Mayịka 1 - BAYỊBURU Ẹzaa

¹ Ọ waa okfu Onye-Nwe-Ọha kfuru yeru Mayịka, onye mkpụkpu Morẹshetu. Nteke o kfuru iya okfu ono bụ nteke Jótamu, mẹe Éhazu, mẹe Hezekáya shi bụ-geeru eze, l'achị ndu Juda. Iwhe ono bụ ọwhulenya ọ whụru l'okfu ẹhu ndu Samériya yẹle nke ndu Jerúsalẹmu.

² Ụnwu eliwhe, unu nụkwa iwhe-e mu l'ekfuru unu. Tẹ mgboko l'owhu yẹle iwhe lile bu l'ime iya ngabẹkwa nchị. Nnajị-Ọha, bụ Onye-Nwe-Ọha shikwa l'eze-ụlo iya, dụ nsọ agba ẹka-ebe agbagude unu.

Ikpe, l'eekpe ndu Samériya yẹle ndu Jerúsalẹmu

³ Unu leduwho. Onye-Nwe-Ọha shiakwa l'ẹka o bu eje abya. Oonyizetawaa t'iya bya adzọngaa lẹ mgbogidi, dụkota lẹ mgboko-o.

⁴ Ugvu g'ugvu ha l'a-dazeshihukota lẹ mkpula ọkpa iya g'ọo ụ̀nwù a ngabẹru lẹ mgboro ọku. Nsụda gẹ nsụda ha l'e-kewashihu ekewashihu sọlahaa gborogboro g'ọo mini shi l'owe-kperekpere ugvu asọdata l'alị.

⁵ Iwhe kparụ iwhe lile ono bụ emeswe ẹpa Jékọpu mesweru Chileke, mbụ iwhe-dụ-ẹji ono ọzo-ụlo Ízurẹlu meru. ?Ọo onye kparụ iwhe ẹpa Jékọpu mesweru Chileke? ?Tọ bụdu ndu Samériya bẹ kparụ iya nụ? ?Ọo onye kparụ ndu Juda ome iwhe-dụ-ẹji? ?Tọ bụdu Jerúsalẹmu?

⁶ Onye-Nwe-Ọha bẹ l'ekfu sụ: “O noo g'o gude mu je l'e-me Samériya t'ọ dakpọshihu bụru mkpọkoro ọzo-ụlo, l'eebua ebu. Mu l'e-me iya t'ọ bụru ẹka l'aa-nọ eme mgbu vayịnu. Ẹwhuru mgbodo mkpụkpu ono bẹ mu l'e-nwuru zụbe lẹ nsụda, mee t'ukfu mgbodo mkpụkpu ono zeshihu gheru ọnu.

⁷ Ntẹkpe lile dụ lẹ mkpụkpu ono bẹ l'ee-tsu yọgiri yọgiri. Iwhe lile, l'aanụje ụnwanyi ọkpara ụlo agwa whẹ bẹ ọku l'e-kepyashikota. Agwa mkpụkpu ono l'owhu bẹ mu l'e-mebyishikota. O noo l'ọo l'aswa, l'aakfụje nụ ụnwanyi ọkpara ụlo agwa ono bẹ whẹ shi nweru iwhe. E je l'e-vuta iwhe ono, whẹ nweru je anụ ụnwanyi ọkpara ẹka ọdo.”

Ọrya ẹkwa yẹle ọgu áwhụ

⁸ Ọo iwhe ono meru g'o gude mu l'arya ẹkwa atsọ gbụda gbụda. Ọo ya meru mu gbarụ ọkpa ọto, gbarụ ẹhu ọto. Mu l'a-tsọ nwụrunwuru g'ọo nkụta-ọswa, kwaa idemini g'ọo udukufuku.

⁹ Nkele ọnya, l'aba mkpụkpu Samériya bụ akpọhu akpọhu. Ọnya ọbu bẹ sweekwaru Juda. Ọ sọkashihuwaru sọba l'ọnoguzo ndibe mu bụ iya bụ Jerúsalẹmu.

¹⁰ Unu be ejekwa iya ekfukashi lẹ mkpụkpu Gatu. Unu ba aryakwa ẹkwa ilile. Unubẹ ndu mkpụkpu Betu-ọfura, unu rwaswia onwunu l'ivovonyi.

¹¹ Unubẹ ndu bu lẹ Shafiya, unu gbarụ ọto gude iwhere wụa awụwu ụzo wụghata. Ndu bu lẹ Zenanu, unu ba afụtakwa afụta. Ndu Betu-ezelu bẹ áwhụ byarụ, o noo nkele iwhe shi gbobuta whẹ nụ b'e wofuwaru l'alị whẹ.

¹² Iwhe ndu bu lẹ Marotu l'eleshi ẹnya iya ike bụ nteke whẹ l'e-zhi ume nkele Onye-Nwe-Ọha bẹ dobewaru iwhe-ọtsulanu ọ nọdu ntse l'ọnu mkpụkpu Jerúsalẹmu.

¹³ Unubẹ ndu bu lẹ Lakishi, unu woru ịnya unu je atụgba l'ụgbo-ịnya unu. Ọo unu vu ụzo gbube ishi ome iwhe-dụ-ẹji, ụnwada Záyọnu nwụta iya l'ẹka unu. Ndu unu wọtaru ẹka whẹ l'ome iwhe-dụ-ẹji bụ ndu Ízurẹlu.

¹⁴ Iwhe unu l'e-me bụ t'unu kwarụ arya nụ ndu mkpụkpu Morẹshetu Gatu gude goshi l'unu lẹ whẹ bukahuwaru. Ndu mkpụkpu Akuzibu l'e-meru goshi ndu eze ndu Ízurẹlu lẹ whẹ bụ ndu ẹregede.

¹⁵ Ndu Maresha, Onye-Nwe-Ọha l'e-ye onye l'a-byakfuta unu bya alwụ-gbua unu. Ndu ono, l'aakwabẹ ugvu lẹ Ízurẹlu bẹ l'a-gbalashị je ekpuru l'ọgba Adulamu.

¹⁶ Unu rwushia ẹgbushi l'ishi, unu akpụshia ẹji, dụ unu l'ẹhu goshi l'unu l'atsọ áwhụ ụnwegirima unu ono, unu yeru obu. Unu rwushia ẹgbushi t'ishi chajẹ unu swarịswari g'ọo nke udele, o noo nkele ee-megee nafụ unu ụnwegirima unu chịta lashia alị ọdo.