Judu 1 - BAYỊBURU Ẹzaa

¹ Ẹkwo-ozhi-a bẹ shi l'ẹka mbẹdua, bụ Judu, onye l'ejeru Jisọsu Kuráyisutu ozhi, bụkwaruwho nwune Jémusu. Ndu mu l'ede ẹkwo-ọ anụ bụ iwhe bụkota unubẹ ndu ono, Chileke kuru, mee unu: unu bụru ndu nkiya. Chileke ono, bụ Nna bẹ yeru unu obu, unu bụkwaruwho ndu Jisọsu Kuráyisutu kwakọberu t'ọ bọ dụ iwhe l'e-me unu, t'unu nọdu ngabẹru abyabya nke yẹbe Jisọsu Kuráyisutu ono.

² Tẹ Chileke meeru unu obu-imiko, ya emee t'ẹhu dụ unu guu, ya eyekwawho unu obu. T'ọ tụkota iwhe ono meeru unu, meeru iya unu nke anyịnyi.

Ndu ejo nzhi

³ Ndu mu yeru obu; l'iwhe mbụ, mu shi rịa lẹ mu l'e-deru unu l'ẹkwo-ozhi-a bụ nke adzọdzo ono, Chileke dzọru anyi g'anyi ha, gude goshi anyi lẹ ya yeru anyi obu. Ọle mu bya arị-whu ọriri azụ sụ l'o nweru iwhe ọdo, kachia mkpa, mu l'e-dechiaru unu. L'iwhe ono, ka mkpa ono bụ tẹ mu ryọ-chia unu aryọ, ryọshia unu ike sụ: t'unu bya awata anọ agbarụ ọkpobe-okfu ono ọdzori, mbụ ọkpobe-okfu ono, Chileke zhiru ndu nkiya ono. Ọkpobe okfu ono bẹ Chileke zhiru anyi sụ: t'anyi kweta iya; tọ bọ dụkwa onye l'e-wofu iya iwhe, tọ dụ onye l'e-yekwa iya iwhe.

⁴ Iwhe mu kwoberu ekfu iya bụ l'ọ harụ nweru ndu l'ẹte akwabẹ Chileke ugvu. Ẹgube ndu ono bẹ tọ-zhiawho nwẹhu pyobata l'echilabọ unu, unu ta ama. Whẹ l'anọje ezhi l'ọ dụa ree tẹ madzụ meje umere, l'eshi nshi, eshi-ọwhu Chileke bụwanu onye l'emeje eze-iwhe-ọma. Whẹ l'ajịkaje Jisọsu Kuráyisutu ono bụ iya bụ Onye-nwe-anyi kpụ; bụkwaru iya whọ kpụ bụ onye gude ndzụ anyi. Lẹ nteke ndụ-ichee b'e dehaakwaru iya roo l'ẹkwo Okfu Chileke sụ: lẹ Chileke l'a-nma whẹ ikpe iwhe ono, whẹ l'eme ono.

⁵ Iwhe lile-e bẹ unu makọta-gehaakwaru ree-ree-ree. Ọle iwhe mu l'emelekwaa tẹ mu nyatarụ unu bụ lẹ nteke ndụ-ichee bẹ Onye-Nwe-Ọha dzọkwaru ndu nkiya nteke ono, whẹ shi buru l'alị Íjiputu. O mee: whẹ wụfuta l'alị ono. Ọle ọ dzọ-gekwaaru whẹ nno, megekwaro: o gbushilekwaa ndu ọwhu l'ete ekwee woru onwowhe ye iya l'ẹka.

⁶ Unu nyatakwawhọ g'ọ nwụru ndu ojozhi-imigwe ono gẹ whẹ ha, mbụ ndu ọwhu kwefuru ike lẹ whẹ ta anọpyabedu l'ẹka, Chileke doberu whẹ tẹ whẹ chịje, whẹ te ekwekwawho lẹ whẹ l'e-bu l'ẹka, Chileke sụru tẹ whẹ buru l'imigwe. Ojozhi-imigwe ono gẹ whẹ ha bẹ Chileke tụakwaru mkpọro mgbe agvụ agvụ. Ọ chịru whẹ ye lẹ tsụrii ẹkpuroochi. Ọ bụru ẹka ono bẹ whẹ l'a-nọdu jeye l'oke mbọku ono, bụ mbọku, Chileke l'a-nma whẹ ikpe.

⁷ Unu anyatakwawhọ g'ọ nwụru Sódomu yẹle Gọmóra mẹwaro iwhe bụkota obodo obodo ono, whẹ lẹ whẹ narụ ọnu-ẹgu. L'obodo ono g'ọ ha bẹ tụkwaruwho onwowhe tọgboru ọkpa lẹ nwanyị, emekakwaawho akpamara ọdo, l'ẹte adụa nke ekfukfu. Chileke kpọwaru whẹ ọku; ọ bụru nno bụ gẹ l'ọo-nọ anụ whẹ awhụ jeye lẹ tuutuu-yooyoo. Iwhe ono bụkwa iwhe Chileke gude alọ ndiwhe ẹka lẹ nchị.

