Ditoronomi 1 - BAYỊBURU Ẹzaa

A tụru iwu tẹ ndu Ízurẹlu lụfu l'ugvu Horẹbu

¹ Ọ waa bụ okfu, Mósisu kfuru nụ ndu Ízurẹlu l'owhu. O kfuru whẹ iya l'echi-ẹgu ụzo ẹnyanwu-awata ẹnyimu Jọ́danu. Nteke ono bẹ whẹ kpọbekwaduru ụlo-ẹkwa ebubu whẹ lẹ nsụda Araba, chebe iwhu l'ụzo Sufu. Ẹka ono bẹ nọ lẹ mgbakụ Paranu mẹe Tofẹlu mẹe Lebanu mẹe Hazerotu mẹe Dizahabu.

² Ọo abalị iri lẹ nnanụ bẹ l'eejeje ije wata l'ugvu Horẹbu rwua Kádẹshi Baneya mẹ e shia l'ụzo ugvu Siye.

³ O bụru g'ọnwa iri lẹ nnanụ dụ l'abalị mbụ l'awha kwe whẹ ụkporo awha ugbo labọ bẹ Mósisu kfuru ndu Ízurẹlu iwhe lile Onye-Nwe-Ọha tụru iya l'iwu t'o kfuaru whẹ.

⁴ Nteke ono b'ọ lwụ-gbuwaru Sáyihọnu, bụ eze ndu Amọru, shi buru lẹ Hẹshibonu achị, nọdukwawho lẹ mkpụkpu Edereyi lwụ-gbua Ọgu, bụ eze ndu Báshanu, shi buru lẹ Ashịtarotu achị.

⁵ Ọ bụru l'ụzo ẹnyanwu-awata Jọ́danu l'alị ndu Moabu l'ẹka ono bẹ Mósisu nọdu kọwashiaru whẹ iwu ono sụ:

⁶ Onye-Nwe-Ọha, bụ Chileke anyi bẹ kfuru anyi okfu l'ugvu Horẹbu sụ: “Unu nọnukaakwaru ọdu l'ugvu-a.

⁷ Unu whọshia ụlo-ẹkwa ebubu unu tụgburu jeshia alị ugvu ugvu ndu Amọru mẹe alị ndu ono, bukubegee whẹ nụ lẹ nsụda Araba mẹe alị ugvu ugvu mẹe ọkpa-ugvu, dụ l'ụzo ẹnyanwu-arịba mẹe ụzo echi-ẹgu ọhuda mẹe agụga eze-ẹnyimu, unu jeshia alị ndu Kenanu mẹe ugvu ugvu Libanọnu je akpaa l'oke ẹnyimu ono, bụ ẹnyimu Yufurétisu.

⁸ Lekwaa, mu wookwaru alị ono gbungobe unu l'iwhu. Unu bahụ l'alị ono je anata iya t'ọ bụru nkunu, mbụ alị ono, Onye-Nwe-Ọha riburu lẹ nte lẹ ya l'a-nụ nna unu whẹ, bụ Ébirihamu mẹe Áyiziku mẹe Jékọpu yẹle ẹpa whẹ, bụ ndu l'etso whẹ l'azụ.”

Mósisu l'ahọta ndu ikpe

⁹ Ọo nteke ono bẹ mu sụru unu: “Mu ta adụkwa ike evukota ivu-ẹhu unu nwẹka mu.

¹⁰ Onye-Nwe-Ọha, bụ Chileke unu meekwaru unu kabaa l'igwe, mbụ lẹ ntaa bẹ unu hawaa g'ọo kpokponde, dụ l'igweli.

¹¹ Mu l'ekfukwawho tẹ Onye-Nwe-Ọha, bụ Chileke nke nna unu whẹ mebakwaa t'unu kabaa l'igwe ugbo ụkporo l'ụnu amamẹ g'unu ha ntaa, ya agọkwaruwho ọnu-ọma nụ unu ẹgube ono, o kweru unu ụkwa iya.

¹² Ọle ọbu, ?ndẹ-zhia gẹ mu l'e-me dụ ike vukota ivu-ẹhu unu nwẹkinyi mu bụ iya bụ mkpa-ẹhu unu, mu edoshikwaruwho unu okfu?

¹³ Unu shikwa l'ikfu l'ikfu unu họta-gee ndu marụ mmamagụ mẹe ndu iwhe l'edoje ẹnya mẹe ndu a marụ ẹwha whẹ; tẹ mu mee whẹ tẹ whẹ bụru ndu ishi unu.”

¹⁴ Ọnu, unu yeru mu bụ l'iwhe mu kfuru bẹ dụ ree, l'unu l'e-me iya.

