Makụ 1 - BAYỊBURU Ẹzaa

Ozhi, Jọnu baputizimu l'ezhi ọha

¹ Ọ waa ishi ozhi-ọma Jisọsu Kuráyisutu Nwa Chileke.

² Lẹ Ayizáya, bụ onye nkfuchiru Chileke bẹ deru l'ẹkwo sụ lẹ Chileke sụru: “Nwa mu, mu l'e-zhi onye ozhi mu t'o vuru ghu ụzo je emechaaru ghu ụzo.

³ O nweru onye l'echi mkpu l'echi-ẹgu asụje: ‘Unu mechaaru Onye-Nwe-Ọha ụzo. Unu mee ogborogbo ụzo iya t'ọ kfụ-geeru nhamụnha.’ ”

⁴ Ọo ya bụ, Jọnu baputizimu bya anọdu l'echi-ẹgu eme ndu madzụ baputizimu, arya iya aryarya asụje: “Unu daa onwunu ụta, sefu ẹka l'ome iwhe-dụ-ẹji, unu l'emegbabe, lwakfuta Chileke t'e mee unu baputizimu, ọo ya bụ Chileke agụaru unu nvụ l'iwhe-dụ-ẹji ono unu metagbaberu.”

⁵ Ndu alị Judíya l'owhu mẹe ndu bu lẹ Jerúsalẹmu gẹ whẹ ha zafụtakota byakfuta iya, abya tẹ whẹ nụ iwhe l'ookfu. Whẹ bya anọdu ekfushikaa iwhe-dụ-ẹji, whẹ metagbaberu, l'oomeje whẹ baputizimu l'ẹnyimu Jọ́danu.

⁶ O noo ya, uwe Jọnu l'eyeje l'ẹhu bụ uwe e gude ẹji ịnya-kamẹlu kpaa, l'oogudeje ajị e gude akpọ-anụ mee kebuta iya l'ukfu. Iwhe shi bụru nri iya nteke ono bụ igube yẹle mmanụ-ẹnwu.

⁷ L'ọoryakwaru iya whọ ndu ono arya asụje: “O nwekwaru onye ọdo l'e-be bya nụ; onye ono bẹ kakwa mu l'ishi ka mu l'ọkpa; onye ono bẹ mu l'ete edzukwaanu m'ọo gẹ mu l'etsukfuru etsukfuru tọfu eri akpọkpa, o yeru l'ọkpa.

⁸ Mbẹdua bụ Jọnu gude mini eme baputizimu. Ọle onye ono l'e-gude Ume-Dụ-Nsọ mee ya unu.”

Ome baputizimu mẹe adata, Sétanu l'adata Jisọsu

⁹ O rwua mbọku ọbu, Jisọsu shi lẹ Názaretu, dụ l'alị Gálili bya; Jọnu mee ya baputizimu l'ẹnyimu Jọ́danu.

¹⁰ Jisọsu shilewho lẹ mini ono afụta eli-mgboko, ọ whụa igweli g'o bukahuleruwho ẹbo gheru ọnu, Ume Chileke dụlewho g'ọo ndo ewhelewho pẹe ewhezeta iya l'ẹhu.

¹¹ A nụa olu-okfu, shi l'imigwe ono sụ: “Ọo gụbedua bụ Nwa mu, mu yeru obu, onye l'emeje ẹhu atsọ mu ụtso.”

¹² E jia ekfu, Ume Chileke ono mee Jisọsu o je anọdu l'echi-ẹgu.

¹³ Ọ nọo ụkporo abalị ugbo labọ l'ime echi-ẹgu ono, Sétanu l'aadata iya. Ẹka ono, Jisọsu nọ ono bụleruwho anụ-ẹgbudu bẹ jiru iya nụ. Jisọsu nọdu l'ẹka ono, ndu ojozhi-imigwe l'eyekaaru iya ẹka.