⁸ Sụa, o nokwawho gẹ l'ọo-dụ ndu ono, l'ezhi iwhe ono, l'ẹte abụa ọkpobe-okfu ono. Whẹ l'arọje nrọ, l'emeje, whẹ emerwushia onwowhe, whẹ akpọ ndu ishi ashị; whẹ l'anọje ekfubyishi ndu ono, l'ẹte awhụje l'ẹnya l'ogbu-zaazaa l'imigwe.

⁹ Ekfubyishi ono, whẹ l'ekfubyishi ndu ono ta adụkwa m'ọo Máyikelu, bụ onye ishi ojozhi-imigwe, tụru ama nke ememe iya. Lẹ nteke ono, Máyikelu ono yẹle Sétanu tụru ẹgo onye ọwhu l'a-pata odzu Mósisu bẹ Máyikelu l'atụkwaa ama nke owhu Sétanu iwhu, nnta gẹ l'ee-shi tẹ ya nma iya ikpe. Iwhe o kfuru Sétanu bụlekwawho: “Tẹ Onye-Nwe-Ọha barụ ghu mba.”

¹⁰ Ndu ono bẹ bụ iwhe l'ete edoo whẹ ẹnya bẹ whẹ l'anọje ekfubyishi. Whẹ dụ g'ọo anụ-ẹgbudu, l'ete enwee uche; bụlewho iwhe l'agụ iya nụ bẹ l'ọomaje, ọ bụleru iya whọ bẹ l'oomeje. O nokwawho gẹ ndu ono dụ ndono. Ọo iwhe l'agụ whẹ bẹ whẹ l'emeje. Ọ bụkwanuru iya l'e-gbu whẹ.

¹¹ Nshọo imiko whẹ! Ọo ejo ụzo ono, Kenu tsoru lẹ ndụ-ichee bẹ whẹ l'etsokwawho, mbụ iwhe ono, o meru, kparụ g'o gude o gbua nwune iya. Ọo ẹkpiri okpoga bẹ lọtaru ndu ọwa; whẹ shiswee ụzo ono, kfụru nsụmini ono. Whẹ melahaa iwhe Bélamu meru nteke ndụ-ichee ono. Ọ bụru gẹ Kora kwefuru Chileke ike bụ gẹ whẹ kwefuru iye ya. Whẹ jekwanu l'a-la l'iyi g'ọ larụ.

¹² Ọobuje whẹ bya anọkube unu eri nri l'ẹka unu dọkoberu yeko ẹka eri nri egoshi l'unu yeru onwunu obu, bẹ whẹ l'abụje iwhe iwhere nọdu l'echilabọ unu. Ọle iwhere ẹhu whẹ ta adụjekwa whẹ, l'ọolewho onwowhe bẹ whẹ letaru ẹnya. Whẹ dụ g'ọo urwukpu, whẹrewhere whekashiru, mbụ ẹgube-ẹ igweli l'erwugee erwu; whẹrewhere abya ewhekashia ya, igweli eje achịhe mini. Whẹ dụ g'ọo oshi-ọmi. Ọle ọ kwa oshi-ọmi ọwhu l'ẹte amịje mebyi nteke ọ gbarụ iya l'ọmyi mebyi. Ẹgube ndu ono bẹ ọnwu gbuakwaru l'ọno-ndzụ, ọ tọ bụlekwaa ugbo lanụ bẹ whẹ nwụhuru, o noo nkele e whefuwaru whẹ tuwhaa gẹ l'eewhefuje oshi.

¹³ Whẹ dụkwawho g'ọo akpara-mini, ha shii l'atụ l'eze-ẹnyimu. O noo nkele whẹ l'avọ-lije ejo umere ono, l'eshi nshi, whẹ l'eme, g'ọo ẹka ụwhu mini vọ-lihuru. Whẹ dụ g'ọo kpokponde, l'ewhu ụzo. Ọle ẹka Chileke doberu kwabẹru whẹ bụkwa ejo ẹkpuroochi, gbarụ tsụrikiti. Ọ bụru ẹka ono bẹ whẹ l'a-nọdu jeye lẹ tututu-mịmimi.

¹⁴ Ọ kwa Ínọku bụ onye ọgbo nke ẹsaa l'eri Ádamu. Ínọku ono bẹ Chileke kalẹkwaruwho lẹ ndu ono byajẹkwa. Ọ bụru iwhe ono meru Ínọku dee sụ: “Unu leenu, Onye-Nwe-Ọha bẹ yẹle ndu nkiya ono, bụ agụta l'ọgu, shi l'imigwe l'a-lịkwa bya,

¹⁵ bya ekpee ndiwhe gẹ whẹ ha ikpe. Oo-goshikota ndu lile ono, l'ẹte amaa Chileke iwhe lile, whẹ meru iya, bụkwanu iwhe-dụ-ẹji, ya egude emeswe ono, whẹ mesweru iya nma whẹ ikpe lẹ whẹ ta akwabẹdu iya ugvu, nmakwa whẹ whọ ikpe iwhe bụkota ejo okfu, whẹ gude ekfubyishi ẹwha iya.”