¹⁵ Ọ kwa iya bụ, mu bya ewofutakota ndu bụ ishi l'ikfu l'ikfu unu, mbụ ndu marụ mmamagụ mẹe ndu a marụ ẹwha whẹ dobe whẹ tẹ whẹ bụru ndu ishi unu. O nweru ndu ọwhu mu meru whẹ bụru ndu ishi, l'achị ụnu madzụ ugbo labọ l'ụkporo ugbo iri, o nweru ndu l'achị ụkporo madzụ ugbo ise; o nweru ndu l'achị ụkporo madzụ ugbo labọ l'ụmadzu iri; ndu l'achị madzụ iri, tẹmenu whẹ bụkwaruwho ndu ishi, l'achị ikfu g'ikfu ha.

¹⁶ Mu tụaru ndu ikpe unu iwu nteke ono sụ whẹ: Unu ngabẹjekwa nchị nụa okfu, l'adarụ unwune unu whẹ. Unu edoshiaru whẹ okfu ọbu l'ụzo kfụru nhamụnha, mbụ okfu, l'adarụ onye Ízurẹlu yẹle onye Ízurẹlu ibe iya m'ọ bụ onye Ízurẹlu yẹle nlwamụnlwa, bu l'echilabọ whẹ.

¹⁷ Unu be ekpejekwa ikpe lee madzụ ẹnya l'iwhu. Unu ngabẹjekwa nchị nụa okfu l'adarụ madzụ l'ibe iya m'ọ bụ onye nta m'ọ bụ onye ukfu bẹ l'ọodaru. Unu ba atsụjekwa madzụ egvu nkele onye nwe ikpe bụkwa Chileke. Okfu, kariru unu ẹka, t'unu pakfutaje mu iya tẹ mu nụa.

¹⁸ Tẹmenu mu tụkokwawho iwhe lile, unu l'e-meje kfukotaru unu nteke ono.

Eezhifu ndu ngge

¹⁹ O noo ya, ọ bụru gẹ Onye-Nwe-Ọha, bụ Chileke anyi kfuru iya anyi bụ g'anyi meru iya, bya atụgbua l'ugvu Horẹbu shia ụzo echi-ẹgu ono, parụ ẹka dụ egvu, mbụ ẹka ono unu whụru l'ụzo, e shi eje alị ugvu ugvu ndu Amọru, anyi jezhiawho jeye anyi fụta lẹ Kádẹshi Baneya.

²⁰ Mu kfuru unu sụ: “Ntaa bẹ unu rwuakwaru alị ugvu ugvu ndu Amọru, bụ alị, Onye-Nwe-Ọha, bụ Chileke anyi l'eme t'ọ nụ anyi.

²¹ Unu lekwa lẹ Onye-Nwe-Ọha, bụ Chileke unu nụakwaru unu alị ono. Unu bahụkwa l'alị ono je anata iya lẹge Onye-Nwe-Ọha, bụ Chileke nke nna unu whẹ kfuru unu. Unu ba atsụkwa egvu, mbụ t'obu be etekwa unu ete.”

²² Tọ dụ iya bụ l'unu atụko wụ-kfuta mu bya asụ mu: “T'anyi zhia ndu l'e-vuru ụzo je egeeru anyi ngge l'alị ono, nke ọwhu whẹ l'a-bya akarụ anyi ụzo ẹka anyi l'e-shi mẹe mkpụkpu, anyi l'e-shigbabe.”

²³ Okfu ono, unu kfuru dụ mu ree shii, ọo ya bụ, mu wofuta ụmadzu iri l'ẹbo, onye lanụ l'ikfu g'ikfu ha.

²⁴ Whẹ tụgbua jeshia alị ugvu ugvu ono, byarwuta nsụda Ẹshukolu, je egegbakota alị ono ngge.

²⁵ Whẹ harụ iwhe shi l'alị ono gude wolataru anyi sụ anyi: “Alị ọbu Onye-Nwe-Ọha, bụ Chileke anyi l'eme tẹ ya nụ anyi bụkwa alị, dụ ree.”

Ndu Ízurẹlu l'ekwefuru Onye-Nwe-Ọha ike

²⁶ Obenu l'unu jịkaru l'unu te ejedu, unu kwefu ike l'unu te emedu iwhe Onye-Nwe-Ọha, bụ Chileke anyi sụru t'unu mee.

²⁷ Unu nọdu l'ụlo-ẹkwa unu agụshi áwhụ asụje: “Ọo lẹ Onye-Nwe-Ọha kpọru anyi ashị bẹ meru iwhe o dufutaru anyi l'alị ndu Íjiputu tẹ ya woru anyi ye ndu Amọru l'ẹka tẹ whẹ gbushia anyi.

²⁸ ?Ọo awe bẹ anyi cheberu ntaa, g'ụnwunna anyi mewaru meji tọfu anyi? Whẹ l'ekfu sụ: ‘Ndu bu l'alị ono bẹ ka anyi ọkpehu, kagee anyi ogologo, tẹmenu mkpụkpu whẹ bụ-geeru oke mkpụkpu, mgbodo iya l'etsu l'igweli. Ọ-ka njọ bụ l'anyi whụru ndu shi l'eri Anaku l'ẹka ono.’ ”

²⁹ Mu sụ unu: “Unu ba anmashi jijiji. T'egvu whẹ ba atsụshi unu.

