Émọsu 1 - BAYỊBURU Ẹzaa

¹ Ọ waa iwhe Émọsu kfuru ndọwa. Émọsu bụ onye lanụ l'ime ndu l'eche atụru. Ẹka o shi bụ mkpụkpu Tekowa. Ọ waa bụ iwhe ọ whụru l'ọwhulenya l'okfu ẹhu ndu Ízurẹlu. Nteke ọ whụru ọwhulenya ono bụ, nteke Uzáya bụ eze, l'achị ndu Juda, Jerobowamu nwa Jowashi bụru eze, l'achị ndu Ízurẹlu. Ọ whụru ọwhulenya ono nọodaa awha labọ tẹmenu o rwude nteke ono alị nmajẹru jijiji.

Ikpe, l'ee-kpe mba gẹ mba ha bukube alị Ízurẹlu

² Émọsu l'ekfu sụ: “Onye-Nwe-Ọha nọokwaa l'ugvu Záyọnu abọ ekiri ọ nọokwaa lẹ Jerúsalẹmu ede kiriri. Ẹka ndu l'eche atụru l'echeje atụru whẹ bẹ kpọshihuakwaru nkụ. Elikoro ugvu Kamẹlu kpọshihuwaa nkụ tụlwahu.”

³ Ọ waa iwhe Onye-Nwe-Ọha l'ekfu ndọwa: “Ndu Damásukọsu l'anọje eme iwhe-dụ-ẹji mmekwase. Eshi-ọwhu ọ dụ nno bẹ mu l'ẹte ahakwa tẹ mu ba anụ whẹ áwhụ. Ndu Giledu bẹ whẹ l'echije kwalwumu kwalwumu g'ọo onye gude mgbọro-igwe echishi ẹswa lẹ balị.

⁴ Ọo ya bụ lẹ mu l'a-nwụru ọku ye l'ụlo eze Hazẹlu, ya adzụkota agbarara, eze Benu-hadadu tụru.

⁵ Mu l'e-nwutsu mgbo-igwe ono e yeru l'ọnu mkpụkpu Damásukọsu. Mu egbushia ndu bu lẹ nsụda Avenu gbua onye eze, l'achị mkpụkpu Betu-edẹnu. A kpụa ndu Arámu lẹ ndzụ lashia alị Kiru.” O nokwa iwhe Onye-Nwe-Ọha l'ekfu ndono.

⁶ Ọ waa iwhe Onye-Nwe-Ọha l'ekfu ndọwa: “Ndu Gaza l'anọje eme iwhe-dụ-ẹji mmekwase. Eshi-ọwhu ọ dụ nno bẹ mu l'ẹte ahakwa tẹ mu ba anụ whẹ áwhụ. Mba owhu bẹ whẹ kpụru lẹ ndzụ woru whẹ ye l'ẹka ndu Edọmu.

⁷ Ọo ya bụ lẹ mu l'a-nwụru ọku ye lẹ mgbodo Gaza, ya adzụkota agbarara, dụ iya nụ.

⁸ Mu l'e-gbushikota ndu bu lẹ mkpụkpu Ashịdodu, gbua onye eze, l'achị mkpụkpu Ashikelọnu. Ndu Ẹkuronu bẹ mu l'a-ngụfu ẹka dabẹ l'ẹhu shi nno mee tẹ ndu whuduru lẹ Fílistiya bụru kpurupyata.” O nokwa iwhe Nnajị-Ọha bụ Onye-Nwe-Ọha l'ekfu ndono.

⁹ Ọ waa iwhe Onye-Nwe-Ọha l'ekfu ndọwa: “Ndu Taya l'anọje eme iwhe-dụ-ẹji mmekwase. Eshi-ọwhu ọ dụ nno bẹ mu l'ẹte ahakwa tẹ mu ba anụ whẹ áwhụ. Mba owhu bẹ whẹ kpụru lẹ ndzụ woru whẹ ye l'ẹka ndu Edọmu, shi nno mebyia ọgbandzu ọtugba bụru nwune ono, whẹ lẹ mba ono gbarụ.

¹⁰ Ọo ya bụ lẹ mu l'a-nwụru ọku ye lẹ mgbodo Taya, ya adzụkota agbarara, dụ iya nụ.”

¹¹ Ọ waa iwhe Onye-Nwe-Ọha l'ekfu ndọwa: “Ndu Edọmu l'anọje eme iwhe-dụ-ẹji mmekwase. Eshi-ọwhu ọ dụ nno bẹ mu l'ẹte ta ahakwa tẹ mu ba anụ whẹ áwhụ. Edọmu bẹ gude ogu-ịgba chịa nwune iya ọso, imiko iya ta adụ iya ilile. Ntekenteke bẹ ẹhu l'anọje eghu iya damụdamu l'ẹka nwune iya nọ, tẹmenu obu-ọku nkiya bụru gbururu jeye lẹ gbururu.

¹² Ọo ya bụ lẹ mu l'a-nwụru ọku ye lẹ mkpụkpu Temanu, ya adzụkota agbarara, dụ lẹ mkpụkpu Bozura.”

¹³ Ọ waa iwhe Onye-Nwe-Ọha l'ekfu ndọwa: “Ndu Amọnu l'anọje eme iwhe-dụ-ẹji mmekwase. Eshi-ọwhu ọ dụ nno bẹ mu l'ẹte ahakwa tẹ mu ba anụ whẹ áwhụ. Ụnwanyi, dụ ime l'alị Giledu bẹ whẹ bọ-fushiru ẹwho, l'ẹka whẹ l'eme t'oge alị nkewhe kabaa ọsa.

¹⁴ Ọo ya bụ lẹ mu l'a-nwụru ọku ye lẹ mgbodo mkpụkpu Raba, ya adzụkota agbarara, dụ iya nụ. O noo nteke mkpu ọgu l'a-swọtabe, ọgu awhụhu ẹwhu g'ọo ẹka oke whẹrewhere l'ewhe.

¹⁵ A kpụa onye eze whẹ yẹle ndu bụ ishi l'alị-eze whẹ lẹ ndzụ lashia alị ọdo.” O nokwa iwhe Onye-Nwe-Ọha l'ekfu ndono.