भजन-संहिता 12 - पबितर बाईबलसमकालीन छत्तीसगढ़ी अनुवाद

भजन-संहिता 12

संगीत के निरदेसक बर। सेमिनित के मुताबिक दाऊद के एक भजन।

¹ हे यहोवा, मदद कर, काबरकि अऊ कोनो वफादार नइं अंय; जऊन मन बिसवासयोग्य अंय, ओमन मनखेमन के बीच ले गायब हो गे हवंय।

² हर एक मनखे अपन परोसी ले लबारी मारथे; ओमन अपन मुहूं ले चापलूसी करथें पर अपन मन म धोखा के बात रखथें।

³ यहोवा ह जम्मो चापलूसी करइया मुहूं अऊ हर ओ घमंड करइया जीभ ला बंद कर देवय—

⁴ जेमन कहिथें, “हमन अपन जीभ के दुवारा जीत जाबो; हमर खुद के ओंठ ह हमर बचाव करही—हमर मालिक कोन अय?”

⁵ यहोवा ह कहिथे, “मेंह अब उठहूं, काबरकि गरीब मनखे ला लूटे जाथे अऊ जरूरतमंद ह कलहरथे। मेंह ओमन ला ओ मनखेमन ले बचाहूं, जेमन ओमन ला कलंकित करत हें।”

⁶ यहोवा के बचन म कोनो कमी नइं ए, येह भट्ठी म सुध करे गे चांदी के सहीं अय, ये सात बार सुध करे गे सोन के सहीं अय।

⁷ हे यहोवा, तेंह जरूरतमंद ला सही-सलामत रखबे अऊ हमन ला हमेसा बर ओ दुस्टमन ले बचाय रखबे,

⁸ जेमन अकड़के चलथें जब दुस्टता ला मनखेमन के दुवारा आदर करे जाथे।