Ẹsuta 1 - BAYỊBURU Ẹzaa

Vashiti, bụ eze-nwanyị, kwefuru ike

¹ Ọ waa iwhe nwụru nụ nteke Áhazerusu shi bụru eze, l'achị ụkporo obodo ugbo ishii l'obodo ẹsaa, watazhiawho l'alị Indiya jeye l'alị Itiyópiya.

² Nteke ono bẹ eze bụ Áhazerusu shi nọdu l'oshi-eze iya lẹ Susa, bụ ishi alị-eze ono.

³ O rwua awha, kwe iya awha ẹto, ọ watarụ ọbu eze, o shishia nri kua ndu bụ ishi ozhi l'alị-eze iya mẹe ndu ozhi iya tẹ whẹ bya eria ngụa. Ndu ishi ndu ojọgu ndu Peshiya mẹe nke ndu Midiya mẹe ndu a marụ ẹwha whẹ mẹe ndu ọchi-ọha obodo, dụ l'iche l'iche, l'ọochi tsoru bya lẹ nri ono.

⁴ O meru oriri ono ụkporo abalị ugbo tete kperegedemu. O gude nteke ono goshi gẹ ya bụ-be eze, nwenukaru iwhe mẹe gẹ ya bụ-be oke-madzụ bụru onye dụ biribiri.

⁵ A nọ-gelewho abalị olemole ono, o meru oriri ono, eze byakwa eshishia nri ọdo; kua ndu bu lẹ mkpụkpu Susa, bụ ishi alị-eze iya ono tẹ whẹ bya eria ngụa, ndu ukfu lẹ ndu nta. Whẹ nọo lẹ nri ono abalị ẹsaa. Ẹka whẹ nọdu mee oriri ono bụ ẹka dụ g'ọo ọma-ogboduwhu l'ime mgbabu ibe-eze.

⁶ Iwhe e gude memashia ẹka ono bụ ẹkwa ọcha mẹe ẹkwa, dụ urwukpu-urwukpu, e yegeeru oghu ọcha mẹe nke urwukpu urwukpu l'ishishi iya. Oghu ono b'e liberu l'échì mkpọla-ọcha, a kụpyaberu l'itso, e meru l'ogbu-ngerengere ẹwhuru, a kpọbe-geeru l'ẹka ono. E gude ẹwhuru, l'erekaa ire mẹe ẹwhuru, l'egbukaa ngerengere chia ọma alị ẹka ono; doo ya iwhe-azẹe, e meru lẹ mkpọla-ododo mẹe lẹ mkpọla-ọcha.

⁷ Ụpyi, e gude gbaarụ whẹ mmẹe bụ ụpyi, e meru lẹ mkpọla-ọcha, tẹmenu whẹ gbagee iche iche. Mmẹe ndu eze l'angụje sụwhaa l'ẹka ono nkele eze bẹ sarụ ẹka ọkpobe asasa mee oriri ono.

⁸ A ta atụdu iwu l'ọwa gẹ bụ madzụ ngụta-be mmẹe ono ya akfụshi. Eze sụhawaru ndu ozhi iya tẹ whẹ nụje onyenọnu iwhe gụru iya nụ.

⁹ Nteke ono bẹ Vashiti, bụ eze-nwanyị shishikwaruwho nri, kua ụnwanyi tẹ whẹ bya eria ngụa l'ibe eze Áhazerusu.

¹⁰ O be mbọku nke ẹsaa; eze bụ Áhazerusu ngụta mmẹe, ẹmereme ji iya ẹhu. O zhia ụmadzu ẹsaa, a hárụ aháhá, bụ ndu l'ejeru iya ozhi, ẹwha whẹ bụ Mehumanu mẹe Byizuta mẹe Habona mẹe Byiguta mẹe Abagụta mẹe Zeta mẹe Kakasu,

¹¹ sụ tẹ whẹ je ekuaru iya eze-nwanyị, bụ Vashiti t'o kpuru okpu eze-nwanyị iya byakfuta yẹbe eze. Eze-nwanyị ono bẹ dụ ugvu l'ẹnya. Eze l'eme tẹ ya goshi ndu ẹbyii ya mẹe ndu bụ ishi l'alị-eze iya lẹge eze-nwanyị l'amabe ụma.