¹⁶ Ndu ono l'abụje-zhiawho; iwhe -byarụ whẹ, ya abụleruwho Chileke bẹ whẹ l'anọje ata ụta iya. Mbụ ọobuje iwhe-ọtsulanu -byakfuta whẹ, whẹ agụru Chileke nggụrima. Whẹ atụkwaru nụ onwowhe tọgboro ẹgu ejo-iwhe, l'agụgbabe whẹ. Iwhe l'eshije whẹ l'ọnu abụ-zhiaruwho anọ ajakpọshi onwowhe mkpọkoro ajaja. Whẹ whụ-zhia l'o nweru urwu, whẹ l'e-rita madzụ l'ẹka, whẹ ekebezhiawho ẹhu ajakpọshilewho onye ọbu.

Ọnma ọkwa mẹe iwhe l'ee-meje

¹⁷ Ọle ọbụ, ndu mu yeru obu, iwhe mu l'eme t'unu marụ bụ: unu nyatajẹ-zhiakwawho iwhe lile ono, ndụ-ishi-ozhi Onye-nwe-anyi Jisọsu Kuráyisutu dụhawaa mbụ kfuru unu.

¹⁸ Mbụ iwhe ono, whẹ shi anọje agụru unu ọgu egvu bụ iya bụ: “O -rwudelewho mgboko-o l'agvụgvu b'o nwegeeru ndu l'a-nọ aja unu ewenu. Iwhe whẹ l'a-nọjelewho eko ẹka iya bụ gẹ whẹ l'e-shi mee ejo-iwhe ono, ẹgu iya l'enwu whẹ whuruwhuru l'ẹhu, mbụ iwhe ẹgu iya l'agụ whẹ nkele ọo lẹ whẹ ta akwabẹdu Chileke ugvu.”

¹⁹ Ndu l'eme ẹgube iwhe ono bẹ l'akpatajẹ t'ọgbo bua onwowhe ẹbo kpajẹ iche iche. Ọ kwa ẹgu iwhe dụ lẹ mgboko, l'agụ whẹ nụ bẹ kpụ whẹ l'ẹka, ọ tọ kwa Ume-Dụ-Nsọ gude ndzụ whẹ.

²⁰ Ọle ọwhube unubẹdua, bụ ndu ọwhu mu yeru obu, t'unu kfụlekwaruwho kfụshia ike l'ekwekwe ono, dụ iche, unu kweru ono, mbụ ekwekwe ono, shi Chileke l'ẹka. Unu gude ekwekwe ono vuje evu. Unu hajẹe tẹ Ume-Dụ-Nsọ goshije unu g'unu l'e-gudeje ekfu anụ Chileke.

²¹ Unu nọpyabelekwawho l'oye obu ono, Chileke yeru unu, unu anọdukwawho ngabẹru Onye-Nwe-Ọha, bụ Jisọsu Kuráyisutu t'o meeru unu obu-imiko, mekwaawho t'unu nọdu ndzụ tututu-mịmimi.

²² T'unu mejeeru ndu ọwhu l'abọkwadu obu ẹbo imiko.

²³ Ẹgube ndu ono bẹ unu l'e-yetajeru ẹka lọfuta whẹ l'ọku. Unu awhụjekwaaru whẹ whọ imiko, mbụ ndu ono, bụ ẹgu ejo-iwhe, l'agụ whẹ nụ bẹ gude ndzụ whẹ. Ọle-a, t'unu kwachafụjekwaru whẹ ẹnya mẹ unu l'awhụru whẹ imiko ono. Iwhe bụ iwhe bụ nke whẹ bẹ unu l'a-kpọkotakwa ashị, mbụkwa je akpaa l'uwe, whẹ yeru l'ẹhu bụ iya bụ iwhe lile, whẹ l'emekota eme, bụ iwhe ejo ọriri whẹ ono merwushiwaru.

Ajaja bụ nke Chileke

²⁴ T'anyi tua Chileke ẹwha, mbụ onye ono, bụ iya bẹ ike lile dụkota l'ẹka. Ọo ya bụ onye ono, l'adụje ike mee unu t'ọkpa be echiswarahu unu t'unu daa, ọ bụkwaru iya whọ l'e-me unu t'ọ bọ dụ iwhe l'aa-ta unu ụta iya nteke l'oo-kuta unu dobe l'ọdu-biribiri iya. Ẹka ono bụ ẹka ẹhu l'a-nọ atsọ unu ụtso.

²⁵ T'anyi tua ya ẹwha l'ọo ya nwẹkiya bẹ bụ Chileke kpụ. Ọ bụru l'ẹka Onye-nwe-anyi Jisọsu Kuráyisutu bẹ l'oo-shi dzọo anyi. Tẹ ọdu-biribiri mẹe ọbu Ọkalibe-Kangokotaru-Nu mẹe ike mẹe ọbu ishi, bụhawaa nkiya tẹmenu mgboko dụ, t'ọ bụru nkiya nta-a, bụkwaruwho nkiya jeye lẹ tututu-mịmimi. O noo g'ọ dụ.