3 Jọnu 1 - BAYỊBURU Ẹzaa

¹ Ẹkwo-ozhi-a bẹ shi l'ẹka mbẹdua, bụ onye e meru ọgurenya chọchi. Onye mu l'ede iya anụ bụ onye ono, mu yeru obu, bụ Gáyosu. Gáyosu bụ onye mu yeru obu nkele ọo lẹ mu l'iya bẹ tụkowaru marụ ọkpobe-okfu ono.

² Sụa, ọnya mu, dụ mu l'obu; iwhe mu l'anọje ekfuzhiawho anụ Chileke bụ t'o mekwaa t'iwhe dụru ghu lẹ ree, ya emekwaawho t'ọ bụru ẹhu-ba-dụ-mma nwekịya bụ iwhe ụko iya l'a-dụru ghu, mbụ gẹ mu maanarụ-a l'ọkpobe ndzụ ghu ono, dụ ghu l'obu ono bẹ ẹhu dụkwawho mma.

³ O nwekwaru ụnwunna harụ bya akọoru mu l'ị kfụshikwaduru-a ike l'ọkpobe-okfu ono, whẹ kọkwaaru mu whọ lẹ ndzụ ghu l'owhu bụkotalewho ndzụ ire-lanụ. Ẹhu tsọlahaa mu ụtso.

⁴ O to nwekwa iwhe ọdo, l'akabajẹe ome t'ẹhu tsọo mu ụtso, t'a gụfulewho lẹ mu nụru lẹ ndzụ ụnwu mu bụkotalewho ndzụ ire-lanụ.

Aaja Gáyosu ajaja

⁵ Ọnya mu, dụ mu l'obu; iigoshikwa l'ị bụ onye gbarụ t'e gude ire ghu ẹka l'iwhe bụ iwhe l'i meru ụnwunna anyi, mbụkwa je akpaa l'ụnwunna, byarụ abya.

⁶ Whẹ kọokwaru chọchi-a lẹge l'iigudeje yebe ndu ọdo obu. Byiko yekwaru whẹ ẹka mẹ whẹ palihude ije whẹ. Tọ bụlekwaruwho iwhe larụ Chileke l'ẹhu bẹ l'iimejeru whẹ.

⁷ L'eshi nkeshi whẹ kwoberu iswi ẹhu Kuráyisutu gbashi ije tẹke adụkwa iwhe whẹ kweru nata l'ẹka ndu l'ẹte abụa ndu nke Kuráyisutu.

⁸ Ọ kwa iya bụ l'ẹgube ndu ono b'o rwubekwaru nke t'anyi yejeru ẹka nggẹ ọ bụkwanuru iya bụ l'anyi lẹ whẹ atụko gba mgba l'oje ozhi nke ọkpobe-okfu ono.

Dayótirifisu mẹe Dimítiriyọsu

⁹ Mu deru nwẹkwo-ozhi nụ chọchi, Dayótirifisu ono, bụ onye woru onwiya dobe l'ishi chọchi te eye ọnu yeru mu.

¹⁰ Ọo ya bụ lẹ nteke mu l'a-byalẹwho bẹ mu l'a-kọshigezhiaru unu iwhe l'oomegbabe bụ iya bụ mkpọkoro okfu, l'anọje afụshi iya l'ọnu, l'oogudeje adzụshi ejire atukobe anyi. O noo te eji iya ẹwho. Ọ bya ọdo, ọ jịka tẹ ụnwunna ba abyashị tẹ whẹ lẹ ndu chọchi jịa; ọ kpọshikwaawho ndu ọwhu l'oowhe uwhere tẹ whẹ lẹ ndu ono jịa tẹ whẹ lẹ whẹ ba jịkwa, l'ọobofu whẹ abọfu lẹ chọchi.

¹¹ Ọnya mu, dụ mu l'obu, ba anatakwa ẹka ejo-iwhe, natachikwaa ẹka iwhe dụ ree. Ọ kwa onye l'eme ree bụ onye Chileke nwụru, onye yeru ẹka l'ome ejo-iwhe tẹke awhụbukwaa Chileke.

¹² Dimítiriyọsu bẹ madzụ lile tụ-dzukotakwaru ọnu ree nkiya, tẹmenu ọkpobe-okfu ono l'onwiya l'atụkwawho ọnu ree nkiya ono, mbẹdua l'onwomu l'aja iya ajaja. Unu marụ-a l'ajaja ono, anyi l'aja iya bụ ọkpobe iya.

Ekele mkpochi-ishi

¹³ Mu nwekwaru-a igweligwe iwhe mu gege ederu ghu, ọle ọ tọ bụdu mkpara-ẹkwo yẹle mini-ẹkwo bẹ mu l'e-gude dekotaru ghu iya.

¹⁴ Mu l'arịkwa lẹ mu ta anọhedu ọdu ntaa mu akpakfuta ghu, anyi edzugbawaro idzu iwhu l'iwhu.

¹⁵ Buru guu-o! Ndu ọnya ghu whẹ l'a-jịkwa ghu rọo ya. Kelegbagezhiaru anyi ndu ọnya anyi whẹ l'ẹhu l'ẹhu.