Luke 1 - New Testament-et Akuzipigestun

^1-2 Angellemni Theophilus, Uglalghiim yugem igaquqaqiit tawaten pillghet akulemnni. Igaquqiit taakunguut ataasit nagaquqaput esghapakaneng tawaten pillghistun ima piinlillghitneng. Ellngitallu qepghaatkaqaat Kiyaghneq ungipaqelleghmegteggun ungipaq Christ‑ameng ayuqelghii.

³ Nagatkaqanka apellghit, atightughwaaqaqankallu igaqullghit piinlillghitneng. Enkaam igaqughyuganka elpenun tawatetngwaaghluki pillghistun.

⁴ Tawaten liisimakelleqaten ipangutangi tamaakut apeghtuutkat elpenun.

John‑em Paaptaayestem Allgellghan Apellgha

⁵ Herod umiilkengnguluku Judea‑m, tamaanteftuq priest‑a, aatgha Zechariah. Qepghalgutkegkangi priest‑et atilqelghiit Abijah priest‑et. Nulighhan aatgha Elizabeth‑nguuq, Aaron‑em kingunghan priest‑em paniga.

⁶ Kiyaghneghmun elqughutngalutek kiyaghtaaghek. Qaatkepigtekangik Atanghem qelghusiillu Liilightuusiillu, avutnginnalutek.

⁷ Taawanginaq taghnughhiilnguuk, qayughllak Elizabeth qumingepagningilnguq, tawaveklu qamagllutek siivanlleghughtekak.

⁸ Ataasimi aghneghmi, Zechariah, qepghaamalghii Temple‑mi, qayughllak Abijah priest‑et qepghalleghqaat kaallghii.

⁹ Nangaghneghmeng pillghistun priest‑et ateghtiiraalleghqun nakmikegkaat Zechariah. Enkaam iteghluni Atanghem Temple‑nganun paneghreghaqaq incense‑meng.

¹⁰ Tawani aflungani incense‑meng paneghreghallghem, qakma yulghuteghllaget yughaatet.

¹¹ Tawani Atanghem yaqulgan aliighvikegkaa nekevghaghmi aghenqigneghanilluni aghqefigan incense‑em.

¹² Zechariah upuqaq esghaghyamigu yaqulek, alingruughllakaqlu.

¹³ Iwernga yaqulgem pikaa, “Alingegpenang Zechariah, yughaghten nagaqullengumaat. Nuliighpek Elizabeth‑em ighnengunnaqngwaaten, atighlleqan John‑meng.

¹⁴ Enkaam quyaghllagllequten, uglamllu quyakelleqaat allgellgha,

¹⁵ qayughllak ellnga qepghaghtekeghllaglleqaa Atanghem. Meghyaghqaanghituq wine‑meng, nalighmeng suumnalghiimeng aqimlemeng, imighngayaghqaaguqlu Agleghnalghiigneng Taghneghagneng talwa allgellghilluni.

¹⁶ Israel‑eghmiilghutetlu uteghtesqughlleqii Ataneghmun Kiyaghneghitnun.

¹⁷ Ellnga sivukluni qepghaghllequq, taagken Ataneq qepghaghllequq. Ellnga ataasigneng taghneghalgullequqlu aghtughyaghqaanghillelgullequqlu uuknaliqistetun Elijah‑tun. Atanun sumeghtaghaatkesagutesleqii avaqutiit, qaatkusigalnguutlu nallghusaghnaqngwii peghqinelleghmun Kiyaghneghem elqughutngallghanun. Enkaam yataaghqelleqii yuget Atanghem tagilleghqaanun.”

¹⁸ Zechariah‑m pikaa yaqulek, “Naten liisimakelleqsikun apellghen? Nanevgaghllagumaanga, nulighqallu aghnalqwaalghii.”

¹⁹ Yaqulgem pikaa, “Gabriel‑nguunga, nekevghalghii Kiyaghneghem nayuutngallghani. Elpenun kayagtaagunga, ungipaasaghtuugamken whaken pinilghiimeng ungipameng.

²⁰ Nagataghten, taawa akuzinanighnaquten kenlanga aapqanka elpenun apeghiightuutellghitnun, qayughllak ugpeqenghilketen akuzitenka, apeghiighyaghqat pilleghqiit kaaskata.”

²¹ Yuget utaqiilghiit Zechariah‑meng sumeghtaghaqat sangami muluughllagutanga Temple‑mi.

²² Aanyalghiimi aleghqughpagningitkii, enkaam liigikegkaat esghawaaghumaniluku Temple‑mi.

²³ Enkaam qepghalleni apeghiighyamigu neminun aglaqaq.