Jisọsu l'eku ụmadzu ẹno l'anma ẹma

¹⁴ A tụlewho Jọnu mkpọro; Jisọsu bahụ l'alị Gálili je ezhikashilahaa ozhi-ọma, shi Chileke l'ẹka;

¹⁵ sụ: “Nteke ọbu, Chileke kweru ụkwa iya rwuakwaru erwu; Chileke l'abyaakwaa ogoshi l'ọo ya bụ eze. Unu dakwaawhọ onwunu ụta; sefu ẹka l'ome iwhe-dụ-ẹji; lwakfuta Chileke, unu ekweta l'ozhi-ọma Chileke.”

¹⁶ O be nteke l'ọoghata l'agụga eze-ẹnyimu, dụ lẹ Gálili, ọ whụa ụmadzu labọ, l'anọje egbu ẹma: Sáyịmonu yẹle nwune iya Ánduru gẹ whẹ l'agha ụgbu l'eze-ẹnyimu.

¹⁷ Jisọsu sụ whẹ: “Unu bya etsoru mu nke ọwhu mu l'e-me unu t'unu bụru ndu l'e-rwutaje madzụ gẹ l'eerwutaje ẹma.”

¹⁸ Ekfutsuta l'ookfutsuta iya, whẹ hakọta ụgbu, whẹ gude egbu ẹma tsolahaa ya.

¹⁹ O bebekwadua bya ejeliberu nwanshi, ọ whụa Jémusu yẹle nwune iya Jọnu, tụkoru bụru ụnwu Zébedi. Whẹbedua nọ l'ime ụgbo whẹ, edokwa ụgbu whẹ edokwa.

²⁰ Jisọsu bebelewho awhụ whẹ, o kua whẹ tẹ whẹ bya. Whẹ halẹkwawho nna whẹ Zébedi l'ụgbo ono, haa ndu ọwhu e butaru ebuta je etsoru iya.

Nwoke ọgvu bu l'ẹhu

²¹ Whẹ bya abahụ lẹ mkpụkpu Kapániyọmu. O rwua mbọku-ọtuta-ume ndu Ju, Jisọsu bahụ l'ụlo-ndzuko ndu Ju je ezhilahaa whẹ okfu Chileke.

²² Iwhe ono, l'oozhi whẹ mee whẹ, ẹhu jishihu whẹ oyi, l'oozhi whẹ iya g'ọo onye ike lile dụ l'ẹka. O too zhidu iya g'ọo ndu o-zhi-iwu.

²³ O nweru nwoke ọbu ọgvu bu l'ẹhu, nọ l'ime ụlo-ndzuko ono.

²⁴ O chishia mkpu sụ: “Jisọsu onye Názaretu ?ọo gụnu bẹ anyi lẹ ghu jigba? ?Ịibyawaa t'ị kpawhua anyi ọbu? Mu makwarụa onye ị bụ. Ọ kwa ghu bụ onye ono dụ nsọ, shi l'ẹka Chileke.”

²⁵ Jisọsu baarụ iya mba sụ: “Dobe ọnu ndoo fụta nwoke ono l'ẹhu.”

²⁶ Ọgvu ono nwuta nwoke ono zụbe lọchia ya, ryarụ ntaye ntaye fụta iya l'ẹhu.

²⁷ Ẹhu jishihu whẹ oyi mbụ ndu lile ono, nọ l'ẹka ono. Ọ bụru iya meru whẹ jịlahaa ibe whẹ sụ: “?Ọo gụnu dụ ẹgube-ẹ? Iwhe ọwa bụkwa iwhe ọwhuu. ?Oogudejefua ike abarụ ọgvu mba, whẹ eme iwhe o kfuru?”

²⁸ E jia ekfu, e kfukotawaa nke iwhe ono Jisọsu meru, ọ ngakọta alị Gálili mgburumgburu.

Jisọsu l'eme igweligwe ndu iwhe l'emekaa tẹ whẹ mehu

²⁹ Afụta, Jisọsu whẹ l'afụta l'ụlo-ndzuko ono yẹle Jémusu mẹe Jọnu lịru tụgbua. Whẹ bahụ ibe Sáyịmonu whẹ, bụfukwawho ibe Ánduru whẹ.

