भजन-संहिता 11 - पबितर बाईबलसमकालीन छत्तीसगढ़ी अनुवाद

भजन-संहिता 11

संगीत के निरदेसक बर दाऊद के एक भजन।

¹ मेंह यहोवा करा सरन लेथंव। तब तेंह मोला कइसे कह सकत हस: “चिरई के सहीं अपन पहाड़ करा उड़ जा।

² काबरकि देख, दुस्ट मनखेमन अपन धनुस ला साधत हें; ओमन तीर ला धनुस के डोरी म रखत हें ताकि अंधियार म ले सीधवा मनखे ऊपर तीर चलावंय।

³ जब नीव ला गिराय जावत हे, त फेर धरमी ह का कर सकथे?”

⁴ यहोवा ह अपन पबितर मंदिर म हवय; यहोवा ह अपन स्वरग के सिंघासन म बिराजे हवय। ओह धरती ऊपर हर एक जन ला देखत रहिथे; ओकर आंखी ह ओमन ला परखथे।

⁵ यहोवा ह धरमी ला परखथे, पर ओह ओ दुस्टमन ले बहुंत घिन करथे, जेमन हिंसा ले मया करथें।

⁶ दुस्ट मनखेमन ऊपर परमेसर ह बरत कोइला अऊ बरत गंधक बरसाही; लेसा देवइया हवा ह ओमन के भाग होही।

⁷ काबरकि यहोवा ह धरमी अय, ओह नियाय ले मया करथे; धरमी मनखे ह ओकर दरसन करही।