RƆ́MƐN KHÚBHƐ́NƐ́N 1 - Ebrié New Testament 1996

Phɔ́lu ébhi néphan

¹ Mɛn hɛ́n li Phɔ́lu, mɛn nɔn mɛn tɛ áhrɔ́ lókɔn, mɛn ni Jezwi-Krisi nɛnkhwɛ́nwo, mɛn ni Krisi-mranchɛ́wo bɛn Yankan san, ló ńche mɛn salé mɛn mó Ábhwe Bhwábhwá lókɔn tɔ sé néphan oyé.

² Ábhwe Bhwábhwá lókɔn, godo-áan Yankan khɔ mɛ́n bhwetɔ́trémán phɔ tɔ lóbhwe tre, ló wo lrɛ ha Yankan hrɔ́ hrómɛn.

³ Ábhwe lókɔn áli Yankan Mi, lo Hwánthe Jezwi-Krisi phɔ bhwe: ló ali ńnánmí hrómɛn bhwetɔ́, ógɛ tɔlé Jezwi chan Davi mándo hromɛn;

⁴ lókhɛ́n ló achan Nánnánmi Créncré hrómɛn, ógɛ tɔlé Yankan hɔn-ɛn thandi se néphan wu sɛ́npɛ́ mɛn salé mímí nbrɛn ńni Yankan Mi lóka ńchan khúnɔn mɛn fe.

⁵ Mɛ́n phɔ nɔn Yankan khɔ se mɛn áphɔlíman, lónɔn mɛn ni Krisi-mranchɛ́wo Krisi hɛ́nthé, ochɛ́sé mɛn do néphan khúnbrɛn abha aféchwe hromɛn má, wo bhú mímí, ló wo ji Krisi.

⁶ Hɔ́n khɛ́n ɔ́n ma Rɔ́mɛn khúbhɛ́, hɔ́n lɔ, ɔ́n ma néphan lókɔn hromɛn, hɔ́n nɔn Yankan che hɔ́n lée ɔ́n ma lí Jezwi-Krisi néphan.

⁷ Lóhɛ́nthé, mɛn tɛ́ hrɔ́ thu hɔ́n khúnbrɛn ɔ́n ma Rɔ́mɛn khúbhɛ́, ɔ́n ni néphan bɛn Yankan pɔ, ló Yankan che hɔ́n salé ɔ́n ma lí mɛ́n gbemán. Tɛmɛ lo The Yankan le lo Hwánthe Jezwi-Krisi ɔ́nmɔn osé hɔ́n áphɔlíman le ńthɛ́nkhwálé.

Phɔ́lu énɛn olo wú krethiɛnmán abha Rɔ́mɛn khúbhɛ́

⁸ Ló athwasi, Jezwi-Krisi hɛ́n hrómɛn mɛn ná Yankan nansi sé hɔ́n khúnbrɛn, átɛsalé hɔ́n mímíbhú ɔ́n pɛ, áthéji khúnbrɛn néphan étɔ lóbhwe.

⁹ Yankan yɛn salé ábhwe lókɔn mɛɛ́n tɔ áli ábhwe mímí. Yankan lókɔn khɛ́n mɛn mo mɛn thɛ́n khúnbrɛn mɛn mɛn ní mɛ́n júmán, lókhɛ́n mɛɛ́n tɔ Ábhwe Bhwábhwá ali mɛ́n Bhi phɔ bhwe sɛ nɛphan oyé. Yankan yɛn salé hɔ́n bhwe édi mɛn mwanhɛ́n ákakhúnbrɛn.

¹⁰ Lóka mɛɛ́n na Yankan, mɛɛ́n mi Yankan salé kasé ńpɔ cíbɛn anchɛ́ mɛn di hɔ́n ntakhú.

¹¹ Átɛsalé mímí nbrɛn, mɛɛ́n nɛn mɛn wú hɔ́n, ló mɛn sé hɔ́n ndubhɔ́ nánnánmi hromɛn, ochɛ́sé ɔ́n gɛlé ya.

