Jémusu 1 - BAYỊBURU Ẹzaa

¹ Ẹkwo-ozhi-a bẹ shi l'ẹka mbẹdua, bụ Jémusu bụ onye ozhi Chileke, bụru onye ozhi Onye-Nwe-Ọha bụ Jisọsu Kuráyisutu. Ndu mu l'ede iya anụ bụ ikfu iri l'ẹbo ono, bụ ndu nke Kuráyisutu, dzuru mgboko. Ekele mu unu-o.

Ekwekwe yẹle mmamagụ

² Ụnwunna mu, nteke iwhe adata byakfutaru unu; g'ọ dụlee, unu wojeru iya l'ọo iwhe ẹswa byarụ unu.

³ Unu makwarụ-a l'ọo nteke l'aadata unu nke ekwekwe, unu kweru bẹ unu l'e-shi nwụta ọtaru iwhe nshi.

⁴ Unu talẹkwawho nshi tafụ iya l'ishi nggẹ unu dụkota ree, dzukwaawho oke; t'ọ bọ dụ iwhe l'a-whọdu l'ẹhu unu.

⁵ Nteke o nweru g'unu ha onye mmamagụ iya whoduru, t'onye ono sụ Chileke t'ọ nụ iya mmamagụ. Ọo-nụ iya onye ono, eshi-ọwhu Chileke bụ o-me-l'uko, tẹmenu l'oogudeje obu iwhoro nụ onyenọnu iwhe onye ọbu sụru t'ọ nụ iya.

⁶ Ọle t'onye ono kwetakwa l'iwhe ono, ya sụru tẹ Chileke nụ iya, bẹ l'ọo-nụ iya. T'onye ono ba abọkwa obu ẹbo; l'onye l'abọ obu ẹbo dụ g'ọo akpara mini eze-ẹnyimu, bụ whẹrewhere l'anọje enwunga iya. O nwungaru iya shia ọwhu, ya enwungaru iya shia ọwhu.

⁷ T'ẹgube onye ono ba arịkwa l'ọ dụ iwhe ya l'a-nata l'ẹka Onye-Nwe-Ọha,

⁸ o noo l'onye ọriri iya gbarụ ẹbo, ta akfụshijedu ike l'iwhe bụ-zhia iwhe l'oome eme.

Ụkpa yẹle onwe iwhe

⁹ Tẹ nwanna, darụ ụkpa tuje onwiya nwoke; lẹ ya bụwaa onye Chileke kuliru.

¹⁰ T'onye ọwhu nweru iwhe tukwaawho onwiya nwoke mẹe Chileke kuze iya. Onye ono l'a-jịshihu g'ọo nzịrizaa ẹswa,

¹¹ o noo l'ọobuje ẹnyanwu wata, o -chishidelewho ike, ẹswa anwụa lwaa, nzịrizaa ya ajịshihu, mma nkiya agvụ. O noo g'onye nweru iwhe l'a-gbabuhukwawho nwụhu l'iwhe l'oome.

Adata yẹle onwu eye

¹² Ẹhu-ụtso bụ nke onye tarụ nshi mẹe iwhe adata byarụ iya; o noo lẹ nteke a datageeru iya ọbu, t'ọ da, bẹ l'aa-nụ iya ndzụ bụ iya bụ obunggo, Chileke sụru lẹ ya l'e-bu ndu yeru iya obu.

¹³ Ọo ya bụ, t'onye l'aadata, ome ejo-iwhe gụlahaa ya, t'ọ bọ sụkwa l'ọo Chileke l'enwu iya eye tẹ ya mee ejo-iwhe ono. O noo l'ọ tọ dụkwa onye Chileke l'enwuje eye t'o mee ejo-iwhe, tọ dụkwanu onye l'enwu Chileke eye t'o mee ejo-iwhe.

¹⁴ Ọo ome ejo-iwhe, l'agụ madzụ bẹ l'edotaje iya, ya adaba l'ejo-iwhe.

