THITE 1 - Ebrié New Testament 1996

Phɔ́lu ébhi néphan

¹ Áhrɔ́ lókɔn áchan Phɔ́lu yé, mɛn ni Yankan júmánwo, saji mɛn ni Jezwi-Krisi-mranchɛ́wo. Wo ha mɛn júmán mɔ́n mɛn salé néphan khúnbrɛn khɛ́n Yankan san, mɛn do wo má mímíbhú hrómɛn, ló mɛn chɛ́ wo yɛ́n ábhwe mímí asakhɔ lo mímíbhú hrómɛn

² ló wo bhó wo mwasrui tré ńmɛpɔ́bhá álephú tho. Yankan lókɔn khɛ́n ali lephan ále lítan, ńphrɛ tɔ ńmɛpɔ́bhá bhwe tre lo lé, lómánji khɛ́n áyí khúnbrɛn bhɔhɛ́n;

³ ló lóka ácí si, ábhwetɔ́ lókɔn wo bho ha mɛn mɔ́n mɛn, lóhrómɛn nɔn Yankan khɔ bho ńmɛpɔ́bhá thándi, ló ábhwe lókɔn, Yankan ali lo Dókáwo hɛ́n hrómɛn, lónɔn mɛɛ́n tɔ sé néphan khúnbrɛn oyé.

⁴ Thite, mɛn tɛ́ áhrɔ́ lókɔn thu hɛ, hɛ nɔn ɛli mɛn bhi mɛn ho mímíbhú hrómɛn, mímíbhú lókɔn khɛ́n ali áyí lo khúnbrɛn lo pɛ: Tɛmɛ Yankan ali lo The, le Jezwi-Krisi ali lo Dókáwo, osé hɛ áphɔlíman le ńthɛ́nkhwálé.

Thite júmán ábha lí Khrɛ́thi gotho

⁵ Mɛn yɔ hɛ kálé Khrɛ́thi gotho salé ábhwe kpɛ́kpɛ akha bháne, ɛprimán lókhúnbrɛn ophú, ló Yankan-nkhú brɛ brɛ hromɛn, ɛsán mrɔ́khómán chré áyákhru tho. Ábhwe mɛn phrɛ tɔ se hɛ, tɛmɛ odi hɛ mwanhɛ́n:

⁶ lónɔn ali salé, lephan khɛ́n wo san ali bhrɔ́khó, olépɛ ábhwe bhrií mɛ́n phɔ, áyɔn sa anní bhie brɛ nca, ló mɛ́n miɔn olí mímíbhúmán, wo le lí ńmiɔ́ bɛn elí phromɛn khɛ́n ále ji lephan.

⁷ Lephan khɛ́n éyalí Yankan-gbemán, áleyɔn sa ogɛ ábhwe bhrií mɛ́n phɔ. Yankan júmán abha mɛ́n mɔ́n mɛn hɛ́nthé, áleyɔn sa anní mɛ́nfúwo, thɛnyanháwo, ndɛnánwo, thawo, saji annɛn ní mɛhɛ́ngɛ́wo jɛtɛn phɔ.

⁸ Áyɔn sa anmó thɛ́nbhwá mɛn do néphan ebhá mɛ́n phɔ, ló mɛ́n thɛ́n opɔ́ áyíbhwá. Áyɔn sa anní mɛbhíjánwo, lephan apriman, lephan atɛ créncré, lephan ali mɛ́n nbrɛn.

⁹ Lephan lókɔn, áyɔn sa anhɔ́n ábhwe mímí pɛ kpɛ́ɛ́n, sa lósi wo khɔ bho lie lephan khúnbrɛn. Kasé antɛ́ áyí yábhɛ lókɔn, lónɔn ábha se sɛ́npɛ́ antɔ ábhwe apriman ha néphan nankhɛ, saji wo khɛ́n wo le dɛn do ábhwetɔ́ lókɔn, anchɛ́ wo yɛ́n wo phɔkhrɛ.

¹⁰ Átɛsalé ápɛ néphan búdúbúdú bha wo hromɛn, khɛ́n Jwifunɛ́n ali krethiɛn nɔn athubhɔ. Wo lókɔn, wo gɛ lo ɔ́nmɔn wo éswan, ló wo bho wo bhwe phromɛn phromɛn pɛ wo ékhrɛ néphan.

¹¹ Néphan lókɔn, áyɔn sa otɛ́ wo bhwetɔ́ odɔ́nya, átɛsalé jɛtɛn wo bhá khrɛ néphan gɛ hɛ́nthé, wo ésakhɔ́ khúmɛ́n khúmɛ́n lɔ néphan hɛ́nphe, ló wo élie yí phromɛn phromɛn.

¹² Khrɛ́thi khúbhɛ́nɛ́n, wo bɛn nbrɛn khúbhɛ́ bhwetɔ́trémán hrómɛn lephan bɛn nɔn atɔ salé: “Khrɛ́thi khúbhɛ́nɛ́n, wo-ɛ lócí-áan wo li kpakprámán, wo li ńbranmán áha thɛ́nyan, wo li nánmán dɔnbɛn achre ébhu nɛnlí mwanhɛ́n.”

¹³ Ábhwe lókɔn ńtɔ áli ábhwe mímí. Lóhɛ́nthé, áyɔn sa ɛgbrɛ wo mɛ́n khrákhrá mɛn, lónɔn ábha chɛ́ wo pɛ mímíbhú apriman,

¹⁴ ló wo bha lé bhlɛgɛ Jwifunɛ́n nɛ́bhɔ́ bhwe phɔ, ló saji wo bha lé bhlɛgɛ néphanmiɔn bidí phɔ, lóyí khúnbrɛn lókɔn néphan bháne etɛ́, lónɔn achɛ wo hɔn ábhwe mímí fɔ́nka bu.

¹⁵ Néphan khɛ́n wo phɔ chan, wo áyí khúnbrɛn chan se wo; lókhɛ́n néphan wo phɔ le chan, néphan alepɛ mímíbhú, wo, álepɛ yí achan se wo, átɛsalé áyíléletɛ́ álɔ wo bhweyɛ́n le wo yrɛnnɛn.

¹⁶ Wo étɔlé wo yɛn Yankan, lókhɛ́n wo yítɛ́ ká njɛ. Wo li néphan phromɛn, wo lé ji lephan, wo lé gɛ tɛ́ áyí ayɔn.