¹² Mɛn bhwe mɛɛ́n nɛn mɛn tɔ sé hɔ́n nɔn ali salé, tɛmɛ lo dɔnmán lo bɛn nbrɛn mɔ́n, tɛmɛ hɔ́n lɔ ɔ́n khɔ́ mɛn mímíbhú hrómɛn gɛ mɔ́ndɔ́nman, ló mɛn lɔ mɛn khɔ́ hɔ́n mímíbhú hrómɛn gɛ mɔ́ndɔ́nman.

¹³ Mɛn hɔnsɛ́nhɔn, mɛɛ́n nɛn mɛn chɛ́ hɔ́n yɛ́n salé ákakhúnbrɛn, mɛɛ́n nɛn lósi mɛn khɔ́ no wú hɔ́n, lókhɛ́n mɔ́nsitú lé dɛn mɛn. Mɛɛ́n nɛn salé hɔ́n hrómɛn lɔ, mɛn do néphan sé Yankan sa lósi mɛn khɔ tɛ ágotho si nankhɛ khúnbrɛn mɛn sakhɔ.

¹⁴ Mɛn, néphan khúnbrɛn pɛn bha mɛn phɔ, néphan ayɛn bhwe le néphan ale yɛn bhwe, néphan ayɛn hrɔ́ le néphan ale yɛn hrɔ́.

¹⁵ Lóhɛ́nthé, hɔ́n khɛ́n ɔ́n ma Rɔ́mɛn khúbhɛ́, hɔ́n lɔ énɛn salé mɛn má hɔ́n yéne, ló mɛn tɔ Ábhwe Bhwábhwá lókɔn sé hɔ́n yé.

Ábhwe Bhwábhwá lókɔn ápɛ sɛ́npɛ́

¹⁶ Mɛn mo mɛn mímíbhú khúnbrɛn tre Ábhwe Bhwábhwá lókɔn tho: lónɔn ali Yankan sɛ́npɛ́ abho éswa néphan khúnbrɛn abhu mímí. Jwifunɛ́n thwási, lómánji áse néphan aleli Jwifunɛ́n.

¹⁷ Átɛsalé Ábhwe Bhwábhwá lókɔn élie lósi Yankan khɔ etɛ́ néphan priman sé mɛ́n nbrɛn: achan áyí khúnbrɛn ka abhɔhɛ́n alo di lómɛ́n si aphu, mímíbhú míbrɛ hromɛn nɔn ábhwe khúnbrɛn bha. Lóhɛ́nthé Yankan hrɔ́ étɔlé: “Néphan Yankan khɔ mímíbhú hrómɛn tɛ priman ɔn, wo bhá bhá mɛpɔ́.”

Néphan khúnbrɛn li pɔn Yankan hɛ́nmɛn

¹⁸ Yankan bha tho édo thɛ́nyan sé ńne le áyíléle khúnbrɛn néphanmiɔn etɛ́, wo yíléle lókɔn khɛ́n ále dɛn néphan yɛ́n ábhwe mímí.

¹⁹ Yankan etɛ́ yí dri wo phɔ, átɛsalé wo yɛn Yankan phɔ bhwe khúnbrɛn phu, Yankan nbrɛn nɔn alie wo ábhwe khúnbrɛn lókɔn.

²⁰ Mímí, achan lóka Yankan tɛ áthéji, mɛ́n lephan yábhɛ ńni khɛ́n óle wui, mɛ́n sɛ́npɛ́ atre lóne godo, le mɛ́n Yankan ńni, lókhúnbrɛn lókɔn áli áyíbɛn ógɛ wú mɛbhí mɛn, Yankan mɔ́n yí atɛ hromɛn. Lóhɛ́nthé, néphan lókɔn wo le pɛ wo bhwe yɔ́phɔ́.

²¹ Wo yɛn Yankan, lókhɛ́n wo lé dɛn bhó nguhá se, wo lé dɛn lá Yankan nansi, sa lósi ayɔn sa okhɔ́ tɛ́ yí se. Wo li néphan hɛ́nphe phu wo hɛ́nthé, ló wo bhweyɛ́n jrɛn dubhlékhu.

