एजरा 1 - पबितर बाईबलसमकालीन छत्तीसगढ़ी अनुवाद

राजा कुसरू के मदद ले यहूदीमन के घर लहुंटई

¹ फारस के राजा कुसरू के राज के पहिला बछर म यहोवा ह फारस के राजा कुसरू के मन ला उभारिस कि यहोवा के जऊन बचन यरमियाह अगमजानी के दुवारा कहे गे रिहिस, ओह पूरा हो जाय, एकरसेति राजा कुसरू ह अपन जम्मो राज म ये परचार करवाईस अऊ लिखवा भी दीस:

² “फारस के राजा कुसरू ह ये कहत हे: “ ‘यहोवा, स्वरग के परमेसर ह धरती भर के जम्मो राज ला मोला दे हवय, अऊ ओह मोला यहूदा प्रदेस के यरूसलेम म ओकर बर एक मंदिर बनाय बर ठहिराय हवय।

³ तुम्हर बीच म ले, ओकर जऊन भी मनखे यहूदा के यरूसलेम जाय चाहत हवंय, ओमन जा सकत हें अऊ ओ यहोवा, इसरायल के परमेसर के मंदिर ला बनावंय, जऊन ह यरूसलेम म हवय, अऊ ओमन के परमेसर ह ओमन के संग रहय।

⁴ अऊ कोनो भी जगह म जिहां बांचे मनखेमन रहत हवंय, ओ जगह के मनखेमन सोन अऊ चांदी, धन अऊ पसु देके, ओमन के मदद करंय अऊ यरूसलेम म परमेसर के मंदिर बर स्वेच्छा-बलिदान देवंय।’ ”

⁵ तब यहूदा अऊ बिनयामीन के परिवार के मुखियामन, अऊ पुरोहितमन अऊ लेवीमन—जेमन के मन ला परमेसर ह उभारे रिहिस, ओमन जाके यरूसलेम म यहोवा के भवन ला बनाय बर तियार हो गीन।

⁶ ओमन के जम्मो परोसीमन सोन अऊ चांदी, चीज-वस्तु अऊ पसु, अऊ अनमोल भेंट देके, ओमन के मदद करिन; येकर अलावा ओमन स्वेच्छा-बलिदान घलो दीन।

⁷ फेर राजा कुसरू ह यहोवा के मंदिर के ओ चीजमन ला बाहिर ले आईस, जेला राजा नबूकदनेसर ह यरूसलेम ले लानके अपन देवता के मंदिर म रखे रिहिस,

⁸ ओमन ला फारस के राजा कुसरू ह मिथरदात खजांची के दुवारा निकलवाईस, जऊन ह ओमन ला गनके यहूदीमन के परधान सेसबसर ला सऊंप दीस।

⁹ ओ चीजमन के गनती ये रिहिस: सोन के बरतन 30; चांदी के बरतन 1,000; चांदी के परात 29;

¹⁰ सोन के कटोरा 30; ओमन सहीं चांदी के कटोरा 410; आने किसम के बरतन 1,000;

¹¹ सोन अऊ चांदी के कुल 5,400 चीजमन रिहिन। ये जम्मो ला सेसबसर ह बंधुवा मनखेमन के संग म लानिस, जब ओमन बेबिलोन ले यरूसलेम आईन।