1 Tímoti 1 - BAYỊBURU Ẹzaa

¹ Ẹkwo-ozhi-a bẹ shi l'ẹka mbẹdua, bụ Pọlu; mbụ mụbe onye-ishi-ozhi Kuráyisutu Jisọsu. Ọo Chileke ono, bụ onye l'adzọje anyi mẹe Kuráyisutu Jisọsu ono, bụ onye anyi l'ele ẹnya iya bẹ zhiru mu tẹ mu bụru onye-ishi-ozhi ono.

² Onye mu l'ede ẹkwo-ọ anụ bụ gụbedua, bụ Tímoti, onye bụ ọkpobe nwa mu nke l'ọo mu bẹ dutaru ghu, ị bya ekweta l'ọo Kuráyisutu Jisọsu bụ Onye-Nwe-Ọha. Tẹ Chileke, bụ Nna mẹe Onye-nwe-anyi Kuráyisutu Jisọsu meeru ghu eze-iwhe-ọma; meeru ghu obu-imiko, mekwaawho t'i buru guu.

Tẹ ndu l'ezhi ejo nzhi sefu iya ẹka

³ Sụa, nteke ono mu l'eje Masedóniya bẹ mu kfukwaru ghu sụ ghu byiko t'ị nọdulekwawho lẹ Éfesọsu. L'o nwekwaru ndu nọ l'ẹka ono ezhi ejo nzhi, tụkoru bụkotaru ejire. Ọo ya bụ iwhe ọbu mu l'ekfu sụ t'ị nọdu l'ẹka ono nmajẹeru whẹ ọkwa, sụ whẹ tẹ whẹ be ezhishi iwhe ono, l'ẹte abụa ọkpobe-okfu.

⁴ Whẹ ahaa anọ akọ-whe mkpọkoro akọ-iwhe ndu Ju. Whẹ ahakwaawhọ nke anọ agụshi ndzekfu-ndzekfu ẹwha ndụ-ichee, mbụ ẹwha l'ẹte agvụje agvụ. Ẹgube iwhe ono bẹ bụlewho ntụtu-ẹgo bẹ l'ọokpa-lije. O to yetajeduru madzụ ẹka t'o mee iwhe Chileke tụberu t'o mee, mbụ iwhe ono anyi shi l'ozhi-ọma ono, anyi kwetaru marụ.

⁵ Iwhe meru mu nmaarụ ghu ọkwa ono bẹ bụ nke ọwhu ndu nke Kuráyisutu l'e-ye ibe whẹ obu. Mbụ obu ono, whẹ l'e-ye ibe whẹ abụkwaru oye obu ọwhu e gude obu-iwhoro ye mẹe l'obu marwetaru iwhe gbarụ iya l'ememe mẹe l'okweta nke Chileke ọkpobe ekweta.

⁶ O nweru ndu hawarụ shiswee ọkpobe ụzo ono, wotawa iya ghaa igharawhu, shiwaro nno wata anọ ekfu mkpọkoro okfu.

⁷ Ndu ono bẹ l'ọogu ẹgu tẹ whẹ bụru ndu o-zhi-iwu lẹbe abụ l'okfu ono, whẹ l'ekfu doru whẹ ẹnya, tọ hẹkwanu m'ọo l'iwhe ono, whẹ l'ekfushi okfu iya ono ike doru whẹ ẹnya.

⁸ Anyịbedua magezhiaru l'iwu Chileke bẹ dụ ree, m'ọ -bụru-a l'eetso iya-a lẹge ọ gbarụ t'e tsoje iya.

⁹ Ọle iwhe ọwhu dokwanuru ẹnya bụ l'ọ tọ bụkwa ndu dụ chịriri l'iwhu Chileke b'e kwoberu tụa iwu. Ndu a tụru iwu doberu bẹ bụkwa ndu l'emebyi iwu mẹe ọ-karia-ẹka whẹ, tụaru iya ndu ono l'eme iwhe-dụ-ẹji, l'anọje akpọ Chileke ẹbo-ẹbo l'afụ, tụaru iya ndu l'ete etso ụzo Chileke, tụaru iya ndu l'ẹte adụa iwhe ọwhu bụ nke Chileke ọwhu whẹ doberu nsọ m'ọo nnanụ, tụaru iya ndu l'egbuje nna whẹ, tụaru iya ndu l'egbuje ne whẹ, tụaru iya ndu mgbugbu madzụ l'owhu.

¹⁰ A tụa ya doberu ndu l'arwụje ụrwu-alị mẹe unwoke, l'ejekfuje nwoke ibe whẹ azẹe nwoke lẹ nwanyị mẹe ndu l'apa madzụ l'oshi. A tụa ya doberu ndu ejire mẹe ndu l'agụjeru ẹnwa tukobe onwowhe l'iwhe whẹ mechaaru-a. A tụkwaa ya whọ doberu iwhe bụkota ndu l'eme iwhe bụ-zhia iwhe ọdo, l'emerwushi ọkpobe-okfu ono, e zhiru unu emerwushi. O noo ẹgube ndu a tụru iwu ono doberu ndono.

