भजन-संहिता 146 - पबितर बाईबलसमकालीन छत्तीसगढ़ी अनुवाद

भजन-संहिता 146

¹ यहोवा के परसंसा करव। हे मोर मन, यहोवा के परसंसा कर।

² मेंह जिनगी भर यहोवा के परसंसा करहूं, जब तक मेंह जीयत रहिहूं, मेंह अपन परमेसर के परसंसा के गीत गाहूं।

³ हाकिममन ऊपर भरोसा झन रखव, न ही कोनो मनखे ऊपर, जऊन ह कि रकछा नइं कर सकय।

⁴ जब ओमन के परान चले जाथे, त ओमन माटी म मिल जाथें; ओहीच दिन ओमन के योजना ह खतम हो जाथे।

⁵ धइन अंय ओमन, जेमन के मददगार याकूब के परमेसर ए, जेमन के आसा ह यहोवा ओमन के परमेसर ऊपर रहिथे।

⁶ ओह अकास अऊ धरती, समुंदर, अऊ ओमा के जम्मो चीजमन ला रचे हवय— ओह हमेसा बिसवासयोग्य बने रहिथे।

⁷ ओह दुखित-पीड़ितमन के नियाय करथे अऊ भूखन मनखेमन ला जेवन देथे। यहोवा ह कैदीमन ला छुड़ाथे,

⁸ यहोवा ह अंधरा ला आंखी देथे, यहोवा ह ओमन ला ऊपर उठाथे, जऊन मन खाल्हे झुकथें, यहोवा ह धरमीमन ले मया करथे।

⁹ यहोवा ह परदेसीमन के रखवारी करथे अऊ अनाथ अऊ बिधवामन ला संभालथे, पर ओह दुस्टमन के योजना ला बिगाड़ देथे।

¹⁰ यहोवा ह सदा-सर्वदा राज करथे, हे सियोन, तोर परमेसर ह पीढ़ी-पीढ़ी तक राज करथे। यहोवा के परसंसा करव।