Jeremáya 1 - BAYỊBURU Ẹzaa

Onye-Nwe-Ọha l'eku Jeremáya

¹ Ọ waa bụ iwhe e deru lẹ nkfuchiru, o kfuchiru Chileke mbụ Jeremáya nwa Hilikaya. Jeremáya bụ onye lanụ lẹ ndu l'agbajẹ ẹja nụ Chileke, bu lẹ mkpụkpu Anatotu l'alị ndu Bénjaminu.

² Onye-Nwe-Ọha kfuru okfu yeru Jeremáya nteke Josáya nwa Amọnu shi bụru eze ndu Juda, l'awha kwe iya awha iri l'ẹto, ọ watarụ ọbu eze ono.

³ Ọ bya ekfukwaruwho yeru iya nteke Jehoyakimu nwa Josáya shi bụru eze ndu Juda. Onye-Nwe-Ọha bẹ kfuru okfu yeru Jeremáya igweligwe oge jeye awha, kwe Zedekaya nwa Josáya awha iri lẹ nnanụ, ọ bụ eze ndu Juda. Mbụ jeye l'ọnwa ise l'awha ono, bụ nteke a kpụru ndu Jerúsalẹmu lẹ ndzụ laa alị ọdo.

⁴ Okfu Onye-Nwe-Ọha bẹ kfuru mu sụ:

⁵ “Tẹhenu mu kpụa ghu l'ẹwho ne ghu bẹ mu mahawarụ ghu. Tẹhenu a nwụa ghu bẹ mu dobehawaru ghu nsọ. Mu tụru ghu ẹka t'ị bụru onye l'ekfuchiru Chileke lẹ mba gẹ mba ha.”

⁶ Tọ dụ iya bụ, mu sụ: “Ha-e, Nnajị-Ọha, bụ Onye-Nwe-Ọha mẹ mu ta amakwa okfu okfu. Mu bụkwa nwata-une.”

⁷ Onye-Nwe-Ọha sụ mu: “Ba asụshi l'ị bụkwadu nwata-une. Iwhe bụ ndu mu zhiru ghu t'i jekfu bẹ l'ii-jekfu. Iwhe mu zhiru ghu t'i kfua bẹ l'ii-kfu.

⁸ Ba atsụshi whẹ egvu. O noo nkele mu nọdu swiru ghu eswiru, mu je l'a-nafụta ghu. O nokwa iwhe Onye-Nwe-Ọha l'ekfu ndono.”

⁹ Tọ dụ iya bụ, Onye-Nwe-Ọha tụchia ẹka iya kpaa mu l'ọnu bya asụ mu: “Ntaa bẹ mu wowaru okfu mu ye ghu l'ọnu.

¹⁰ Lekwa lẹ ntanụ bẹ mu dobewaru ghu t'ị ka mba l'owhu yẹle t'ị ka alị-eze l'owhu. T'ị vụa iwhe dụ nke avụvu l'ọgvu, lakashịa iwhe dụ nke alakashị, gụ emebyishia iwhe dụ nke emebyishi, kwatsushia iwhe dụ nke akwatsushi, gụ atụa iwhe dụ nke atụtu; dzaa iwhe dụ nke adzadza.”

¹¹ O noo ya, Onye-Nwe-Ọha bya ekfuru okfu yeru mu jịa mu sụ: “Jeremáya, ?ị whụru gụnu?” Mu sụ iya lẹ mu whụru ẹkali oshi alụmondu.

¹² Onye-Nwe-Ọha sụ mu: “Ị whụchataru ụzo, nkele iwhe mu gbarụ ẹnya iya bụ t'okfu mu ree gẹ mu kfuru iya.”

¹³ Onye-Nwe-Ọha byakwa ekfuru okfu yeru mu nke ugbo labọ iya sụ: “?Ị whụru gụnu?” Mu sụ iya lẹ mu whụru ite, l'atsụ kpụtukputu g'o gberu egbe kpolia ike akpoli l'ụzo isheli.

¹⁴ Tọ dụ iya bụ, Onye-Nwe-Ọha sụ mu: “Ejo-iwhe l'e-shi l'ụzo isheli tsụru kpụtukputu byakfuta iwhe bụ ndu bu l'alị-a.

¹⁵ Ntaa bẹ mụbe Onye-Nwe-Ọha l'ekukowaa ikfu nọnu l'alị-eze ndu isheli tẹ whẹ byatashia ọgu l'alị-a. O nokwa iwhe Onye-Nwe-Ọha l'ekfu ndono. Ndu eze whẹ l'a-bya edobe oshi-eze whẹ l'ọnuzo — abata obodo Jerúsalẹmu, dokwaa ya whọ mgburumgburu gude dochia mgbodo, a tụ-wheru obodo ono, bya edochia ya mkpụkpu, dụkota l'alị Juda.

¹⁶ Mu l'e-kfuru gẹ l'ọodua mabẹru ndibe mu, nkele whẹ meru ejo-iwhe, mbụ lẹ whẹ harụ mu, kpọlahaa ụ̀nwù-isẹnsu ọku nụ agwa ọdo, balahaarụ iwhe whẹ gude ẹka whẹ mee ẹja.

¹⁷ Gụbedua, bụ Jeremáya; rwụkotakwa onwoghu. Gbalihu je ekfuaru whẹ iwhe lile, mu zhiru ghu. T'egvu whẹ ba atsụkwa ghu, ọ dụmeka bẹ mu l'e-yekwa ghu egvu l'iwhu whẹ.

¹⁸ Ntanụ bẹ mu l'e-me ghu t'ị bụru mkpụkpu, a tụru agbarara, mẹe oguji a wụru l'igwe, mẹe mgbodo, a tụru l'ope, nke ọwhu l'ii-kwe ndu alị-a gagarịga, mbụ ndu eze ndu Juda, mẹe ndu ishi whẹ, mẹe ndu l'agbajẹ ẹja l'alị-a mẹwaro ndu alị-a l'owhu.

¹⁹ Whẹ l'e-tso ghu ọgu, ọle whẹ ta abyadụ l'a-lwụ-gbu ghu, o noo nkele mu swiru ghu eswiru, tẹhenu mu je l'a-nafụta ghu. O nokwa iwhe Onye-Nwe-Ọha l'ekfu ndono.”