¹⁵ Ọo ya bụ, nteke ẹgu ejo-iwhe tsụtaru ime, ya anwụa iwhe-dụ-ẹji, iwhe-dụ-ẹji kalẹwho kpurukutu, ya anwụa anwụhu.

¹⁶ Ụnwunna mu, mu yeru obu, unu be eshiswekwa ụzo.

¹⁷ Iwhe lile, l'aanụje anụ, dụ ree mẹe iwhe-ọma, l'ẹte adụa ẹka ntụpo dụ iya bẹ shikotagezhia l'imigwe. O shikota l'ẹka Nna, mekotaru iwhoro, dụ l'imigwe bụ iya bụ Nna ọwhu l'ete echinyajee echi, ya anyịhu g'ọo ẹnyanwu nke ọwhu l'aa-sụ l'ọ nyịhuakwaru woo ọchi gbalahaa.

¹⁸ Ọ tụru obu iya ama, gude okfu ono, bụ ọkpobe-okfu nwụa anyi, t'anyi nochia ishi l'iwhe lile, o keru eke.

Ọnu iwhe lẹ nchị yẹle ememe iya

¹⁹ Ụnwunna mu, mu yeru obu; lee iwhe unu l'a-malẹwho ndọwa: t'onyenọnu bụru onye l'angabẹje nchị l'iwhe l'eekfu, tẹmenu ya eyede iya ọnu, ya abụru onye ẹhu l'ete eghuje eghu ẹgwegwa.

²⁰ O noo l'iwhe e gude ẹhu-eghughu eme ta abụkwa iwhe dụ chịriri l'iwhu Chileke.

²¹ Ọo ya bụ, t'unu shi ishi lanụ tụfu onwunu iwhe bụ-zhia umere, l'eshi nshi mẹe iwhe bụkota ejo ọrwu, unu vu, unu ejia obu oyi nata okfu ono, a kụwaru l'ime obu unu, g'ọo onye kụru akpụru iwhe. Ọ kwa okfu ono l'a-dụ ike dzọfuta unu.

²² Ọle-a; t'unu bụkwaru ndu l'eme okfu Chileke ono eme, unu ba abụkwa ndu bụlewho anụnu bẹ whẹ l'anụje iya kpụ, l'o noo bụkwa ome onwunu eswe.

²³ L'onye l'anụlewho okfu Chileke anụnu kpụ, to mehe iya eme bẹ dụa g'ọo nwoke, l'ele g'iwhu iya dụ dụ l'onyo, mbụ iwhu shi iya l'ẹwho ne iya.

²⁴ Onye ono letagelewho onwiya l'onyo ono, o bebelee alụfu ọ nyazọlekwawho lẹge iwhu iya dụ dụ.

²⁵ Obenu l'onye l'enyochaje iwu ono, l'ẹte adụa ẹka ntụpo dụ iya, mbụ iwu ono, l'atọje madzụ l'uli; onye ono whuberu iya iwhu, onye ono ta abụ onye l'abụje, ọ -nụ-gee ya, ya anyazọshia ya, ọ bụru onye l'eme iya eme; Chileke l'e-kwobe nke iwhe ono onye ono l'eme, gọru ọnu-ọma nụ iya.

²⁶ Onye l'arị lẹ ya bụ onye nke Chileke, onye ono te esedeje ire iya, onye ono l'emekwa onwiya eswe. Ememe ọwhu onye ọbu l'eme nke Chileke kwa iya whọ nke mmaanụ.

²⁷ Lẹ madzụ bụ onye nke Chileke, bụkwanu iya bụ ọwhu Chileke, bụ Nna anyi kweru l'ọo ọkpobe iya, bụkwaruwho ọwhu l'ete emerwushia emerwushi, bụ anọ akwọ ụnwu nwogbee lẹ mkpa mẹe anọ eyeru ụnwu-mbunu ẹka l'iwhe l'atsụ whẹ l'anụ mẹe osefu ẹka lẹ mkparwụ nke mgboko-o.