³⁰ Lẹ Onye-Nwe-Ọha, bụ Chileke unu ono, vutaru unu ụzo bẹ l'a-lwụ-chitaru-a unu ọgu, ẹgube ono o meru iya unu l'alị ndu Íjiputu, unu gude ẹnya unu whụ iya.

³¹ O meru iya unu l'echi-ẹgu, unu whụ gẹ Onye-Nwe-Ọha, bụ Chileke unu kutaru unu heru gẹ nna l'eheje nwa iya; o hee unu, unu jekota g'unu jeru jeye unu rwua ẹka-a.”

³² Ọle okfu ono te emedu unu t'unu kweta nke Onye-Nwe-Ọha, bụ Chileke unu;

³³ onye ono, bụ iya vutaru unu ụzo l'ije unu, eleru unu ẹnya ẹka unu l'a-kpọbe ụlo-ẹkwa ebubu unu. L'ẹnyashi bẹ l'oogudeje ọku egoshi unu ụzo unu l'e-shi, l'eswe bẹ l'oogudeje urwukpu edu unu.

Onye-Nwe-Ọha l'anụ ndu Ízurẹlu awhụ

³⁴ Onye-Nwe-Ọha bya anụa okfu unu kfuru, ẹhu ghua ya eghu, o ribua nte sụ:

³⁵ “Ọ tọ dụkwa m'ọo onye lanụ l'ime ọgbo ndu ejo-obu-a, bya l'e-gude ẹnya iya whụ ẹguru alị ono, mu riburu lẹ nte sụ lẹ mu l'a-nụ nna unu whẹ,

³⁶ gbahaa Kálẹbu nwa Jefune. Yẹbedua l'a-whụ iya, iwhe bụ-zhia ẹka ọ dzọru ọkpa l'alị ono bẹ mu l'a-nụ iya yẹle ụnwu iya. O noo nkele o gude obu iya g'ọ ha etso ụzo nke Onye-Nwe-Ọha.”

³⁷ Ọ kwawhọ l'okfu ẹhu unu bẹ ẹhu ghulaharu Onye-Nwe-Ọha eghu l'ẹka mu nọ. O kfua lẹ mbẹdua l'ishi onwomu ta abahụkwa iya whọ.

³⁸ Sụ l'ọo onye ono, l'eyejeru mu ẹka, bụ Jóshuwa nwa Nunu bẹ l'a-bahụ iya. Sụ: “Mekwaa t'obu shihu iya ike nkele ọo ya l'e-duru ndu Ízurẹlu tẹ whẹ je anata ẹka ono t'ọ bụru nkewhe.

³⁹ A bya lẹ ndu ọwhu ha nwanshị l'ime unu, bụ ndu unu sụru l'aa-kpụ lẹ ndzụ, whẹbedua l'a-bahụ l'alị ono. Mu anụ whẹ iya t'ọ bụru oke-iwhe whẹ, mbụ ụnwegirima unu ono, l'ẹte adụa iwhe whẹ mawarụ, whẹ ta amadụ iwhe dụ ree, whẹ ta ama iwhe dụ ẹji.

⁴⁰ T'unubẹdua l'onwunu ghachikwa shia ụzo echi-ẹgu ono, e shi eje Eze-ẹnyimu Uswe-uswe.”

⁴¹ Tọ dụ iya bụ l'unu eyeeru mu ọnu sụ: “Anyi mekwaru iwhe-dụ-ẹji l'ẹka Onye-Nwe-Ọha nọ. Anyi l'e-jewaro alwụa ọgu ọbu, ẹgube Onye-Nwe-Ọha, bụ Chileke anyi sụru t'anyi mee.” Ọo ya bụ, unu tụko g'unu ha kwakọbe nke ooje ọgu, rịa l'ọbahu l'alị ugvu ugvu ono bụ iwhe dụa ntse.

⁴² Onye-Nwe-Ọha sụ mu: “Kakwarụ whẹ tẹ whẹ be ejekwa abahụ, mbụ tẹ whẹ be ejekwa ọlwu ọgu, lẹ mu ta anọkwa swiru whẹ. Ọdua bẹ ndu ọhogu whẹ l'a-lwụ-gbukwa whẹ.”

⁴³ Mu kfuaru iya unu, unu ta angarụ mu rọo nchị, unu kwefu ike l'iwhe Onye-Nwe-Ọha sụru t'unu mee, gude ekuku l'eku onwunu jeshia l'alị ugvu ugvu ono.

⁴⁴ Ndu Amọru, bu l'alị ugvu ugvu ono wụfuta tsokfuru unu ọgu. Whẹ ripyabe unu g'ọo ẹnwu, l'agba agba, shi lẹ Siye chịa unu ọso egbushi unu jeye lẹ Họruma.

⁴⁵ Unu lwawhu azụ bya aryaaru Onye-Nwe-Ọha ẹkwa, Onye-Nwe-Ọha te eyeru unu ọnu, tọ ngarụ unu nchị.

⁴⁶ Ọ bụru iwhe ono meru, unu nọo ọdu lẹ Kádẹshi.