Rutu 1 - BAYỊBURU Ẹzaa

Nawomi yẹle Rutu

¹ Nteke ndu ọgbo-ikpe shi achị ndu Ízurẹlu bẹ mkpẹgu byarụ l'alị ono. Nteke ono b'o nweru nwoke lanụ, bụ onye mkpụkpu Bẹ́tulehemu, dụ l'alị ndu Juda. Nwoke ono duta nyee ya mẹe ụnwegirima iya unwoke labọ, whẹ lashia alị ndu Moabu je abụru mbyambya.

² Ẹwha nwoke ono bụ Elimẹleku, ẹwha nyee ya bụru Nawomi, ẹwha ụnwegirima iya unwoke labọ ono bụru Mahụlonu yẹle Kiliyọnu. Whẹ bụ ẹpa Ifurata, shi lẹ mkpụkpu Bẹ́tulehemu nke alị Juda. Whẹ tụgburu lashia alị ndu Moabu je eburu l'ẹka ono.

³ A nọtanyaa, Elimẹleku, bụ ji Nawomi bya anwụhu, haa nwanyị ono yẹle ụnwegirima iya unwoke labọ ono.

⁴ Ụnwegirima unwoke labọ ono bya alụkota ụnwanyi ndu Moabu. Nyee onye lanụ l'aza Ọpa, nyee onye ọwhua l'aza Rutu. Obe iwhe rwuru awha iri, whẹ bu l'ẹka ono,

⁵ Mahụlonu yẹle Kiliyọnu bya anwụshihu. Nawomi gbarụ ẹka nkele ụnwegirima iya unwoke labọ ono nwụshihuru, ji iya nwụhukwawho.

⁶ Ọ nọdu l'alị ndu Moabu nụa lẹ Onye-Nwe-Ọha bẹ gbatawaru ndibe whẹ, bya emewa tẹ whẹ nweru nri. Tọ dụ iya bụ, Nawomi duta unyomu ụnwu iya, whẹ gbalihu l'alị ndu Moabu tụgbua, ọ bụru whẹ alala.

⁷ Ọ palihu l'ẹka ono, o shi buru, duta unyomu ụnwu iya ono whẹ labọ tụgburu echi-ụzo, whẹ l'e-shi larwua alị ndu Juda.

⁸ O noo ya, Nawomi bya asụ unyomu ụnwu iya ono whẹ labọ: “Unu dawhu azụ tụgbua lakfu ne unu l'ẹhu l'ẹhu. Tẹ Onye-Nwe-Ọha meeru unu iwhe-ọma ẹgube ono, unu meru iya ndu ọwhu nwụhuwaru anwụhu mẹe mbẹdua.

⁹ Tẹ Onye-Nwe-Ọha dobekwa unu l'ẹka meji l'a-nmakfuru unu anmakfuru l'ibe nwoke ọdo, unu l'a-lụ l'ẹhu l'ẹhu.” Nawomi tsutsua whẹ ọnu. Whẹ chikpoo ẹkwa

¹⁰ sụ iya: “Wawa, anyi l'e-tso ghu lakfushia ndibe unu.”

¹¹ Obenu lẹ Nawomi sụru whẹ: “Ụnwu mu, unu dawhu rọ azụ. ?Unu l'a-bya etsoru mu lẹbe ọbu lẹ mu l'a-nwụtakwadu unwoke ọdo tẹ whẹ fụta bụru ji unu?

¹² Ụnwu mu, unu dawhu azụ lashia ibe unu, o noo nkele nka mu ghatawarụ gẹ mu l'alụta ji ọdo. Ọ -bụru tẹ mu bya asụ lẹ mu levuru ẹnya lẹ mu l'a-lụta ji l'ẹnyashi-a bya anwụshia unwoke,

¹³ ?unu l'a-nọdulewho jeye tẹ whẹ vushia? ?Unu l'a-nọdu-zhiawho l'unu l'angarụ whẹ, haa ọolu ji? Waawa ụnwu mu. Ọ kakwa mu atsụtsu karụ unubẹdua nkele Onye-Nwe-Ọha bẹ ngụfuwaru ẹka iya daa mu l'ẹhu.”

¹⁴ Whẹ chikpoo ẹkwa ọdo. Ọpa tsutsua nniko iya ọnu sụ iya t'ọ tọkwehu. Obenu lẹ Rutu bẹ gbakụshiru nniko iya ono, bụ Nawomi ẹka ike.

¹⁵ Nawomi sụ iya: “Lekwa nyee nwune ji ghu gẹ l'ọolakfuwaa ndibe whẹ, alakfuwaa agwa whẹ. Tsokwaru iya lashia.”

¹⁶ Obenu lẹ Rutu bẹ yeru iya ọnu sụ: “Ba aryọshi mu aryọ tẹ mu haa ghu, m'ọkwanu tẹ mu haa ghu etsotso dawhu azụ lashia ibe anyi. Ọo ẹka i cheberu bẹ mu l'e-chebe, ọ bụru ẹka i jeberu buru bẹ mu l'e-buru. Ndibe unu l'a-bụru ndibe mu, Chileke ghu abụru Chileke nkemu.

¹⁷ Ẹka ị nwụhuru bẹ mu l'a-nwụhu, ọ bụru ẹka ọbu bẹ l'ee-li mu. Tẹ Onye-Nwe-Ọha nụa mu awhụ, mbụ mee mu ọ-ka-njọ m'ọ dụ iwhe ọdo, kewafuru mu lẹ ghu gbahaa anwụhu!”

¹⁸ Nawomi bya awhụ lẹ Rutu bẹ kfuwaru iya kepya ya akụ lẹ ya l'e-tso iya ala, ọ ha ya, t'ọ dụhe iwhe ọdo o kfuru iya.

¹⁹ Ọo ya bụ, whẹ labọ kwasẹru jeye whẹ jerwua Bẹ́tulehemu. Nteke whẹ batarụ lẹ Bẹ́tulehemu, mkpụkpu ono l'owhu whụhu ẹwhu l'iswi ẹhu whẹ. Ụnwanyi l'ebukaa mkpu asụje: “?Ị sụ l'ọo Nawomi bẹ dụ ẹgube-ẹ?”

²⁰ Ọ sụ whẹ: “Ndu mu, unu haa mu oku Nawomi. Unu kujechia mu ‘Mara’ nkele Ọkalibe-Kakọta-Ike bẹ mewaru ndzụ mu, ọ bụru nwọtso-ilu.

²¹ Nteke mu l'atụgburu bẹ ẹka jiru mu eji, ọle Onye-Nwe-Ọha bẹ gbabẹwaru mu ẹka duwhu mu azụ. ?Unu l'e-shi agha eku mu Nawomi l'ẹka Onye-Nwe-Ọha nụwaru mu chịikfuu? Mbụ lẹ Ọkalibe-Kakọta-Ike bẹ wokfutaru mu ejo ụdudu.”

²² O noo ya bụ lẹ Nawomi eshi l'alị ndu Moabu lwata. Yẹle Rutu, bụ nyee nwa iya, mbụ nwanyị Moabu bẹ lị lwa. Nteke whẹ lwarwutaru Bẹ́tulehemu bụ g'a watawaru obu balị.