²² Wo nkɛé wo yɛn bhwe, lókhɛ́n wo hɛ́nphe lɔ:

²³ átɛsalé Yankan lókɔn abha nguhá hrómɛn, khɛ́n ali lephan ále khú wo bhá la, ló-ɛ wo yɔ ka, lókhɛ́n wo éla ńyá khúnkhu wo kwa akhɔ lephanmi, ali ńkɔ́cran, ńbranmán ale nta bhwelí, le ńbranmán khúnbrɛn ebhó lábhɛ mɛn nɛnsi.

²⁴ Lóhɛ́nthé Yankan yɔ wo khwalé áyíléletɛ́ hrómɛn sa wo thɛ́n si akhɔ pɔ, ló ńsɛ égɛ wo jɔn nsɛ ɔ́nmɔn lá. Áyí yábhɛ lókɔn wo etɛ́, áli hɛ́ndɛ yí.

²⁵ Wo hɔn Yankan bhwe mímí jrɛn nkpakprá, wo éla áyí Yankan bho mɔ́n tɛ, wo elí júmán sé áyí Yankan tɛ, lókhɛ́n wo yɔ Yankan-ɛ ka. Yankan lókɔn, mɛ́n nɔn ayɔn sa obhó áhwalri se olí godo! Amɛn.

²⁶ Áyí yábhɛ lókɔn wo etɛ́ hɛ́nthé, Yankan yɔ wo khwalé hɛ́ndɛ yítɛ́ hrómɛn, ló wo mie lɔ égɛ wo jɔn mie ɔ́nmɔn lá.

²⁷ Lóyábhɛ brɛ, ńsɛ lɔ eyɔ́ mie ká lo gɛ wo jɔn nsɛ ɔ́nmɔn lá. Ńsɛ saya égɛ wo jɔn nsɛ ɔ́nmɔn lí gbakhre. Áyí yábhɛ lókɔn áli hɛ́ndɛ yí, lókhɛ́n ábhwe abha lóhrómɛn nɔn ali salé, wo yíléle lókɔn wo etɛ́, wo gɛ lóphɔ pɛnsɔ́n.

²⁸ Néphan lókɔn wo le dɛn yɛn Yankan, lóhɛ́nthé Yankan yɔ wo khwalé ábhweyɛ́n phromɛn hromɛn, ochɛ́sé wo tɛ́ yí aleyɔn se wo sa wo tɛ́.

²⁹ Abhúrɛ yítɛ́ yábhɛ yábhɛ khúnbrɛn simɛ́n wo hromɛn: wo lí gɔngɔnsá, wo tɛ́ yí phromɛn phromɛn, wó gɛmɛhɛ́n, wó pɛ bhúrɛ, néphan yí nɔ́n wo mɛ, wo wɛ́n néphan, wó nɛn bhwe, wó khrɛ néphan, wó lrɛ néphan bhwe.

³⁰ Wo tɔ bhwe phromɛn phromɛn sé néphan, wo sa Yankan mɛ, wo lé ji lephan, wo fúmɛ́n, wo lí nkhó, ákakhúnbrɛn áyíléletɛ́ mwanhɛ́n nɔn wo ébhu, ló wo lé ji wo néphan.

³¹ Wo bha áyíléletɛ́ hrómɛn ákakhúnbrɛn, wo lé ya wo bhwetɔ́ tho, wo lé pɛ thɛ́nbhwá sé néphan, wo lí hɛ́nmɛnle, lephan phɔ le tɛ́ wo nfɛkhu.

³² Lókhɛ́n wo yɛn Yankan kwabhɔ́: lónɔn ali salé néphan khɛ́n etɛ́ yí yábhɛ lókɔn, lópɛnsɔ́n wo bhá gɛ nɔn ali ákhú. Lótɛ khɛ́n wo bha wo yíléletɛ́ hrómɛn ntɔ́nyán, ló saji kasé néphan nankhɛ etɛ́ yíléle, wó gɛ nkɔn thá.