2 Peter 1 - New Testament-et Akuzipigestun

¹ Ukut latat Simon Peter‑meng pinguut. Qepghaghtekaangallu, apostle‑kaangallu Jesus Christ‑am. Lataaqamsi qamagllusi allgeghutkani ugpeqilleghmeng whangkutestun ayuqelghiimeng. Allgeghtekaqaghput ugpeqilleghput elqughutngallghakun Jesus Christ‑am, Kiyaghneqegkefutlu Yugulighistekegkefutlu.

² Piniqellghenkuk nekeggmellghenkuk wata nulalik elpesini liisimakelleghpesigun Kiyaghneqlu Jesus‑lu Ataneghput.

Kiyaghtelleghqaq Kiyaghneghem Kiyaghtesqesullghatun

³ Jesus aghtughyaghqaanghillelguuq Kiyaghneghmeng. Taaggun aghtughyaghqaanghilleghqun tuunegkaqiinkut sameng tamaghhaaneng aklukegkamnneng kiyaghtesqelluta Kiyaghneghyuneghtuluta. Tamaakut allgeghtekaqaput qayughllak liisimakegkefut Jesus. Tuqlughiinkut ilatesqelluta quulvalleghminunllu pinilleghminunllu.

⁴ Aghtughyaghqaanghilleghmikun, Jesus‑em tuunegkaqiinkut akequsamineng megnunapiglleghhiinengllu pivagnapiglleghhiinengllu. Tamaagun akequsatgun Kiyaghneghem ilatesleqiisi nangaghneghminun. Taagken anagyaqlegughlleqasi seghleghem piyukellghi nunamelnguut naafqiiyaqleget elpesineng.

⁵ Kiyaghneghem nangaghnelitkaqutanganeng elpesi, taakunginaghhaagneng pinaqellghaghsi qamaglluku ilateki ukut ugpeqilleghpesinun: ugpeqilleghpesinun ilateggu pinilleq, pinilleghpesinun ilateggu liisimalleq,

⁶ liisimalleghpesinun ilateggu nuqetutilleq, nuqetutilleghpesinun ilateggu aghuliilkaamalleq, aghuliilkaamelleghpesinun ilateggu Kiyaghneghyuneghtulleq,

⁷ Kiyaghneghyuneghtulleghpesinun ilateggu nangllekututelleq ugpeqaalgutegpesinun, nangllekututelleghpesinun ilateggu piniqelleq.

⁸ Tamaakut atuqngukufsiki, nulastekufsikillu kayusiilleqiisi atughqaalusillu kayutkaghqaalusillu liisimakelleghpesigun Ataneghput Jesus Christ‑a.

⁹ Iwernga kitum alngunak atuqenghilkumiki tamaakut, amugtapigtuq enkaam esghaatepagningituq. Puygukaqaallu Kiyaghneghem ukmangiqaqegkanga seghleghqelleqsaqanganeng.

¹⁰ Enkaangam ugpeqaalgutemni, nalluneqniighwaaghteggu Kiyaghneghem tuqluqaqiisillu nakmikegkaqiisillu. Tawaten pikufsi taawa iqiteqaghhnaanghitusi Christ‑ameng.

¹¹ Enkaam Kiyaghneghem quyakusiqeghllaglusi iteghtesleqiisi kenlengilngughmun Ataneghpagullghanun Atanemtallu Yugulighistemtallu Jesus Christ‑am.

¹² Qaywa liisimakeghngaaghpesiki taakut ipapillghet, sagiqutngughngaaghpesikillu qaatkennaluki, iiwleng neqangughlleqamsi taakuneng ipapilleghneng elpesinun apeghtuutkamnneng.

¹³ Sumemni itagnaghtuq neqangughtaataqumsi tamaakuneng unguvangulunga.

¹⁴ Liisimakaqa tuquyaghtughtunga qayughllak Atanemta Jesus Christ‑am ungipaatekestaqaqaanga.

¹⁵ Pinaqelqa qamaglluku apeghtughamsi tamaaken, enkaam tuqulleghma kingunganeng neqaataqelleqasi.

Esghaatkat Christ‑am Nighughqellghaneng

¹⁶ Atuqumangitaput peghqiniqutngwaaghluki ungipaghaatengllaqat aapghaqngamtekek elpesinun aghtughyaghqaanghillghallu tagillghallu Atanemta Jesus Christ‑am. Whangkuta katam iyeghlluwaamnneng esghaqaqaghput ellngan aangelleghllaga.

¹⁷ Jesus‑em allgeghtaqngagu quulvalleqlu nighughqelleqlu Kiyaghneghmeng Atameng, nagaquqaqaa menga Kiyaghneghem, Qulighpigaalghii Nighughqengngaghllak. Atam pikaqaa, “Unanguuq piniqepigtekegka Ighneqa, efquqepigtekegka.”

¹⁸ Whangkuta whangkunneng katam nagatkaqaghput ma qilagmeng Jesus‑metaqngamta agleghnalghiimi naayghami.

¹⁹ Tamaaken apalluqluku whangkunni nalluneqnaqraggiitut uuknaliqistet uuknaliqutkegkiit ipangutangi. Elpesinun pinighllequt sumeghtaghaatkengngwaaqufsiki uuknaliqutkegkiit, qayughllak kenelghutam kuukgutellghatun ayuqut mamlegmun. Tawatetekestaghtek kenlanga Christ‑am tagilleghqaan aghneghanun. Taagken nighuga kuukgullequq ilugpesinun, unaangum ighaleqetaaghatun ayuqluni.

²⁰ Liigikngwaaghyaghqaqaghsi una: Kitum alngunak ellmineng katam liigikepagningitii sameng pisiitangi uuknaliqellghet Akuzitnilnguut Igaqegkani.

²¹ Uuknaliqistet nakmikumangitiit uuknaliqutkesaghqateng. Itupill Agleghnalghiim Taghnegham uuknaliqistet akuzitelitkaqii akuzisqelluki Kiyaghneghtameng.