1 Peter 1 - New Testament-et Akuzipigestun

¹ Ukut latat Peter‑meng pinguut apostle‑nganeng Jesus Christ‑am, Kiyaghneghem nakmikegkiitnun yugnun aghulaquutestekat Pontus‑mun, Galatia‑mun, Cappadocia‑mun, Asia‑mun, Bithynia‑munllu.

² Neghighluku Kiyaghneghem Atam nakmikegkaqiisi ellminun yugulusi, Agleghnalghiimllu Taghnegham pelungighsaqaqiisi. Tawaten pikaaguk qaatkutesqellusi Jesus Christ‑amun, ukmangiightesqellusillu aawakun. Kiyaghneghem kayusillghallu nekeggmellghallu wata nulalik elpesinun.

Ugpeqat Sighimallghat

³ Usuqelteggu Kiyaghneq, Atanga Atanemta Jesus Christ‑am! Apalluqluku nangllegtalleghllani allgenqigtestiinkut unguvaghtelleghmikun Jesus Christ‑a tuqulleghmeng. Taam sighimallengesteghllagiinkut nalluneqniilngughmeng.

⁴ Enkaam utaqangwaaput piliisaghqaput quyastelleghllaget Kiyaghneghem aflengakegkangi yugminun. Aflengakngwii qilagmi elpesinun enkaam aghunaanghitut, naavnaanghitut, ghevnaanghitutlu.

⁵ Kiyaghneghem aghtughyaghqaanghilleghmikun paqniighsaghlleqiisi ugpeqilleghpesigun. Enkaam kenletghuutelleghmi aliighlleqaa yugulilleq yataghqegkaq elpesinun.

⁶ Taam quyamastiisi, qaywa maaten natengiighhaq allaaghhiinaghmeng seghleliighyaghngaaghpesi.

⁷ Tamaakut seghleliighet nanghiiqusiigut ipapighqennalusi ugpeqillepiilgutsi. Ugpeqilleghsi megnunaghataghalghiinguq gold‑nneng. Gold‑et nanghiiquneghmegteki keneghqun naafqegkayuguut. Paninang kenghet atuqaqiit pelungighnaluki. Tawateghpigaq ugpeqilleghsi nanghiiquyaghqaaguq. Aghuliiskan pelungilluni, allgeghlleqaghsi usuqelleq, nighughqelleq, quulvalleq Kiyaghneghmeng aliightekagu Jesus Christ‑a.

⁸ Esghiigateghngaaghpesigu piniqaghsi, esghanghiteghngaaghpesigu maaten ugpeqaghsi. Enkaam quyaghllaguusi repall aapghwaaghpagningitaghsi angtalanga quyalleghpesi,

⁹ qayughllak allgeghtengngukesi yugulillgha unguvasighpesi. Taananguuq apallaa ugpeqilghiisi Christ‑akun.

¹⁰ Neghighluku uuknaliqistet liigikngwaaghnaqegkaqaat taana yugulilleq. Uuknaliqutkegkaqaat tunusaq Kiyaghneghem tuunyaghqaa elpesinun.

¹¹ Taghneghakek Christ‑am uuknaliqistet ilungitnitkaaguk. Ungipaatekestaqaqii ikfiqelleghqaaneng Christ‑am, quulvallengelleghqaghllaganengllu ikfiqellghan kingunganeng. Enkaam uuknaliqistet liigiknaqutkegkaqaat kinanguyaghqaatanga Christ‑a, qakunllu tamaakut piyaghqaatangi.

¹² Kiyaghneghem uuknaliqistet liigikestekaqii uuknaliqutkegkiit ellngitnun pingunghinniluki, iwernga elpesinun pinguniluki. Agleghnalghiik Taghneghak kayagtekaaguk qilagmeng. Ellngan aghtughyaghqaanghillghakun ungipaqilghiit Pinilghiineng Ungipaneng ungipaatkaqiisi tamaaken. Talwa yaqulget liigiksupigtekaqiit tamaakut.

Ugpeqat Kiyaghsaghqaagut Pelungilluteng

¹³ Enkaangam umyugasi apeghiighsaghwaaghluki ayuqiteki salleghqamun. Umyugasi whateghlluwaaghuluki, sighimakngwaaghteggullu tunusaq yugulillengelleq Kiyaghneghem tuunyaghqaa Jesus Christ‑a tagikan.

¹⁴ Qaatkullusi Kiyaghneghmun qayughllak avaqutaqiisi. Enkaam atuqegpenaki seghleghet piyukellesi atuqnguyaqesi. Tawatesaghtusi nallukutegpesineng naten Kiyaghneghem kiyaghtesqesullghan ayuqutanga.

¹⁵ Kiyaghneq nakmikestezi, pelungitutanganeng elpesillu pelungitek salleghpesigun tamaghhaakun.

¹⁶ Akuzitni Igaqegkani igaqngaaq, “Pelungitek qayughllak whanga pelungitunga.”

¹⁷ Yughaneghpesini Kiyaghneghmun Atakniiqaghsi. Nanqigtaqaa atunengwaaq yuuk tamaghhaan salleghtulngatun. Enkaam talluqiteggu nunataamalusi nunami whani.

¹⁸ Liisimakaghsi sivunghani kiyaghtekaagusi sasiigpenasi katam sivuneghpesistun. Iwernga Kiyaghneghem itemutkaqiisi taagken sasiinghilngughmeng kiyaghtaalleghmeng. Tukfillghitiisi silver‑meng nalighmeng gold‑meng naavegkayugmeng,

¹⁹ iwernga tukfiqaqiisi megnunapiglleghhiimeng aawaneng Christ‑am. Ellnga penniighaghaghtun ayuquq sallwhaaghhiilnguq.

²⁰ Kiyaghneghem nakmikegkaqaa Christ‑a talwa sivungani nuna ulimallghilluku. Maaten kingulighni aghneghni aliightekaqaa elpesi apalluqlusi.

²¹ Christ‑akun ugpeqaghsi Kiyaghneq. Ellngan unguvaghtekaqaa Christ‑a tuqulleghmeng, quulvaghllakaqaallu. Tamaaken apalluqluku ugpeqilleghsi, sighimalleghsi Kiyaghneghmun ayuquq.

²² Qaatkutelleghqun ipapighqelleghmun pelungightekaqasi unguvasisi, enkaam piniqepiigasi ugpeqaalgutesi. Piniqutekestaghtek ilugpesineng qamaken.

²³ Allgenqigtekaagusi. Unguvalleghraghaghsi tuqukayugmeng pingunghituq, iwernga tuqungigalngughmeng pinguuq. Allgenqigtekaagusi Kiyaghneghem akuzitangitgun, unguvalghiit, kenlengilnguut.

²⁴ Akuzitni Igaqegkani igaqngaaq, “Qamaglluteng yuget vegaaghestun ayuqut, pinighnallghillu piitesighaghestun ayuqut. Vegaaghet palighaqut, piitesighaatlu ifkaghaqut,

²⁵ iwernga akuzitangi Kiyaghneghem quunpekaghqaagut.” Taakusta akuzitet Pinilghiit Ungipat ungipaqegkangit elpesinun.