उत्तम गीत 8 - पबितर बाईबलसमकालीन छत्तीसगढ़ी अनुवाद

¹ कास, तेंह मोर भाई के सहीं होते, जऊन ह मोर दाई के छाती ले दूध पीये रिहिस। तब, कहूं मेंह तोला बाहिर म भेंटतेंव, त में तोला चूमतेंव, अऊ कोनो मोला तुछ नइं समझतिन।

² मेंह तोला डहार देखातेंव अऊ तोला अपन दाई के घर म ले आतेंव— जऊन ह मोला सिखोय हवय। मेंह तोला पीये बर मसाला मिले अंगूर के मंद देतेंव, अऊ अपन अनार के रस घलो देतेंव।

³ ओकर डेरी हांथ मोर मुड़ के तरी म हवय अऊ ओकर जेवनी हांथ ह मोला पोटारथे।

⁴ हे यरूसलेम के बेटीमन, मेंह तुमन ला किरिया खवाके कहत हंव: जब तक मया ह खुदे नइं जाग उठय, तब तक तुमन ओला झन भड़कावव या जगावव।

सहेलीमन

⁵ येह कोन ए जऊन ह अपन मयारू ऊपर मुड़ टेके सुनसान जगह ले चले आवत हे? सेव रूख के तरी म मेंह तोला जगांय; उहां तोर दाई ह तोला गरभ म धरिस, उहां ओह पीरा सहके तोला जनम दीस।

दुलहिन

⁶ तें मोला मुहर के सहीं अपन हिरदय म लगा ले, अऊ मुहर के सहीं अपन बाहां म लगा ले; काबरकि मया ह मिरतू के सहीं बलवान ए, येकर जलन ह कबर के सहीं निरदयी अय। येह धधकत आगी सहीं बरथे, येह एक बड़े जुवाला सहीं बरथे।

⁷ पानी के बाढ़ ह घलो मया ला नइं बुता सकय; नदीमन येला बहाके नइं ले जा सकंय। यदि कोनो अपन घर के जम्मो संपत्ति ला मया के बदला म दे देवय, तभो ले ओ संपत्ति ला बहुंत तुछ समझे जाही।

सहेलीमन

⁸ हमर एक छोटे बहिनी हवय, ओकर छाती ह अभी नइं बढ़े हवय। जऊन दिन हमर बहिनी के बारे म गोठियाय जाही, ओ दिन हमन ओकर बर का करबो?

⁹ कहूं ओह दीवार होतिस, त हमन ओकर ऊपर चांदी के मीनार बनातेंन। कहूं ओह कपाट होतिस, त हमन देवदार रूख के पल्ला ले ओला बंद करतेंन।

दुलहिन

¹⁰ मेंह एक दीवार अंव, अऊ मोर छातीमन मीनार के सहीं अंय। ये किसम ले मेंह ओकर आंखी म संतोस देवई सहीं हो गे हंव।

¹¹ बाल-हामोन म सुलेमान के एक ठन अंगूर के बारी रिहिस; ओह अपन अंगूर के बारी ला किरायादारमन ला दे दीस। ये ठहिराय गीस कि हर किरायादार ह फर के बदले चांदी के एक हजार सेकेल दीही।

¹² पर मोर खुद के अंगूर के बारी ह तो मोर अय अऊ मेंह येला कोनो ला भी दे सकत हंव; हे सुलेमान, एक हजार सेकेल तो तोर बर अय, अऊ दू सौ सेकेल ओमन बर अय, जऊन मन येकर फर के देखरेख करथें।

दूल्हा

¹³ तें जो बारीमन म, अपन सहेलीमन संग रहिथस, मोला तोर अवाज सुनन दे!

दुलहिन

¹⁴ हे मोर मयारू, जल्दी आ, अऊ छोटे सुघर हिरन सहीं हो जा या मसाला ले भरे पहाड़मन ऊपर जवान बारासींगा सहीं हो जा।