नीतिबचन 5 - पबितर बाईबलसमकालीन छत्तीसगढ़ी अनुवाद

बेभिचार के बिरोध म चेतउनी

¹ हे मोर बेटा, मोर बुद्धि के बात ऊपर धियान लगा, अऊ मोर समझ के बात ला सुन,

² ताकि तोर बिबेक ह सही रहय अऊ तोर मुहूं ले गियान के बात निकलय।

³ काबरकि छिनारी माईलोगन के मुहूं ले गुरतूर बात निकलथे, अऊ ओकर बात ह तेल ले घलो जादा चिकना होथे;

⁴ पर आखिर म, ओह पित्त के सहीं करू, अऊ दूधारी तलवार सहीं चोख होथे।

⁵ ओकर गोड़मन मिरतू कोति जाथें; अऊ ओकर पांवमन सीधा कबर करा ले जाथें।

⁶ ओह जिनगी के रसता के बारे म बिचार नइं करय; ओह एती-ओती भटकथे, पर ओह ये बात ला नइं जानय।

⁷ एकरसेति, हे मोर बेटामन, मोर बात ला सुनव, अऊ जऊन कुछू मेंह कहिथंव, ओला मानव।

⁸ अइसने छिनारी माईलोगन ले दूरिहा रहव, अऊ ओकर घर के लकठा म घलो झन जावव,

⁹ नइं तो तुम्हर मान-सम्मान दूसरमन करा चल दीही अऊ निरदयी मनखे ह तुम्हर परतिस्ठा ला ले लीही।

¹⁰ या अजनबीमन तुम्हर संपत्ति म मजा उड़ाहीं अऊ तुम्हर मेहनत ह दूसरमन ला धनवान बनाही;

¹¹ अऊ अपन जिनगी के आखिरी बेरा म, जब तुम्हर देहें ह कमजोर हो जाही, त तुमन कलहरहू;

¹² अऊ ये कहिहू, “मेंह अनुसासन म काबर नइं रहेंव, अऊ दूसर के डांट ला काबर तुछ जानेंव!

¹³ मेंह अपन गुरूमन के बात ला नइं मानेंव अऊ अपन सिखोइयामन के बात ला नइं सुनेंव।

¹⁴ मेंह तुरते परमेसर के मनखेमन के सभा म गंभीर समस्या म रहेंव।”

¹⁵ तें अपन ही जलासय, अऊ अपन ही कुआं के सोत के पानी पीये कर।

¹⁶ का तोर झरना के पानी गलीमन म, अऊ पानी के धारा गली के चऊकमन म बहय?

¹⁷ ओह सिरिप तोरेच रहय, अऊ अजनबीमन संग बांटे बर नइं।

¹⁸ तोर पानी के सोता आसीसित रहय, अऊ तें अपन जवानी के घरवाली संग आनंद मना।

¹⁹ ओह तोर बर एक मयारू हिरनी, एक सुघर सांबरनी सहीं होवय— ओकर छाती ह तोला हमेसा खुस रखय, अऊ तेंह ओकर मया म हमेसा बंधे रह।

²⁰ हे मोर बेटा, आने मनखे के घरवाली के मया म तेंह काबर मोहित होबे? अऊ एक छिनार ला अपन छाती ले काबर लगाबे?

²¹ काबरकि तोर चालचलन ला यहोवा ह देखत हवय, अऊ ओह तोर जम्मो चालचलन ला परखथे।

²² दुस्ट मनखेमन अपनेच अधरम के काम म फंसथें; ओमन अपनेच पाप के बंधन म कसके बंधे रहिथें।

²³ ओमन सिकछा के कमी के कारन मर जाहीं, अऊ अपनेच मुरूखता के कारन भटक जाहीं।