होसे 14 - पबितर बाईबलसमकालीन छत्तीसगढ़ी अनुवाद

आसीस पाय बर पछताप

¹ हे इसरायल, यहोवा अपन परमेसर करा लहुंट आ। तोर पापमन तोर पतन होय के कारन अंय!

² यहोवा के बातमन ला मान अऊ ओकर मेर लहुंट आ। ओकर ले बिनती करके कह: “हमर जम्मो पापमन ला छेमा कर अऊ अनुग्रह के संग हमन ला गरहन कर, कि हमन अपन मुहूं ले धनबाद रूपी भेंट चघा सकन।

³ अस्सूर ह हमर उद्धार नइं कर सकय; हमन लड़ई के घोड़ामन ऊपर सवार नइं होवन। हमन अपन हांथ ले बनाय मूरतीमन ला फेर कभू नइं कहन ‘हमर देवता’, काबरकि अनाथ ला तोर ले ही करूना मिलथे।”

⁴ यहोवा ह कहिथे, “मेंह ओमन के हठी सुभाव ला ठीक करहूं अऊ खुला रूप ले ओमन ले मया करहूं, काबरकि मोर कोरोध ह ओमन के ऊपर ले हट गे हवय।

⁵ मेंह इसरायल बर ओस असन होहूं; ओह कुमुदिनी फूल असन खिलही। लबानोन के देवदार रूख असन ओकर जरीमन खाल्हे गहिरा म जाहीं;

⁶ ओकर कोअंर पीकामन बाढ़हीं। ओकर सोभा एक जैतून रूख सहीं होही, अऊ ओकर खुसबू लबानोन के देवदार रूख सहीं होही।

⁷ मनखेमन फेर ओकर छइहां म निवास करहीं; ओमन अनाज के असन बाढ़हीं, ओमन अंगूर के नार असन फूलहीं-फरहीं— इसरायल के खियाती ह लबानोन के अंगूर के मंद कस होही।

⁸ हे एपरैम, मूरतीमन ले अब मोर का काम? मेंह ओला जबाब दूहूं अऊ ओकर खियाल रखहूं। मेंह बाढ़त सनोवर के रूख असन अंव; तोर म फर धरई ह मोर कारन होथे।”

⁹ बुद्धिमान कोन ए? ओमन ला ये बातमन के अनुभव करन दव। समझदार कोन ए? ओमन ला समझन दव। यहोवा के रद्दामन सही अंय; धरमीमन ओमा चलथें, पर बिदरोही मनखेमन ओमा ठोकर खाके गिरथें।