यसायाह 11 - पबितर बाईबलसमकालीन छत्तीसगढ़ी अनुवाद

यिसै के डाली

¹ यिसै के ठूंठ म ले एक डंगाल फूट निकलही; ओकर जरी म ले एक ठन डंगाल ह फरही।

² यहोवा के आतमा ओकर ऊपर ठहिरही— येह बुद्धि अऊ समझ के आतमा, युक्ति अऊ पराकरम के आतमा, गियान के आतमा अऊ यहोवा के डर होही—

³ अऊ ओह यहोवा के डर म खुस होही। ओह मुहूं देखके नियाय नइं करही, या अपन कान ले सुनके निरनय नइं करही;

⁴ पर धरमीपन ले ओह जरूरतमंद के नियाय करही, अऊ धरती के गरीबमन के निरनय सच्चई से करही। ओह धरती ला अपन बचन के छड़ी ले मारही; अऊ अपन फूंक के झोंका ले ओह दुस्टमन ला मिटा दीही।

⁵ धरमीपन ह ओकर पट्टा अऊ बिसवासयोग्यता ह ओकर कनिहां के पट्टी होही।

⁶ भेड़िया ह मेढ़ा-पीला के संग रहिही, अऊ चीतवा ह छेरी संग बईठही, बछवा अऊ सेर अऊ पसु के पीला एक संग रहिहीं; अऊ एक छोटे लड़का ह ओमन के अगुवई करही।

⁷ गाय अऊ भालू एके संग चरहीं, ओमन के पीलामन एक संग बईठहीं, अऊ सिंह ह बईला सहीं भूंसा खाही।

⁸ दूध पीयत लइका ह नाग सांप के बिल मेर खेलही, अऊ छोटे लइका ह करैत के बिल म हांथ डालही।

⁹ मोर जम्मो पबितर पहाड़ ऊपर न तो ओमन चोट पहुंचाहीं अऊ न ही नास करहीं, काबरकि धरती ह यहोवा के गियान ले अइसन भर जाही जइसन पानी समुंदर म भरे रहिथे।

¹⁰ ओ दिन यिसै के जरी ह मनखेमन बर एक झंडा होही; जाति-जाति के मनखेमन ओकर करा जूरहीं, अऊ ओकर अराम करे के जगह ह महिमामय होही।

¹¹ ओ दिन परभू ह दूसर बेर अपन बांचे मनखेमन ला सुधारे बर अस्सूर ले, मिसर के खाल्हे भाग ले, ऊपरी मिसर ले, कूस ले, एलाम ले, बेबिलोनिया ले, हमात ले, अऊ भूमध्य सागर के द्वीपमन ले हांथ बढ़ाके लानही।

¹² ओह जाति-जाति के मनखे बर एक ठन झंडा ठाढ़ करही अऊ इसरायल के बंधुवामन ला इकट्ठा करही; ओह यहूदा के सब बगर गय मनखेमन ला धरती के चारों कोना ले इकट्ठा करही।

¹³ फेर एपरैम के डाह करई ह खतम हो जाही, अऊ यहूदा के बईरीमन ला नास करे जाही; एपरैम ह यहूदा ले डाह नइं करही, अऊ न ही यहूदा ह एपरैम ला तंग करही।

¹⁴ ओमन पछिम कोति ढाल म पलिस्तीमन ऊपर टूट पड़हीं; एक संग मिलके ओमन पूरब कोति के मनखेमन ला लूटहीं। ओमन एदोम अऊ मोआब ला जीत लीहीं, अऊ अमोनीमन ओमन के अधीन हो जाहीं।

¹⁵ यहोवा ह मिसर के समुंदर के खाड़ी ला सूखा दीही; झुलसा देवइया हवा के संग ओह फरात नदी ऊपर अपन हांथ बढ़ाही। ओह येला सात ठन धारा म बांट दीही ताकि मनखेमन रेंगत ओ पार हो जावंय।

¹⁶ ओकर बांचे मनखेमन बर अस्सूर ले एक अइसन राजमार्ग होही, जइसन इसरायलीमन बर रिहिस, जब ओमन मिसर देस ले निकलके आईन।