MATHIE 1 - Ebrié New Testament 1996

Jezwi mɛ́n jisɛmánhɔn

¹ Nɛn Jezwi-Krisi mɛ́n jisɛmánhɔn hɛ́n ali o. Jezwi-Krisi nbrɛn li Davi jibhi, sa lósi Davi nbrɛn khɔ li Ábrahámɛn jibhi a.

² Ábrahámɛn ho Izakhi, Izakhi ho Jakɔ́phu, Jakɔ́phu ho Juda le mɛ́n hɔnsɛ́nhɔn ɔ́nmɔn.

³ Juda ho Farɛsi le Zara ɔ́nmɔn khɛ́n (wo man hɛ́n li Tama); Farɛsi ho Ɛsirɔn; Ɛsirɔn ho Arami;

⁴ Arami ho Aminadabe, Aminadabe ho Naasɔn, Naasɔn ho Salomɔn;

⁵ Salomɔn ho Boazi (khɛ́n mɛ́n man hɛ́n li Rahabe); Boazi ho Obɛde (khɛ́n mɛ́n man hɛ́n li Ruthi); Obɛde ho Jese;

⁶ Jese ho bhringbi Davi. Davi ho Salomɔn (khɛ́n mɛ́n man phrɛ phɛn Uri);

⁷ Salomɔn ho Robwamɛn, Robwamɛn ho Abia, Abia ho Asafu;

⁸ Asafu ho Jozafa, Jozafa ho Joramɛn, Joramɛn ho Oziasi;

⁹ Oziasi ho Joatamɛn, Joatamɛn ho Akazi; Akazi ho Ezekiasi;

¹⁰ Ezekiasi ho Manase, Manase ho Amɔn, Amɔn ho Joziasi;

¹¹ Joziasi ka aho Yekhonia le mɛ́n hɔnsɛ́nhɔn ɔ́nmɔn ɔn, lóka lókɔn nɔn wo khwɛn Izraɛ khúbhɛ́nɛ́n lo Babilɔ́nɛn sa gangánmán.

¹² Lóka wo khwɛn Izraɛ khúbhɛ́nɛ́n lo Babilɔ́nɛn nɔn Yekhonia ho Salathiɛ, Salathiɛ ho Zorobabɛ;

¹³ Zorobabɛ ho Abiyude, Abiyude ho Eliakhimɛn, Eliakhimɛn ho Azɔ;

¹⁴ Azɔ ho Sadɔkhi, Sadɔkhi ho Akhimɛn, Akhimɛn ho Elihude;

¹⁵ Elihude ho Eleaza, Eleaza ho Mathan, Mathan ho Jakɔ́phu,

¹⁶ Jakɔ́phu ho Jozɛfu aphɛn Mari, ló Mari nɔn aho Jezwi óche Mesi.

¹⁷ Achan Ábrahámɛn cí tho alo di Davi cí tho, ogɛ áhóthóbhɛ́ áwɔ́-bhwelí. Achan Davi cí tho alo di lóka wo khwɛn Izraɛ khúbhɛ́nɛ́n lo Babilɔ́nɛn, ogɛ áhóthóbhɛ́ áwɔ́-bhwelí. Achan lócí tho lókɔn alo di lóka wo ho Mesi, lólɔ ogɛ áhóthóbhɛ́ áwɔ́-bhwelí.

Lóka wo ho Jezwi-Krisi

¹⁸ Nɛn lósi okhɔ ho Jezwi o. Jozɛfu dɔn mɛ́n man Mari mɛ́n. Lóka lókɔn ɔn, wo ka phɛn bha bháthó lɔ khɛ́n Mari ethí lábhɛ Nánnánmi Créncré sɛ́npɛ́ hrómɛn.

¹⁹ Jozɛfu adɔn Mari mɛ́n, lónian mɛn khɛ́n ńni lephan bhwá, khɛ́n ńnɛn pɔ sa ánnre nkɛ hɛ́n, lóhɛ́nthé ánnɛn ankhɔ́ mɛ́nan mɛn yɔ́ nkɛ ká.

²⁰ Lóhɛ́nphe tɛɛ antɛ́, lónɔn Hwánthe-mranchɛ́wo bɛn khɔ nájú mɛn kranman nkɛ sa: – Jozɛfu Davi jibhi, ɛle sókhú, tɛmɛ ɛdo hɛ bhia Mari ka phɔ, lée Nánnánmi Créncré sɛ́npɛ́ hrómɛn nɔn ńkhɔ anthí lábhɛ.

²¹ Ánman hó sɛbhri bɛn, ló mɛ́n hɛ́n ɛ́bha se nɔn ali Jezwi, átɛsalé mɛ́n nɔn ánman swa mɛ́n féchwe yɛn ńne hrómɛn.

²² Lóyí khúnbrɛn lókɔn tɛ, ochɛ́sé Hwánthe bhwe khɛ́n akhɔ bhwetɔ́tréwo phɔ tɔ ɔn, lóyí otɛ́ símɛ́n salé:

²³ “Bhiebhri aka yɛn sɛ bha thí lábhɛ, ló ánman hó sɛbhri bɛn óbha che Emanwɛ.” (Mɛ́n hɛ́n lókɔn, lóthé nɔn ali “Yankan bha lo phɔ.”)

²⁴ Lóka Jozɛfu chan ná mɛn fe, ábhwe khɛ́n Hwánthe-mranchɛ́wo tɔ se ɔn, ńtɛ lóyí, ló ńdo Mari ka phɔ sa mɛ́n bhia.

²⁵ Khɛ́n mɛ́n le nkɛ ɔ́nmɔn wo le gbali bhrɔ́ɔ́, kábrɛ kábrɛ Mari ho mɛ́n bhi, ló Jozɛfu se nkɛ hɛ́n Jezwi.