2 Tímoti 1 - BAYỊBURU Ẹzaa

¹ Ẹkwo-ozhi-a bẹ shi l'ẹka mbẹdua, bụ Pọlu; mbụ mụbe onye Chileke kuru mee mu tẹ mu bụru onye-ishi-ozhi Kuráyisutu Jisọsu. Ọo Chileke ono bẹ zhiru mu sụ tẹ mu je ekfuru ndiwhe nke ọkpobe ndzụ ono, o kweru ụkwa lẹ ya l'e-shi l'ẹka Kuráyisutu Jisọsu nụ anyi.

² Onye mu l'ede iya anụ bụ gụbe Tímoti, bụ ẹguru nwa mu ono mu yeru obu. Tẹ Chileke, bụ Nna mẹe Onye-nwe-anyi Kuráyisutu Jisọsu meeru ghu eze-iwhe-ọma; mekwaaru ghu who obu imiko; mekwaawho t'i buru guu.

Pọlu l'ekele Chileke; adụkwawho Tímoti obu

³ Mu l'etu Chileke ẹwha, mbụ onye ono, mu gude obu mu g'ọ ha ejeru ozhi; lẹge nna mu ochee whẹ jeru iye ya; obu mu ta ata mu ụta. Iwhe bụ-zhia nteke bụ nteke mu l'ekfu anụ Chileke, mbụ eswe mẹe ẹnyashi bẹ mu l'anyatajẹ tua ya ẹwha l'okfu ẹhu ghu.

⁴ Tímoti; mu nyatakwarụ-a ẹnya-mini ono, ghakahụru ghu l'ẹnya. Ọ bụru iwhe ono megeeru eghoro ghu l'egbu mu egbu. Mbụ-a; l'ọogu mu; agụshi mu ike tẹ mu lẹ ghu kpọgba iwhu ọdo nke ọwhu ẹswa l'e-ji mu obu.

⁵ Mu l'anyatajẹkwaa ọkpobe ekwekwe ono, i kweru nke Onye-Nwe-Ọha. Ekwekwe ono bẹ ne ghu oche Lóyisu mẹe ne ghu Yunáyisu vuhaada ghu ro ụzo kwetadaa; o dokwaa mu whọ ẹnya l'o nokwawho gẹ gụbedua kwetaru.

⁶ O noo iwhe mu kwoberu anyataru ghu iya sụ ghu; t'i mekwaa iwhe-ọma ono t'o meje ire, mbụ iwhe-ọma ono, Chileke shi l'ẹka ono, mu byabẹru ghu l'ishi nụ ghu nteke ono, mu kfuru nụ Chileke l'iswi ẹhu ghu.

⁷ O noo lẹ Ume-Dụ-Nsọ ọwhu Chileke nụru anyi ta abụdu Ume l'emeje anyi t'anyi tsụje egvu. Ume-Dụ-Nsọ, ọ nụru anyi bụ ọwhu l'anụje anyi ike; bụkwaruwho Ume n-yemobu, bụkwaruwho Ume l'emekotaje t'anyi dụ ike sedekotaje onwanyị.

⁸ Ọo ya bụ t'ị bị sọjekwa ẹnya nke ookfuru ndiwhe l'ị bụ onye nke Onye-nwe-anyi ono. Iwhere ẹhu mbẹdua ta adụjehunu ghu, mbụ mbẹdua ọwa, a tụru mkpọro l'okfu ẹhu Onye-nwe-anyi ono. Iwhe l'ii-mechia bụ t'i jee oke iwhe-ọtsulanu nke ghu l'iwhe-ọtsulanu ono, anyi l'eje l'iswi ẹhu ozhi-ọma ono. Chileke bẹ l'e-mekwaa t'ike ejeje iya dụ ghu.

⁹ Ọo Chileke ono bẹ bụ onye dzọru anyi; kua anyi sụ t'anyi bya abụru ndu nkiya. Iwhe o kwoberu dzọfuta anyi ono ta abụkwa l'ọo nke iwhe-ọma, anyi metaru l'onwanyi. Iwhe meru o mee ya lẹkwawho l'ọ bụhawaro iwhe ọ tụbehawaru l'o noo gẹ ya l'e-me iya. O noo bụleruwho eze-iwhe-ọma; o meru anyi. Eze-iwhe-ọma ono, o meru anyi b'o shikwaroo l'ẹka Kuráyisutu Jisọsu mehaadaruro anyi tẹmenu o mee mgboko-o.

¹⁰ Ọle ntaa b'ọ byaa emee, a whụ-dzuru eze-iwhe-ọma ono nkele Kuráyisutu Jisọsu ono, bụ Onye Ndzọta anyi bẹ byawaru l'eliwhe-e, bya emebyiwaa ike nke anwụhu. Ntaa b'o shiakwa l'ozhi-ọma ono, mewaa ndzụ ono t'ọ fụta iwhe, mbụ ndzụ ọwhu bụ a -nọduwa iya, eje anwụhubahee anwụhu.

¹¹ Ọo Chileke ono bẹ họtaru mu tẹ mu bụru onye l'a-ryajẹ ozhi-ọma ono arya, mu abụkwaruwho onye-ishi-ozhi iya, bụru onye l'e-zhi iya ezhi.

¹² O nokwa iwhe meru mu l'ejekota iwhe-ọtsulanu-a, mu l'eje ọwa, mbụkwa tọ hẹkwa l'iwhere iya l'adụje mu. O noo lẹ mu marụ onye mu woru onwomu ye l'ẹka iya, mbụ; o dokwaa mu ẹnya ree l'ọo-dụ ike kwakọbe iwhe ono, mu yeru iya l'ẹka jeye mbọku ikpe.

¹³ Tsolekwaruwho ọkpobe-okfu ono, ị nụru mu l'ọnu t'ọ bụru iya l'a-nọ akpozhiru ghu ụzo gẹ l'ịi-nọje ekfu okfu. Gudepyabelekwawho ekwekwe ono, i kweru nke Kuráyisutu yẹle oye obu ono, i yeru ndu ọdo. Iwhe ono bẹ bụkota iwhe tụkoru shikota l'atụgba ono, anyi lẹ Kuráyisutu Jisọsu tụgbaru bụru nnanụ.

¹⁴ Kwabẹlekwaruwho ọkpobe-okfu ono, Chileke yeru ghu l'ẹka ẹnya. Ume-Dụ-Nsọ ono, bu l'ime anyi bẹ l'e-mee, gụ adụ ike letakota iya ẹnya.

¹⁵ Mbẹ ị makwarụ-a lẹ ndu lile, nọ l'alị Éshiya, bụ ndu mu lẹ whẹ tụkoru eje ozhi-a bẹ tụkookwaru gbakashịhu, wehaa mu je akpakwaa lẹ Fáyigẹlosu mẹe Hemójinizu.

¹⁶ Tẹ Onye-Nwe-Ọha meeru ndibe Onẹsíforosu obu-imiko, o noo nkele o shi anọje agba mu ume, iwhere mu ta adụje iya rọ gẹ mu nọ lẹ mkpọro-ọ.

¹⁷ Lẹ nteke o beberu byarwua Romu b'ọ watalẹruwho anọ a chọ mu, achọshi mu ike jeye nteke ọ whụru mu.

¹⁸ Tẹ Onye-Nwe-Ọha byiko yebukwaaru iya ẹka tẹ Chileke whụaru iya imiko mbọku ikpe ono. Gụbedua l'onwoghu bẹ marwetaru-a lẹge o yetaberu mu ẹka lẹ Éfesọsu.