Hósea 1 - BÍBLIA

Hósea elur børn við skøkju, ið eru tekin um ótrúskap fólksins

¹ Orð Harrans, ið kom til Hósea Beerissonar á teimum døgum, tá ið Uzzia, Jótam, Ákaz og Hiskia vóru kongar í Júda, og tá ið Jeróboam Jóasson var kongur í Ísrael.

² Av fyrsta sinni, tá ið Harrin talaði til Hósea, segði hann við hann: «Far og tak tær skøkju til konu og fá tær skøkjubørn, tí at landið drívur hor í trúloysi móti Harranum.»

³ Hann fór tá og tók sær til konu Gomer Diblaimsdóttur; og hon varð við barn og føddi honum son.

⁴ Og Harrin segði við hann: «Nevn hann Jizreel at navni, tí at áður enn langt um líður, hevni eg blóðsekt Jizreels á ætt Jehu og skilji Ísraels hús við kongsdømið.

⁵ Á tí degi bróti eg sundur á Jizreels vøllum Ísraels boga.»

⁶ Aftur varð hon við barn og føddi dóttur. Tá segði Harrin við hann: «Nevn hana «Náðileysa» at navni, tí at ikki meira vil eg eyðsýna Ísraels húsi náði, so at eg fyrigevi teimum.

⁷ Men Júda húsi verði eg náðigur og hjálpi teimum av ávum Harrans, Guðs teirra; men ikki hjálpi eg teimum við boga og svørði, við bardøgum, rossum og reiðmonnum.»

⁸ Og tá ið hon hevði vant «Náðileysu» av brósti, varð hon uppaftur við barn og átti son.

⁹ Tá segði Harrin: «Lat hann eita «Ikki-mítt-fólk», tí at tit eru ikki fólk mítt, og eg eri ikki Guð tykkara.»

¹⁰ Men síðan skal talið á Ísraels monnum verða sum sandurin við sævarflóð, ið ikki verður máldur og ikki taldur. Og har sum áður varð sagt við teg: «Tit eru ikki fólk mítt,» har skal tað ljóða: «Tit eru synir hins livandi Guðs.»

¹¹ Og Júdamenn og Ísraelsmenn munnu binda felag og velja sær ein og sama høvdinga; og teir skulu fjølgast út um landið, tí at mikil verður Jizreels dagur. 2,1 Tá kunnu tit nevna bróður tykkara «Fólk mítt», og systur tykkara «Náðiríka».