John 1 - New Testament-et Akuzipigestun

Akuzin

¹ Piinlighyuwhaalleghmeng Akuzin tawantekaq, Akuzin Kiyaghneghmetkaq, Akuzin Kiyaghneghulghii.

² Ellnga Kiyaghneghmetkaq piinlighyuggaalleghmeng ima.

³ Kiyaghneghem ellngakun sangwaa qamagtengngwaaghluku ulimakaa, talwa sangwaa ataasighhaq ulimamangitaa Akuzitngunani.

⁴ Akuzitmetuq unguvalleq, taana unguvalleq nighuguuq yugnun.

⁵ Taana nighuk kuukgutnguuq mamlegmi, mamlegem kayaalqumangitaa.

⁶ Taawanguq yuuk Kiyaghneghem kayagtekaa, aatgha John.

⁷ John‑em apeghyaghtuqaa nighuk qamaglluki yuget ugpeghesqelluki ungipaqilleghmikun.

⁸ Ellnga nighugunghituq, iwernga apeghyaghtuuwaa nighuk.

⁹ Taana nighupiiguuq tagikaq nunamun, nighugullghii tamaghhaanun yugnun.

¹⁰ Taana Akuzin nunametkaq. Qaywa nuna ulimakaayaghngaan ellngakun, tawalliima nunam yugita nallukegkaat.

¹¹ Tagikaayalghii ellmi katam yugminun, iwernga tugukliimangilkangat.

¹² Iwernga qamaglluki tuguklighilghiitlu ugpelghiitlu ellmineng, avaqutaliisaghqaaghtestekaqii Kiyaghneghmun.

¹³ Avaqutaliisimangitii yugkun allgeghaqelghiistun, talwa yugem piyukellghakun nalighmeng nakmikellghakun. Kiyaghneghem ellmineng katam avaqutaliitkaqii.

¹⁴ Akuzin kemgughlluni akulemnnitkaq. Ellngakun Kiyaghneq liitestengngwaaqaaguq, liitestengngwaaqaqaallu piniqelleni whangkunnun. Esghaqaqaghput taawa seghleghllaguftuq. Seghleghllaguftuq qayughllak taananginaghhaalghii Ighnegha Atam.

¹⁵ John‑em Paaptaayestem aapqaqaa, akilghuutkegkaqaa whaten, “Taananguuq aapqaqa elpesinun whaten piiqngama, ‘Kingumneng tagiyaghqaq aangeghllagtuq whangamneng, qayughllak kiyaghtengngulghii talwa allgellghillunga.’”

¹⁶ Piniqingaghllagutmineng quyastaqiinkut uteghpagtiinaq.

¹⁷ Kiyaghneghem tuunegkaqii Liilightuusat Moses‑kun, iwernga piniqelleqlu ipalleqlu liitestekaqaak Jesus Christ‑akun.

¹⁸ Kitum alngunak esghiigataa Kiyaghneq. Taananginaghhaam Ighneghem qantaghantelleghpigaam Atamun, liitestekaa yugnun.

John‑em Paaptaayestem Ungipaa

¹⁹ Jerusalem‑emeng Jews‑et igleghutistengit kayagtikat priest‑enengllu Levite‑enengllu aaptesqelluku John whaten, “Kinanguzin?”

²⁰ Aapsatni kiimsighaghtekii whateghlluwaaq, “Whanga Christ‑angunghitunga.”

²¹ Enkaam aaptekaat, “Kinanguzinmi? Elijah‑nguziin?” John‑em kiimsiqii, “Nakaa.” Aaplaataqaat, “Uuknaliqistenguziin?” Kiimsiqii, “Nakaa.”

²² Pikaat, “Ungipaatikut kinanguten, qayughllak ungipaasaghtupestaaghnaqaput kayagtikat whangkunneng. Aapghi kinanguten.”

²³ John‑em pikii, “Uuknaliqista Isaiah pikaaguq, ‘Ma akilghuugaquq kilgaani whaten, Taklaghteggu tuumkaghqaa Atanghem’. Taana yuuk akilghuulghii whanganguuq.”

²⁴ Pharisees‑et taakut kayagtekaqegkangit John‑mun.

²⁵ Aaptekaat, “Christ‑angunghilkuvek, Elijah‑ngunghilkuvek, uuknaliqistengunghilkuvek, sangavek paaptaayeghiiqsin?”

²⁶ John‑em kiimsiqii, “Paaptaayeghiiqunga meghqun. Akulegpesinituq kina nallukegkaghsi.

²⁷ Taananguuq tagiyaghqaq kingumneng, seghleghllaguuq repall whanga pininghitunga itemsaghqaaluki singii.”

²⁸ Qamaglluteng tamaakut pikaagut Bethany‑mi inglunganilngughmi Kiiwegni Jordan‑egni. Taakwani John paaptaayeghingulghii yugneng.