³⁰ Ẹwhoku l'enwu ne nyee Sáyịmonu, ọ zẹelewho l'ụlo, whẹ kfuru iya Jisọsu.

³¹ Jisọsu jekfu iya je egude iya ẹka kpụ-lia ya, ẹwhoku ono nwubuhu iya, nwanyị ono wata whẹ ọkwaru ẹbyii.

³² O be l'urwẹnyashi mbọku ono gẹ ẹnyanwu rịbawaru, a chịtaru iya ndu lile ẹhu l'adụa mma mẹe ndu ọgvu bugee l'ẹhu.

³³ Ndu ẹka ono gẹ whẹ ha zakọo bya adojia ọnu-ụlo ono.

³⁴ O mee igweligwe ndu ẹhu dụ iche iche l'eme whẹ mehukota. Ndu ọwhu ọgvu bu l'ẹhu b'o chịfukwaru iya whọ, t'o kweje t'ọgvu ọbu kfua okfu nkele whẹ marụ onye ọ bụ.

Jisọsu l'ekfu okfu Chileke lẹ Gálili

³⁵ O rwulewho l'okọku ọha-ẹnu nteke chi l'eteke asahụa, o gbeshi jeshia l'ẹka darụ ore je anọdu l'ẹka ono ekfu anụ Chileke.

³⁶ Sáyịmonu mẹe ndu ọwhuna tsoru achọkashiwhe iya.

³⁷ Whẹ whụle iya whọ, whẹ sụ iya lẹ madzụ lile tụkokwaru achọ iya.

³⁸ Ọ sụ whẹ: “Unu t'anyi je lẹ mkpụkpu ọdo harụ dụ-gee anyi ntse ntse, tẹ mu kfuaru whẹ okfu Chileke, l'o noo iwhe mu byarụ.” Whẹ jeshia.

³⁹ Ọ tụko Gálili g'ọ ha jekota ekfu okfu Chileke l'iwhe bụkota ụlo-ndzuko ndu Ju, achịfukwawho ọgvu bugee madzụ l'ẹhu.

Onye njọkirehu l'eme

⁴⁰ O be ujiku lanụ nwoke lanụ, njọkirehu l'eme bya abyakfuta Jisọsu, bya ebyishi ikpere l'iwhu Jisọsu, ryọo ya sụ: “Ọ -bụru l'ọ dụ ghu mma l'uche bẹ l'ịi-dụkwa ike mee mu tẹ mu mehu.”

⁴¹ Imiko nwoke ono dụ Jisọsu. Ọ machịa ẹka mee nwoke ono l'ẹhu, sụ iya l'ọ dụ iya mma l'uche, mehuwaro.

⁴² Nteke onowho njọkirehu ono mishihu nwoke ono l'ẹhu, ẹhu bya adụ iya mma.

⁴³ Jisọsu nmashịaru iya ọkwa ike sụ iya t'ọ tụgbulekwaruwho lashia,

⁴⁴ sụ iya: “Ba adụbukwaa onye l'ii-kfuru iya, tụgbulekwaruwho je egoshi onwoghu onye l'agbajẹ ẹja nụ Chileke, t'o lerwee ghu ẹnya elerwe. Gụ eje egwodzua ngwo-ẹja onye e metaru l'iwhe l'eme iya nụ l'anụje je anụ lẹge Mósisu tụru iya l'iwu. Ọo ya bụ nke ọwhu ọha l'a-marụ l'ẹhu dụwa ghu mma.”

⁴⁵ Nwoke ono jelee je ekfukashiaru madzụ lile iwhe ono, tụko akọkashi akọ ono. Ọ bụru iya meru Jisọsu ta afụtajehe l'edzudzu-ọha lẹ mkpụkpu. O je anọdu l'ẹka ọbu madzụ l'ete ebua ebu. Ndu madzụ shilee l'ẹka lile awụ awụ-kfuta iya.