Híburu 1 - BAYỊBURU Ẹzaa

Chileke shi l'ọnu Nwa iya kfua okfu

¹ Lẹ nteke ndụ-ichee bẹ Chileke shi l'ọnu ndu nkfuchiru iya, kfuru nụ ndụ-ichee anyi whẹ ugbo olemole l'ụzo dụ-gee l'iche l'iche.

² Ọ bya ebe ntaa bụwaa oge ikpazụ-a, ọ bụru Nwa iya b'o gude kfuru nụ anyi. Ọo Nwa iya ono b'ọ họtaru sụ l'ọo ya bẹ iwhe lile kụru ishi l'ẹka. Ọ bụru l'ẹka iya b'o shi mee mgboko-o g'ọ ha.

³ Nwa ono bẹ l'egbu zaazaa, shi nno egoshi lẹ onolewho gẹ Chileke l'egbu zaazaa ndono, ọ bụleruwho gẹ Chileke dụ bụ g'ọ dụkota kpamụ. Okfu, Nwa iya ono kfuru bẹ ire dụ, dụshia ya ike. Ọ bụru ire ono, dụ l'okfu ono b'o gude sede mgboko l'owhu. Ọ safụ-geeru ndiwhe iwhe-dụ-ẹji, whẹ metagbaberu; o gbashi je anọdu anọdu l'imigwe, l'ẹka-ụtara Chileke bụ iya bụ Onye-Kakọta-Ike.

Nwa ono ka ojozhi-imigwe

⁴ Nwa ono bẹ Chileke meru ọ kakọta ndu ojozhi-imigwe, ọ kwarụwho nno bụ g'ẹwha ono, Chileke gụru iya dangokwaruwho ẹwha nke ndu ojozhi-imigwe.

⁵ Lẹ Chileke ta adụkwa ndu ojozhi-imigwe ono onye ọwhu ọ sụjeru: “Ọo ghu bụ Nwa mụbe Chileke, wata ntanụ-a bẹ mu bụakwaa Nna nwụru ghu nụ.” Tọ hẹkwa l'ọ dụ ojozhi-imigwe, ọ sụjeru: “Mụbe Chileke l'a-bụ Nna ghu, gụ a-bụru Nwa mu.”

⁶ Iwhe ọdo bụkwaruwho lẹ nteke Chileke dutaru Nwa iya ono, bụ ọkpara iya t'ọ bata lẹ mgboko b'ọ sụru: “T'iwhe bụ-zhia ndu ojozhi-imigwe, shi l'ẹka Chileke gẹ whẹ ha bakọtakwaru iya ẹja.”

⁷ A bya abya l'ẹka ndu ojozhi-imigwe nọ, iwhe Chileke kfuru bụru: “Mu meru ndu ojozhi-imigwe mu whẹ dụkota g'ọo whẹrewhere; whẹ bụru ndu ozhi mu, mu meru whẹ dụkota g'ọo ọku l'ere whuruwhuru.”

⁸ A byakwanụ lẹ nke Nwa iya ọbu, Chileke sụ iya: “Mu sụru ghu gụbe Chileke. Ọo g'ị bụ eze ntaa bụ gẹ l'ịi-bụ-zhia ya whọ jeye lẹ tututu-mịmimi. Ii-gude ọdu chịriri achị ẹka, ị bụ eze.

⁹ Iwhe kfụru nhamụnha dụ ghu ree, Iwhe l'akfụaru nhamụnha dụkwa ghu ashị. O noo g'o gude mụbe Chileke ono, bụ Chileke ghu họta ghu kwabẹ ghu ugvu, mee ẹhu l'atsọ ghu ụtso, mbụ ugvu, mẹe ẹhu-ụtso ọwhu kwatarụ ka nke ibe ghu whẹ shii.”

¹⁰ Chileke byakwa eku iya Onye-Nwe-Ọha sụ: “Eshi mbụlembu bẹ bụ gụbe Onye-Nwe-Ọha meru alị, mee iwhe dụ iya nụ. Ọ bụkwaru ghu whọ bẹ gude ẹka ghu mee igwe, mee iwhe lile, dụ l'imigwe.

¹¹ Iwhe lile ono l'ee-bekochaa bụru kpurupyata, ọle gụbedua l'a-dụgburu g'ị dụ, iwhe lile ono l'ee-bekochaa kashịhu g'ọo uwe.

¹² O noo nteke l'ịi-whụta iya awhụta whụfu g'ọo onye whụfuru ukpo. A bya agbanwee ya gẹ l'aagbanweje uwe. Ọle gụbedua bẹ bụlewho onye ị bụ bẹ l'ịi-bụgburu, ị nọwaa gẹ l'ịi-nọ jeye lẹ tututu-mịmimi.”

¹³ Ọ tọ dụkwa ndu ojozhi-imigwe onye ọwhu Chileke sụjeru: “Nọdu mụbe Chileke l'ẹka-ụtara jeye nteke mu l'e-me ndu ọhogu ghu, whẹ abụru ghu iwhe l'ịi-dzọpyabe l'ọkpa.”

¹⁴ Sụa, ?ọo gụnu bẹ ndu ojozhi-imigwe bụ-zhia? Whẹ tụkoru bụkotaru ndụ-ojozhi l'ẹte awhụje l'ẹnya, l'ejekaaru Chileke ozhi, bụkwaruwho ndu, Chileke ono yeru tẹ whẹ bya eyeru ndu yẹbe Chileke l'ee-bekochaa dzọo ẹka.