¹² Ndu ozhi ono je ezhia eze-nwanyị ono, bụ Vashiti iwhe eze zhiru iya, ọ jịka lẹ ya tee ejedu. Tọ dụ iya bụ, ẹhu ghulahaa eze eghu; ọ vọru ọku ghụa ẹhu.

¹³ O noo ya, iwhe bụ nsọ eze bụ lẹ tẹmenu ya emede iwhe ọ chọru ememe bẹ l'ọokpatajeeda ishi l'ẹka ndu iwu-alị mẹe ndu ikpe, kfụru nhamụnha doru ẹnya. Ọo ya bụ, eze bya ejekfushia ndu mmamagụ idzu, bụ iya bụ ndu marụ iwhe gbarụ l'ememe,

¹⁴ bụru ndu l'akajẹ iya ọno ntse. Ndu ọbu, o jekfuru idzu bụ Kashena mẹe Sheta mẹe Adụmata mẹe Tashishi mẹe Merẹsu mẹe Masena mẹe Memukanu. Ụmadzu ẹsaa ono bụ ndu ishi alị Peshiya mẹe alị Midiya; whẹ bụru ndu ẹka whẹ l'erwu eze l'ẹhu, tẹmenu ọ bụru whẹ bẹ ọkwa whẹ kagezhia shii l'alị-eze ono l'owhu.

¹⁵ Eze jịa whẹ sụ: “E lee ẹnya lẹ gẹ iwu-alị gbarụ, ?ọo gụnu bẹ l'ee-me Vashiti, bụ eze-nwanyị? Nkele ọ jịkaru ome iwhe mụbe eze bụ Áhazerusu zhiru ndu ozhi mu tẹ whẹ je ezhia ya.”

¹⁶ Tọ dụ iya bụ, Memukanu nọdu l'iwhu eze yẹle iwhu ndu ishi ono yee ọnu sụ: “Ọ tọ bụlekwaa eze kpụ bẹ Vashiti, bụ eze-nwanyị mesweru. O meswekotaru iwhe bụ ndu ishi mẹe ndu bukota l'obodo, dụ l'alị-eze Áhazerusu.

¹⁷ O noo nkele agwa ono Vashiti, bụ eze-nwanyị kparụ bẹ ụnwanyi l'a-wọkwa ẹka, e shi nno ji whẹ adụlahaa whẹ nde l'ẹnya, whẹ ekfulahaa l'eze, bụ Áhazerusu bẹ zhiru t'e je kuaru iya Vashiti, bụ eze-nwanyị ọ jịka lẹ ya te ejedu.

¹⁸ Sụa, ntanụ ọwa bẹ unyomu ndu ishi ndu Peshiya mẹe ndu nke Midiya, bụ ndu nụru ẹgube umere ono, eze-nwanyị meru l'a-wata ọsa-kwoshiru ji whẹ okfu. E shi nno ji whẹ adụ whẹ nde l'ẹnya, ẹhu eghulahaa ji whẹ eghu l'ẹka unyomu whẹ nọ.

¹⁹ Ọ -bụru l'ọ dụ gụbe eze ree, tụnua iwu sụ Vashiti, bụ eze-nwanyị t'ọ bọ fụtahe afụta ọdo l'iwhu gụbe eze Áhazerusu. E dee ya ede l'ẹkwo-iwu ndu Peshiya mẹe ndu Midiya, nke ọwhu l'ẹte agbanwe iya agbanwe. Gụbe eze eworu ọkwa eze-nwanyị ono, ọ bụ nụ nwanyị ọdo, ka iya ree.

²⁰ Nteke iwu ono, gụbe eze l'a-tụ l'e-jegba alị-eze ghu l'owhu, bụ alị-eze, parụ ẹka bẹ ụnwanyi l'a-wata ọkwabe ji whẹ ugvu mẹe ndu ha shii mẹe ndu ha nwanshị.”

²¹ Idzu ono, Memukanu wofutaru dụ eze ree yẹle ndu ishi iya. Ọo ya bụ, eze mee lẹ g'o kfuru.

²² Eze bya edee ẹkwo-ozhi kekotagezhia l'iwhe bụ obodo, dụ l'alị-eze iya. Obodo nọnu b'o deru nkewhe l'ụzo, whẹ l'edeje ẹkwo, bya egude okfu alị ndu nọnu deeru whẹ iya. Ẹkwo-ozhi ono b'o deru sụ tẹ nwoke nọnu bụru ishi l'ibe iya; ya asajẹ okfu asa.