MÁKHI 1 - Ebrié New Testament 1996

Yankan bhwe Jan-Nduhɛ́nháwo étɔ

¹ Krɛn nɔn Ábhwe Bhwábhwá khɛ́n étɔ Jezwi-Krisi ali Yankan Mi phɔ bhwe bhɔhɛ́n.

² Bhwetɔ́tréwo Ezayi hrɔ́ hrómɛn wo tɔ sa: “Yankan étɔlé wu a, mɛn mán chɛ́ mɛn mranchɛ́wo bhá hɛ hɛ́nmɛn, sa anphwan sitó ká hɛ lé.

³ Lephan bɛn bha ánánkhuthé elúkhwɛ́ tɔ sa: Ɔ́n cɔ Hwánthe sitó tɛ́ ló ɔ́n tɛ́ mɛ́n sitó yali!”

⁴ Ló Jan thandi ánánkhuthé, ánkranmán néphan lée: – Ɔ́n jrɛn hɔ́n yítɛ́, ɔ́n chɛ́ ohá hɔ́n nduhɛ́n, ló Yankan bha yɔ́ hɔ́n ne phɔ́ hɔ́n.

⁵ Ló Jude gothonɛ́n le Jeruzalɛ́mɛn khúbhɛ́nɛ́n ɔ́nmɔn ebhá mɛ́n yé, wo élu wo ne ápasá hɛ́nmɛn, ló Jan ehá wo nduhɛ́n Judɛn ndubhɛ hromɛn.

⁶ Jan sɔ ntráliɛ́ obho frímú khókho-ngbɔwo yɔnmrɛ than, ló ńmɔn ńnánhrɔ́ kpakpa thé. Ántha ńgɔgɔmán, ló anní ábithe hoyá nɔ́n.

⁷ Ánkranmán ápasá khúnbrɛn gbée salé: – Lephan khɛ́n abha mɛn mánji ebhá, ńpɛ sɛ́npɛ́ brɛn mɛn, mɛn nɛn ni lephan apriman khɛ́n ágɛ súlé hrwɛn mɛ́n ngbawa bhɛ́ nwɛ́ lɔ.

⁸ Mɛn ɔn, ńdu nɔn mɛn mo mɛn há hɔ́n hɛ́n, khɛ́n mɛ́n-ɛ, Nánnánmi Créncré nɔn ánman mó há hɔ́n hɛ́n.

Wo ha Jezwi nduhɛ́n, wo sui wu

⁹ Lóka hromɛn nɔn Jezwi chan Nazarɛ́thi khúbhɛ́ abha Galile gotho bha, ló Jan hɛ nduhɛ́n, Judɛn ndubhɛ hromɛn.

¹⁰ Lóka Jezwi chan ńdu hrómɛn ethándi, ńwu átho éphwan, ló Nánnánmi Créncré chantho ebhá mɛ́n tho sa bhwebhwe a.

¹¹ Ńye átɔ́ bɛn chantho dɛn ebhá, ló étɔ sa: – Hɛ nɔn ɛli mɛn Mi khɛ́n mɛn pɔ, ló hɛ tho nɔn mɛn mo mɛn phɔhá khúnbrɛn tre.

¹² Lóyámɛ́n, Nánnánmi Créncré chɛ nkɛ lo ánánkhuthé.

¹³ Ńtɛ ńcíbhí grebhɛ ánánkhuthé, lóne nɔn Abhɔsɛ́mɔ́n sui wu. Ńma ábithe nbranmán thethé, ló Yankan-mranchɛ́mán ékhwɛn nkɛ hɛ́nmɛn nɛn.

Jezwi che dukúmán bhwelí

¹⁴ Wo ka Jan khúthé, lómánji Jezwi lo Galile gotho étɔ Ábhwe Bhwábhwá achan Yankan yé.

¹⁵ – Ló ántɔlé, ácí wo ha tre ɔn, ási, ló Yankan Bhringbi khúbhɛ́ lɔ gbali phɔ. Ɔ́n jrɛn hɔ́n yítɛ́, ló ɔ́n mú Ábhwe Bhwábhwá mímí!

¹⁶ Lóka Jezwi khɔ Galile duphé jɛ́ njɛ nɛ́nsi élo, lótɛ ńwu dukúmán mɔn, Simɔn le mɛ́n hɔnsɛ́n Andre, ekú sawá duphé hrómɛn.

¹⁷ Ló Jezwi kranman nkɔn sa: – Ɔ́n ma gɛ mɛn thá, ló mɛn chɛ́ hɔ́n kú néphan du.

¹⁸ Lóyámɛ́n, wo yɔ wo sawá khwa, ló wo gɛ nkɛ ɔ́nmɔn lo.

¹⁹ Jezwi lo hɛ́nmɛn, ló ńwu Zebede miɔn, Jakhi le mɛ́n hɔnsɛ́n Jan. Wo bha hran mɛn wo égrɛ wo sawá.

²⁰ Lóyámɛ́n, Jezwi che wo, wo yɔ wo the Zebede le júmánmán ɔ́nmɔn khwa hran mɛn, ló wo gɛ nkɛ thá.

