær.

⁸ Óttast teir ikki, tí at eg eri við tær til tess at frelsa teg, sigur Harrin.

⁹ Og Harrin rætti út hond sína, nart við munn mín og segði við meg: Sí, nu leggi eg orð míni í munn tín.

¹⁰ Sí, eg seti teg í dag yvir tjóðirnar og kongaríkini til at slíta upp og bróta niður, til at oyða og týna, til at byggja upp og seta niður.

¹¹ Síðan kom orð Harrans til mín soljóðandi: Hvat sært tú, Jeremia? Eg svaraði: Eg síggi mandluviðargrein.

¹² Men Harrin segði við meg: Rætt hevur tú sæð; tí at eg vil vaka yvir orði mínum til tess at evna tað.

¹³ Og orð Harrans kom aftur til mín soljóðandi: Hvat sært tú? Eg svaraði: Eg síggi sjóðandi pott við eldstaðin móti norðuri.

¹⁴ Tá segði Harrin við meg: Úr norðuri skal ógævan koma sjóðandi út yvir allar íbúgvar landsins.

¹⁵ Tí sí, eg stevni higar øllum kongaríkjunum har norðuri, sigur Harrin; og teir skulu koma og reisa hvør sítt hásæti uttan fyri Jerúsalems borgarlið og móti borgargørðum hennara alt íkring og móti øllum borgum Júda;

¹⁶ og eg skal fella dómin yvir teir vegna alla vándsku teirra, at teir søgdu meg burtur og ofraðu fremmandum gudum roykilsi og tilbóðu handaverk síni.

¹⁷ Men gyrð nú lendar tínar, statt upp og tala til teirra alt tað, sum eg bjóði tær, og óttast teir ikki, at eg ikki skal gera teg ræddan fyri teimum!

¹⁸ Og eg, sí, eg vil í dag gera teg til víggirda borg, til jarnsúlu og koparmúr móti øllum landinum, móti kongum og høvdingum Júda, móti prestunum og øllum fólkinum í landinum.

¹⁹ Og tá ið teir berjast ímóti tær, skulu teir ikki vera tær yvirmentir; tí at eg eri við tær til tess at frelsa teg, sigur Harrin, drottin.