²⁴ Mulunghituq taakut aghneghet kingungitneng nulighha Elizabeth qumingegkaq, enkaam tallimat tanqit aananiqaq whaten pimaghmi,

²⁵ “Qenwatlu Atanghem nangllegyagutaanga, iqitaa kayngusaghaatelqa taghnughhangenghitellemneng.”

Jesus‑em Allgegnaqellghan Apellgha

²⁶ Aghvinliitangani tanqim Kiyaghneghem kayagtekaa yaqulek Gabriel Nazareth‑mun, Galilee‑melngughmun.

²⁷ Yugmun atuqesimangilngughmun aghnaghaghmun, aangꞌghutngwaaqamun Joseph‑mun, kingunghanun David‑em. Yugmun atuqesimangilnguum aghnaghaam aatgha Mary‑nguftuq.

²⁸ Yaqulgem takuluku pikaa, “Nekeggmelleq elpenilli! Atanghem nakmikumaaten aghnat akulngitneng.”

²⁹ Iwernga Mary‑m seghleliighutkeghllakaa nagalluku tawaten pillgha, sumeghtaghaatkegkaallu sangami tawaten quyakutni.

³⁰ Yaqulgem pikaa, “Alingegpenang Mary, qayughllak efqughnaghtuten Kiyaghneghmi.

³¹ Nagataghten, taawa qumingnaqnguuten, ighnengellequten enkaam atighlleqan Jesus‑meng.

³² Aangellequq, atighyaghqaaguqlu Ighnegha Kiyaghneghllagem; enkaam Atanghem Kiyaghneghem umiilgughtesleqaa sivunghatun David‑etun.

³³ Igleghutillequq Jacob‑em kingunghitneng Israel‑eghmiineng quunperugllak; Ataneghpagullghallu kenlengituq.”

³⁴ Mary‑m pikaa yaqulek, “Naten una piyaghqaawa yugmun atuqesigalnguunga?”

³⁵ Yaqulgem pikaa, “Agleghnalghiim Taghnegham takulleqaaten, enkaam Kiyaghneghem aghtughyaghqaanghillghan taghneghangullghiistun alkwaaghlleqaaten. Taana apalluqluku taghnughhaq agleghnaghllequq aatqesaghqaqaallu Kiyaghneghem Ighnegha.

³⁶ Nagataghten, ilakwaaghen Elizabeth, aghnalqwaaghllagluni qumingumaaq, ighnengnaqnguuq. Una whaa aghvinliitkaa tanqiq, piiqsaqangat avanginniluku,

³⁷ qayughllak Kiyaghneghmi sangwaa qamaglluni piyaqniituq.”

³⁸ Mary‑m pikaa, “Taawa whanga, Atanghem qepghaghtekaanga; legan tawaten pinaqnilleghpetun apeghiighhaaq.” Taagken yaqulgem unitkaa.

Mary Laalighlleghhii Elizabeth‑mun

³⁹ Mulunghituq Mary, yataaghqelluni taayughqemmeng aglaqaq neghllagmun, akulngitnilngughnun qemilghutngan Judea‑m.

⁴⁰ Mary kaalluni Zechariah‑nkunun iteghluni quyakegkaa Elizabeth.

⁴¹ Legan Elizabeth‑em nagaqughaa Mary‑m quyakillgha, taghnughhaq qumiga qapragaghtekaq, Agleghnalghiimllu Taghnegham imiqaa Elizabeth,

⁴² iglagtuluni pikaq, “Quyastekaaguten akulngitni aghnat, quyastekaaguqlu taghnughhaq ighniyaghqan!

⁴³ Quulvallengepestaaghtunga qayughllak Ataneghma naangan laalighfikegkanganga!

⁴⁴ Legan quyakillghen nagaqughaqa, taghnughhaq qama quyam qapragaghtuq.

⁴⁵ Quyanaghhalek Atanghem akuzitanga ugpeqegken apeghiighlleqniluku elpenun!”

Mary Ilagaatkun Usuqilghii

⁴⁶ Mary pikaq, “Unguvasigma usuqaa Ataneq,

⁴⁷ taghneghagkallu quyaghllaguuk Kiyaghneghmi, Yugulighistemni,

⁴⁸ qayughllak ellngan esghaghlunga nakmikaanga, ukalighpigaq qepghaghteni. Whaken kenlekluku yugem kinguliighaam qamaglluni atighyaghqaqaanga quyastekaalunga,

⁴⁹ qayughllak Aghtughyaghqaanghiteghllagem Kiyaghneghem apeghiighuteghllagaanga. Aatgha agleghnaghtuq.

⁵⁰ Nangllekaqaa yuuk qamagtengngwaaghluku ellmineng talluqilghii, kinguliighaghneng tuunglighhiitnun.

