Mbụlembu 1 - BAYỊBURU Ẹzaa

Mbụlembu

¹ Lẹ mbụlembu nteke Chileke meru igwe mee mgboko,

² bẹ mgboko dabuleruwho whorochangu, to nwe ụgbugba. Ọ bụru mini bẹ jiru ẹka lile, ẹkpuroochi gbakọta l'eli mini ono. Ume Chileke l'erwuwhe l'eli mini ono.

³ Ọo ya bụ Chileke sụ: “T'iwhoro ngashịa.” Iwhoro bya angashịa.

⁴ Chileke bya awhụ l'iwhoro ono dụ ree. O wokahu iwhoro ono yẹle ọochi ono dobegee iche iche.

⁵ Chileke gụa iwhoro ono eswe. Ọ gụa ẹkpuroochi ono ẹnyashi. Chi jihu bya asahụ. O noo bụru mbọku nke mbụ.

⁶ Ọo ya bụ Chileke sụ: “T'iwhe nọdu l'echilabọ mini gude nọ-buhu mini ono ẹbo.”

⁷ Tọ dụ iya bụ, Chileke mee ìwhè dobe, ọ nọkahu mini ọwhu dụ l'imeli yẹle ọwhu dụ l'alị ẹbo. Ọ dụ g'o kfuru iya.

⁸ Chileke gụa iwhe ono akpamigwe. Chi jihu bya asahụ. O noo bụru mbọku nke ẹbo.

⁹ Chileke sụ: “Tẹ mini ọwhu dụ lẹ mkpula akpamigwe wụkobe ẹka lanụ, t'eli mgboko fụta iwhe.” Ọ dụ g'o kfuru iya.

¹⁰ Chileke gụa eli mgboko ono alị; ọ gụa mini ono, wụkoberu ẹka lanụ ono eze-ẹnyimu. Chileke whụ l'ọ dụ ree.

¹¹ Ọo ya bụ, Chileke sụ t'alị fushia ụnwu irwu, mbụ iwhe l'eye mebyi mẹe oshi-ọmi yẹle akpụru dụ iya nụ; t'ọwhunonu fushia l'ụdu iya l'ụdu iya. Ọ dụ g'o kfuru iya.

¹² Alị bya efushia ụnwu irwu, mbụ iwhe l'eye mebyi l'ụdu iya l'ụdu iya mẹe oshi-ọmi, yẹle akpụru dụ iya nụ l'ụdu iya l'ụdu iya. Chileke bya awhụ l'ọ dụ ree.

¹³ Chi jihu bya asahụ. O noo bụru mbọku nke ẹto.

¹⁴ Chileke sụ: “T'iwhoro ngashịa l'akpamigwe, shi nno kekahu eswe yẹle ẹnyashi. Whẹ egoshije nteke bụ oge iwhe mẹe nteke bụ ujiku owhu mẹe nteke awha gbarụ.

¹⁵ T'iwhoro, dụ l'akpamigwe ono ngakọta mgboko.” Ọ dụ g'o kfuru iya.

¹⁶ Chileke bya emee iwhoro labọ, pageeru ẹka. Iwhoro ọwhu ka shii b'o meru t'o chije l'eswe; o mee iwhoro ọwhu ka ọlwa alị t'o chije l'ẹnyashi. Ọ bya emefukwaawho kpokponde.

¹⁷ Chileke bya edobe whẹ l'akpamigwe t'iwhoro whẹ ngakọta mgboko.

¹⁸ Tẹ whẹ chije l'eswe mẹe l'ẹnyashi, gude kekahu iwhoro yẹle ẹkpuroochi. Chileke whụ l'ọ dụ ree.

¹⁹ Chi jihu bya asahụ. O noo bụru mbọku nke ẹno.

²⁰ Chileke sụ: “T'anụ, nọ ndzụ ha l'igweligwe kposhia kụru lẹ mini; ẹnu awata owhe ewhewhe l'imeli lẹ mkpula akpamigwe.”

²¹ Ọo ya bụ, Chileke kee eze anụ, bugee l'eze-ẹnyimu mẹe iwhe nọ ndzụ l'ejewhekaa ejewhe l'ụdu iya l'ụdu iya; whẹ bukotaru l'ime mini mẹe ẹnu, l'ewhe ewhewhe l'ụdu iya l'ụdu iya. Chileke bya awhụ l'ọ dụ ree.

²² O noo ya, Chileke bya agọru ọnu-ọma nụ iwhe ono g'ọ ha sụ: “Unu zụ̀a azụ̀zù ha l'igwe. Unu zụ-jia mini eze-ẹnyimu; ẹnu azụ-jia mgboko.”

²³ Chi jihu bya asahụ. O noo bụru mbọku nke ise.

²⁴ Chileke sụ: “Tẹ mgboko chịfuta anụ, nọ-gee ndzụ l'ụdu iya l'ụdu iya. T'elwu mẹe anụ, l'awụ l'ẹwho mẹe anụ-ẹgbudu fụshia l'ụdu iya l'ụdu iya.” Ọ dụ g'o kfuru iya.

²⁵ Chileke bya emee anụ-ẹgbudu l'ụdu iya l'ụdu iya; mee élwù l'ụdu iya l'ụdu iya; mee anụ, l'awụ l'ẹwho l'ụdu iya l'ụdu iya. Chileke bya awhụ l'ọ dụ ree.

²⁶ Tọ dụ iya bụ, Chileke sụ: “T'anyi mee madzụ t'o shia anyi; dụ g'anyi dụ. Tẹ whẹ bụru ishi, l'achị ẹma, nọ l'eze-ẹnyimu, l'achị ẹnu, l'ewhe l'eli mẹe élwù mẹe mgboko l'owhu mẹe iwhe lile, l'awụ l'ẹwho.”

²⁷ Ọo ya bụ, Chileke mee madzụ, o shia ya. Ọ bụru gẹ Chileke dụ bụ g'o meru iya. Ọ bụru nwoke yẹle nwanyị b'o meru whẹ bụru.

²⁸ Chileke gọru ọnu-ọma nụ whẹ sụ whẹ: “Unu zụ̀a azụ̀zù kabaa l'igwe. Unu zụ-jia mgboko bụru ishi iya. Unu bụru ishi, l'achị ẹma, bu l'eze-ẹnyimu mẹe ẹnu, l'ewhe l'eli mẹe iwhe lile, nọ ndzụ, l'ejewhe lẹ mgboko l'owhu.”

²⁹ O noo ya, Chileke sụ: “Mu nụwaru unu iwhe l'eye mebyi lẹ mgboko-o mẹe iwhe bụ oshi-ọmi yẹle mebyi iya t'ọ bụru nri unu.

³⁰ Anụ, dụkota lẹ mgboko-o mẹe ẹnu, l'ewhe l'eli mẹe iwhe lile l'awụ l'ẹwho; mbụ-zhia iwhe lile, nọ ndzụ e meru dobe lẹ mgboko bẹ mu meru t'irwu oshi bụru nri whẹ.” Ọ dụ g'o kfuru iya.

³¹ Chileke bya awhụ l'iwhe lile, o meru bẹ dụkota-gezhia ree shii. Chi jihu bya asahụ. O noo bụru mbọku nke ishii.