Táyitọsu 1 - BAYỊBURU Ẹzaa

¹ Ẹkwo-ozhi-a bẹ shi l'ẹka mbẹdua bụ Pọlu, bụ onye l'ejeru Chileke ozhi, bụkwaruwho onye-ishi-ozhi Jisọsu Kuráyisutu. Chileke họtaru mu, zhi mu tẹ mu bya emee tẹ ndu Chileke họtaru, mbụ ndu ono, wowaru onwowhe ye iya l'ẹka, tẹ mu bya emee whẹ tẹ whẹ kabaa ọnoshi ike. Mu emekwaawho tẹ whẹ marụ iwhe bụ ọkpobe-okfu nke Chileke, bụ iya l'e-me tẹ ndzụ whẹ dụ lẹge Chileke chọru iya.

² O noo l'anyi tụkoru ele ẹnya ndzụ tututu-mịmimi. Ndzụ tututu-mịmimi ono bẹ Chileke, bụ onye l'ẹte adzụje ejire kfuhaakwaruro lẹ ya l'a-nụ anyi tẹmenu mgboko dụ.

³ O belekwawho lẹ mgbe iya, Chileke bụ onye ndzọta anyi mee t'e shi l'ozhi-ọma iya marụ ndzụ ono, o kweru ụkwa iya. Ozhi-ọma iya ono b'o wotaru ye mu l'ẹka sụ tẹ mu tọkashiaru iya ndiwhe t'o doo whẹ ẹnya.

⁴ Mu l'edekwanu ẹkwo-ọ anụ ghu Táyitọsu. Ị bụ ọkpobe nwa mu nkele i kwetaru gẹ mbẹdua kwetaru l'ọo Jisọsu bụ Onye-Nwe-Ọha. Tẹ Chileke, bụ Nna mẹe Kuráyisutu Jisọsu, bụkwawho Onye Ndzọta anyi meeru ghu eze-iwhe-ọma, nụkwa ghu whọ ẹhu ọdu guu.

Ozhi Táyitọsu lẹ Kirítu

⁵ L'iwhe meru mu haa ghu l'alị Kirítu bụ t'i dozhia iwhe wuduru nu mẹe t'ị gụa ndu l'a-bụ ọgurenya chọchi lẹ mkpụkpu lẹ mkpụkpu lẹge mu kfuhawaru ghu iya.

⁶ Tẹ ndu ọbu, l'ịi-gụ tẹ whẹ bụru ọgurenya chọchi bụkwaru ndu l'aata amarụ ejo ẹka, ndu ono abụru ndu l'alụkaa nwanyị nnanụ nnanụ kpụ. Tẹ ndu ọbu bụkwaru ndu ụnwegirima whẹ wowaru onwowhe ye Kuráyisutu l'ẹka, whẹ abụru ndu l'aata amarụ ụnwu whẹ ẹka lẹ whẹ bụ akpa-aghaka; ụnwegirima whẹ ono ba abụkwawho ọ-karia-ẹka whẹ.

⁷ L'onye ishi chọchi bụfutajekwa onye l'ete emeje iwhe l'aa-ta iya ụta nkeshi ọ bụwa iya bẹ bụ onye ishi, l'eleta ozhi Chileke ẹnya. Onye ono bụfutaje onye l'ẹte abụa idzu-chị-l'obu iya, tọ bụhunu onye obu-ọku, tọ bụhunu onye l'angụtaje mmẹe, ya eme iya l'ẹnya, tọ bụhunu o-chi-gbaa; t'onye ono ba abụkwawho onye l'anọje achọ urwu l'ụzo, l'ẹte akfụaru nhamụnha.

⁸ Onye ọbu bụfutaje onye bụ ọ-kwa-ẹbyii, bụru onye iwhe dụ ree l'adụje ree, onye uche iya dzuru oke, onye dụ chịriri, onye umere iya l'egoshi l'ọ bụwho onye dụru Chileke nsọ, ya abụkwaruwho onye gude onwiya ẹka.

⁹ Onye ono bụfutaje onye kfụshiru ike l'okfu ono, a marụ l'ọ gbarụ t'e gude iya ẹka lẹge e zhiru iye ya, nke ọwhu l'ọo-dụ ike gude anọ ezhi ọkpobe iwhe ono dụa ndu ọdo obu, dụshia whẹ iya ike, tẹhenu ya egoshikwawho ndu jịkaru iwhe ono, l'oozhi ẹka whẹ jeberu, ọ nahụ whẹ.

¹⁰ O noo l'o nweru ndu ha l'igweligwe, bụ ndu kwefuru ike, ndu l'ekfu mkpọkoro okfu gude aghọta ndu ọdo l'ụgho, kelekele nke ndu Ju, bụwaa ndu nke Kuráyisutu.

¹¹ T'a kpọ-bujeru okfu ye ẹgube ndu ono l'ọnu, nkele whẹ l'egudeje ozhi iwhe, whẹ l'ẹtege anọ ezhi, gude chịkashia uwhu l'owhu gẹ l'ee-shi tẹ whẹ rita urwu, mbụ ndu iwhere gvụru l'iwhu.

¹² L'onye lanụ lẹ ndu Kirítu, bụ onye whẹ sụru l'ọo ọ-chịru-ọ-kaa bẹ sụkwaru: “Ndu Kirítu gẹ whẹ ha bẹ shizhiakwawho eshi ụtsu bụtaru utuwhuruku whẹ, whẹ bụru ejo-anụ-ẹgbudu, mbụ ndu ẹnyiru, ẹkpiri l'egbu egbu.”

¹³ Iwhe ono, nwoke ono kfuru bụru ọkpobe-okfu; ọo ya bụ, t'ị bashịaru ndu nke Kuráyisutu mba ike, nke ọwhu ekwekwe whẹ kweru l'a-bụ ọkpobe iya.

¹⁴ Tẹ whẹ ba angakwa nchị l'akọ-iwhe ndu Ju, whẹ ta anga nchị l'iwu ono, ndu ono jịkaru ọkpobe-okfu ono tụru l'onwowhe.

¹⁵ Ndu obu whẹ dụ iwhoro l'ẹka Chileke nọ ta adụkwa iwhe whẹ l'asọ, obenu lẹ ndu merwushiru onwowhe emerwushi, mbụ ndu l'ete ekwetaa nke Kuráyisutu ta adụkwa iwhe l'ẹte abụjeru whẹ nsọ nsọ. Ọriri whẹ rwụhuru arwụhu, ejo iwhe ta awajẹhe whẹ obu mini.

¹⁶ Whẹ l'anọje ekfu l'ọnu lẹ whẹ marụ Chileke, ọle whẹ l'egudejekwanu umere whẹ egoshi lẹ whẹ ta amadụ iya. Whẹ bụ ndu meru ahụma, whẹ buru ekfu-ba-anụ whẹ, whẹ bụkwaruwho ọ-ga-lẹ-mkpa whẹ, l'ẹte adụa iwhe dụ ree ọwhu whẹ l'a-dụ ike eme.