Penniighaghaa Kiyaghneghem

²⁹ Unaamingani John‑em esghaghluku Jesus tagilghii ellminun yuget pikii, “Ii‑i, taanata Penniighaghaa Kiyaghneghem iqitiyaghqaq seghleghqellghaneng nunam yugan.

³⁰ Taananguuq aapqaqa whaten, ‘Yuuk taginaqnguuq kingumneng, iwernga aangwaaghuuq whangamneng, qayughllak kiyaghtengnguuq talwa allgellghillunga.’

³¹ Whangallu nalluksaghaqa kinangutanga, iwernga paaptaayeghiyaghtuugunga meghqun liitesqelluku kinangutanga Israel‑eghmiinun.”

^32-33 Taagken John‑em ungipaqegkaqaa, “Kiyaghneghem kayagtekaqaanga paaptaayeghisqellunga meghqun. Paninang nalluknguluku kinangutanga, Kiyaghneghem ungipaatkaqaanga, ‘Esghaghlleqagken Taghneghak ukilghiik yugmun. Taana yuuk paaptaayeghiyaghqaaguq Agleghnalghiignekun Taghneghagnekun.’ Enkaam esghaghagka qilagmeng Taghneghak ukilghiik dove‑ngulutek Jesus‑mun, ellnganitkaklu”

³⁴ Taagken John‑em pikii, “Tawatelluku esghaqaqaqa, ungipaatamsi, taana Ighneqaa Kiyaghneghem.”

Maligsaaghteksuwhaaghi Jesus‑em

³⁵ Unaamingani John tawanllaataqaq, maalghuklu maligsaaghtekek.

³⁶ John‑em esghaghluku Jesus naghughlleghhii pikaq, “Esgha taanata Penniighaghaa Kiyaghneghem!”

³⁷ Taakuk maligsaaghtek nagalluku John, maligtekaak Jesus.

³⁸ Jesus‑em qiivluni esghaghlukek maligullghiik ellminun aaptekakek, “Sangwaa piiqestegnegu?” Kiimsiqaak, “Rabbi, naantaqsin?” (“Rabbi” whaten pisiiguq, “Apeghtughista”.)

³⁹ Pikakek, “Maligllunga esghaghyaghtughtegnegu.” Enkaam maligtekaak kiyaghfiganun, tawantekak 4‑eklaagmeng kenlanga unulleghmun.

⁴⁰ Yugem aallgha nagatkaq John‑meng akuzilghiimeng, maligtikaq Jesus‑meng Andrew‑nguftuq, Simon Peter‑em anglegutanga.

⁴¹ Tawaninginaq Andrew anglegutminun Simon‑mun aglaghluni pikaa, “Naalkumaaghpung Messiah.” (“Messiah” whaten pisiiguq, “Christ‑a”.)

⁴² Taagken Simon aglaatkaa Jesus‑mun. Jesus‑em esghaghluku pikaa, “Elpek Simon‑nguuten ighnegha John‑em. Aatghen Cephas‑ngullequq, whaten pisiq, Peter.”

Jesus‑em Nakmikegkek Philip‑enkuk Nathanael‑enkuk Maligsaaghtengulukek

⁴³ Unaamingani Jesus Galilee‑nnaqumalghii. Nallaghluku yuuk aatgha Philip, pikaa, “Maligtinga.”

⁴⁴ (Philip Bethsaida‑ghmiingulghii, Andrew‑nkugetun Peter‑enkugetun.)

⁴⁵ Taagken Philip‑em ivaghyaghtughluku Nathanael ungipaatkaa, “Nallaamaaghput yuuk Moses‑em igaqegkaa igiitgun Liilightuusat, uuknaliqistetlu igaqegkaqaat igamegteggun. Jesus‑nguuq Nazareth‑eghmii, ighnegha Joseph‑em.”

⁴⁶ Nathanael‑em aaptekaa, “Sangwaangam pinilghii Nazareth‑meng allgeghlleqefta?” Philip‑em kiimsiqaa, “Esghaghyaghtuqaghhuqun.”

⁴⁷ Jesus‑em esghaghyamigu Nathanael tagilghii ellminun pikaa, “Taanata Israel‑eghmiipik, temngitwhangilnguq.”

⁴⁸ Nathanael‑em aaptekaa, “Naten liisimaksinga?” Jesus‑em kiimsiqaa, “Esghaqaqamken asinganilluten figs‑em uqfigan, talwa salin Philip‑em apellghillunga elpenun.”

⁴⁹ Nathanael‑em pikaa, “Apeghtughista, elpek Ighneqaaten Kiyaghneghem! Elpek Umiilkaaten Israel‑em!”

⁵⁰ Jesus‑em pikaa, “Ugpeghsiin qayughllak ungipaaskemken esghaamaniluten asingani figs‑em uqfigan? Sangwaat aangataghalghiit tamaakuneng esghaghlleqaten.”

⁵¹ Taagken pikii “Ipa ungipaatamsi, esghaghlleqaghsi qilak qelpelghii, Kiyaghneghemllu yaqulgi mayulghiit, ukilghiit Ighneghakun Yugem.”