⁵¹ Iknaqepiglleghiikun aghtughyaghqaanghilleghmikun kayaalqaqii qukaayuglleghhiit sumeghtaghalleghmegteggun.

⁵² Umiilegllaget ateghtaqii aqumutiitneng, enkaam quulvaghaqii ukalighpigaat.

⁵³ Iyatalghiit neqnilghiimeng kepsughtaqii, enkaam aklungilnguut aghulaqestaqii avangunaki.

⁵⁴ Kayusighaqii qepghaghteni Israel‑eghmiit, qayughllak nangllegtalghii,

⁵⁵ Abraham‑emunllu kingunghanunllu quunperugllak akeqelleghmitun sivuneput.”

⁵⁶ Mary‑m nayuqegkaa Elizabeth pingayut tanqit, taagken neminun aglaqaq.

Allgellgha John‑em Paaptaayestem

⁵⁷ Elizabeth‑em ighnilleghqaa kaalluni, ighnengegkaq.

⁵⁸ Uvilighneghitallu nalleqliitallu nagaqughluku Atanghem nangllekeghllallgha Elizabeth, quyakusaghtuqaat.

⁵⁹ Pingayuneng inglulek aghneq atughluku yuget tagilaghaatkat circumcise‑enaluku taghnughhaq, atighnaqsaghaatlu Zechariah‑meng, atangan aatghaneng.

⁶⁰ Iwernga naangan pikii, “Nakaa, aatgha John‑nguuq.”

⁶¹ Yuget pikaat, “Nalighhiiniit nalleqlitek taagken aatghitut.”

⁶² Taagken apaqumeng atanga aaptekaat kitumeng atighnaqutanga.

⁶³ Zechariah igaghyaghqameng tungsighluni, igaqegkaa, “Aatgha John‑nguuq.” Tawanlenguut qamaglluteng allaaghlluwhaghyukat.

⁶⁴ Tawaninginaq Zechariah akuziyaqlegughtekaq, usuqegkaallu Kiyaghneq.

⁶⁵ Qamaglluteng uvilighneghit tallughyukat. Judea‑mi ungipaq mingitkaat yugnun tamaani kiyaghlleghhiinun akulngitni qemit.

⁶⁶ Qamaglluteng nagaquutkat tawaten pilleghneng sumeghtaghaatkelluki pikat, “Taghnughhaq una sastengunaqngwaatuq anglikumi?” Qayughllak ipa nalluniitkaalghii Atanghem aghtughyaghqaanghillgha ellnganilnguq.

Zechariah‑m Uuknaliqellgha

⁶⁷ John‑em atanga Zechariah, Aleghnalghiim Taghnegham imighluku uuknaliqegkaq,

⁶⁸ “Yeqay usuqelteggu Ataneq Kiyaghnegha Israel‑em, qayughllak itemusaghtughii yuni.

⁶⁹ Yataaghqutiinkut Yugulighisteghllagmeng, qepghaghtemi David‑em kingunghaneng.

⁷⁰ Tawaten neghighluku akeqikaaguq agleghnalghiitgun uuknaliqistemikun,

⁷¹ yuguliyaghqaaluta anguyamnneng, tamaghhiitnengllu ugumikistemnneng.

⁷² Nagneghutkaqaa nangllegtalleni sivunemnnun, apeghiighlleqnilukullu agleghnalghii akequsani.

⁷³ Akequsangllaqaaguq sivunemnnun Abraham‑emun.

⁷⁴ Akeqiinkut yugulilleqniluta anguyamnneng, enkaam qepghaalleqaghput alingegpenaamta anguyamnneng,

⁷⁵ tuunꞌngwaaghluta ellnganun, qaatkullutallu piyukellghanun unguvalleghput qamagtiiluku.

⁷⁶ Enkaam elpek taghnughamni, atighyaghqaaguten uuknaliqistenga Aangepiglleghhiim Kiyaghneghllagem. Kayaggnaqngwaaten sivutghulluku Ataneq yataaghqesqelluki yuget tugukliisqelluku tagikan.

⁷⁷ Ungipaalleqaten Kiyaghneghem yugi yugulilleghmeng seghevutillghakun seghleghqellghitneng,

⁷⁸ qayughllak Kiyaghneghput nangllegtaghllagtuq. Kayaglleqaa Yugughlighista, ellnga siqinghem piitekestallghatun ayuqsaghqaaguq

⁷⁹ qilagmeng kukeggnaluki tamaakut kiyaghlleghhiit taghneghangutellghanilnguut tuqullghem, maghyaghqughnaluta tuumnganun nekeggmellghem.”

⁸⁰ Taghnughhaq anglikaq, iknaqughtekaqlu taghneghamikun. Kilgaanitkaq kenlanga ungipaghyaghtulleghminun Israel‑eghmiinun.