¹¹ Ọkpobe okfu ọbu, e zhiru unu bẹ shikwa l'ozhi-ọma ono, Jisọsu Kuráyisutu yeru mu l'ẹka. Ozhi-ọma ono bụkwanuru ozhi-ọma nke ọdu-biribiri nke Chileke ono, bụ Chileke dụkota ree, dzukota oke l'ime onwiya.

Pọlu l'etu Chileke ẹwha

¹² Mu l'etu Onye-nwe-anyi Kuráyisutu Jisọsu ẹwha. Ọo ya bẹ bụ onye meru: mu dụ ike eje ozhi-a, mu l'eje-e. Mu l'etu iya ẹwha nkele o lewaru ẹnya, whụa lẹ mu bụ onye gbarụ tẹ ya gude ire mu ẹka, ọ họta mu tẹ mu jeeru iya ozhi ono.

¹³ A makwarụ-a lẹ mu shi anọje ekfutoshi Jisọsu Kuráyisutu lẹ mbụlembu, shi anọje achị nta iya; shikwawho anọje eme iya iwhe iwhere. Ọle Chileke bẹ whụlekwaru mu-a imiko nkele iwhe ono, mu shi eme bẹ mu shi eme lẹ ọma-ama. Mu te eshikwa kwetawaa nteke ono l'ọo Jisọsu bụ Onye-nwe-anyi.

¹⁴ Tọ dụ iya bụ lẹ Onye-nwe-anyi ono, bụ Jisọsu Kuráyisutu abya awhụaru mu imiko, nyịberu gẹ l'aa-nọ atụ ọnu iya. O mee mu, mu bya ekweta l'ọo ya bụ Onye-Nwe-Ọha ọbu; mekwaa mu who, mu ye ndu ọdo obu. O noo bụru iwhe l'oomejeru iwhe bụkota ndu whẹ l'iya tụgbaru bụru nnanụ.

¹⁵ Okfu-a bẹ bụkwa okfu, e gude ẹka, gbarụ nke t'e gbobe ẹka labọ nata iya ọkpobe anata. Okfu ọbu bụ lẹ: Jisọsu Kuráyisutu bẹ byarụ lẹ mgboko-o tẹ ya bya adzọfuta ndu l'eme iwhe-dụ-ẹji. Ọ bụru mbẹdua bẹ shi bụru onye tarụ ishi iwhe bụ iwhe-dụ-ẹji l'eemeje eme.

¹⁶ O noo iwhe meru Jisọsu Kuráyisutu whụaru mbẹdua imiko, mee t'ọ bụru l'ẹhu mu bẹ ya l'e-shi goshi ndu ọdo gẹ ọta-nshi iya l'owhu habe shii. Ọo ya bụ lẹ Jisọsu Kuráyisutu bẹ gude ẹhu mu egoshi ndu ọdo lẹ ya l'a-gbẹenu dzọfuta whẹ, nụ whẹ ndzụ tututu-mịmimi, ebehuduru iwhe-dụ-ẹji, whẹ meru dụ-behudu ẹji ọdu agha, m'ọ -bụru-a lẹ whẹ woru onwowhe ye iya l'ẹka.

¹⁷ Sụa, tẹ ndiwhe kwabẹ Chileke ugvu, whẹ ajaa ya ajaja, mbụ Chileke ono, bụ eze, ọ bụru g'ọ bụ eze ono ntaa bụ gẹ l'ọo-bụgburu eze jeyewaro. Ọo ya bụ Chileke lanụ, dụ nu kpụ, ọ bụru iya bụ Chileke ọbu, l'ẹte anwụhuje anwụhu, t'a whụje iya l'ẹnya. Sụ t'a kwabẹ iya ugvu, jaa ya ajaja jeye lẹ tututu-mịmimi. O noo g'ọ dụ.

¹⁸ Sụa, Tímoti ọ kwa gụbedua, dụwaa g'ọo nwa mu bẹ mu nmarụ ọkwa-a ye l'ẹka. Iwhe meru g'o gude mu nmaarụ ghu iya nno bụ tẹ mu gude iya nyatarụ ghu iwhe ono, ndu nkfuchiru Chileke kfuru l'okfu ẹka ghu. T'iwhe ono, whẹ kfuru ono mee obu ghu t'o shihu ike nke ọwhu ọ bụ iya l'a-bụ iwhe l'ii-gude alwụ ọgu ẹhu Chileke ono, l'ịilwu ono.

¹⁹ Kwetagbulekwaruwho nke Kuráyisutu; t'iwhe bụ iwhe l'ii-meje bụjelekwaruwho iwhe obu ghu marwetaru l'ọo iwhe gbarụ iya l'ememe. O nwekwaru ndu magezhiaru iwhe gbarụ whẹ l'ememe, obu whẹ sụru whẹ tẹ whẹ mee, whẹ te eme iya. Ọ bụkwanuru iwhe ono bẹ kpatarụ ekwekwe ọbu, whẹ kweru nke Kuráyisutu tụko rikashihu erikashihu g'ọo ụgbo-mini, vụru onwiya l'akpaa.

²⁰ Ndu harụ tsoru lẹ ndu ono bẹ bụ Hayimeníyọsu mẹe Alẹguzánda. Ndu ono bẹ mu wookwaru ye l'ẹka Sétanu t'ọ nụa whẹ awhụ nke ọwhu whẹ l'a-nwụtakwanu l'ọ tọ dụdu ree t'e kfutoshije Chileke.