Lephan khɛ́n nánnánmi phromɛn bha phɔ

²¹ Jezwi le mɛ́n yíchwɛmán ɔ́nmɔn lo Kapɛnaúmɛn khúbhɛ́. Saba cí, ńno hɛ́nbhúrɛ si ánnie yí.

²² Mɛ́n yí ánnie lóbhwe etán néphan hɛ́nmɛn kábrɛ. Ánnie yí mɛ́n sɛ́npɛ́ ńgɛ mɛn, ló ále khɔ́ bidíyɛ́nmán ékɛ yábhɛ si akhɔ élie.

²³ Lóka yábhɛ nɔn sɛ bɛn ka hɛ́nbhúrɛ si. Sɛ lókɔn nánnánmi phromɛn bha mɛ́n phɔ, ló ńnukhwɛ́ sa:

²⁴ – Jezwi Nazarɛ́thi sɛ, ébí bhwe bha lo le hɛ ɔ́nmɔn thethé ɛ? Wú bhá ɛbha ɛchɛ́ lo liá? Mɛn yɛn hɛ lephan yábhɛ ɛli. Hɛ, ɛli Créncré Yankan chɛ bha!

²⁵ Jezwi khan nkɛ lé, ló ńtɔ sa: – Tɛmɛ ɛtémélé, ló ɛchán lephan lókɔn phɔ thándi!

²⁶ Nánnánmi phromɛn hɔn lephan lókɔn jika kranmɛn, ńnukhwɛ́, ló ńchan nkɛ phɔ thandi.

²⁷ Lóbhwe etán néphan khúnbrɛn hɛ́nmɛn kpɛ́ɛ́n, áchɛ́se wo ya wo hromɛn wo ébhi wo bɛn nbrɛn sa: – Ébí li lókɔn? Ébí pɔ́pɔ́ li lókɔn wo élie sɛ́npɛ́ mɛn yábhɛ nɛn ɛ? Lephan lókɔn tɔ bhwe sɛ́npɛ́ mɛn sé nánnánmi phromɛn phromɛnhɔn, ló wo lɔ wo jí nkɛ!

²⁸ Áchɛ́se Jezwi lehɛ́n wáwa pi Galile gotho khúnbrɛn.

Jezwi tɛ lɔ́phɔmán búdúbúdú phɔ jan

²⁹ Lómánji wo chan hɛ́nbhúrɛ si thandi, ló wo le Jakhi le Jan ɔ́nmɔn wo yalisi lo Simɔn le Andre ɔ́nmɔn hwan.

³⁰ Ágbalɔ́ hɛn Simɔn ngrobhie phɔ, ló ńnalé. Lóka Jezwi di lóne, lópán wo tɔ lóbhwe se.

³¹ Ńtigbali nkɛ, ńhɔn nkɛ mɔ́n, ló ńti nkɛ chanfe, lótɛ ágbalɔ́ chan mɛ́n phɔ féne, ló ánkhwɛn nkɔn hɛ́nmɛn nɛn.

³² Ácí ka égu, khɛ́n ácɛ́nmɛ esɔ́ha, lótɛ néphan khwɛn lɔ́phɔmán khúnbrɛn, le wo khɛ́n nánnánmi phromɛn phromɛn bha wo phɔ bha Jezwi yé.

³³ Ákhúbhɛ́nɛ́n khúnbrɛn gba bhurɛhɛ́n khúmɛ́n.

³⁴ Néphan tɛɛ álɔ́ yábhɛ yábhɛ ehɔ́n, Jezwi tɛ wo khúnbrɛn phɔ jan, ló ńtránman nánnánmi phromɛn phromɛn búdúbúdú lɔ, khɛ́n ńnɛn se brɛ mɔ́nsi otɔ bhwe, lósi akhɔ tɛ ɔn, wo yɛn mɛ́n lephan yábhɛ ńni hɛ́nthé.

Jezwi éjekhali Galile gotho

³⁵ Ácí ka aci, ńjuju fítaan, lóka áyé ka lɛ mwámwá, Jezwi chan bháthó thándi lo ásibɛn ajanbu ká njɛ éla Yankan.

³⁶ Simɔn le mɛ́n jɔn ɔ́nmɔn lo énɛn nkɛ:

³⁷ wo gɛ nkɛ, ló wo kranman nkɛ sa: – Néphan khúnbrɛn énɛn hɛ.

³⁸ Khɛ́n Jezwi kranman nkɔn sa: – Oló si nankhɛ, ákhúbhɛ́hɔn agbali lo jɛ́ njɛ hrómɛn, ló mɛn tɔ Yankan bhwe lóne lɔ. Átɛsalé lóhɛ́nthé nɔn mɛn ma.

³⁹ Ló ńno Galile gotho si khúnbrɛn. Ńtɔ Yankan bhwe hɛ́nbhúrɛ si abha lóne gotho, ló ńtránman nánnánmi phromɛn phromɛnhɔn.

Jezwi tɛ khokhóbhé-phɔ́wo bɛn phɔ jan

⁴⁰ Khokhóbhé-phɔ́wo bɛn bha Jezwi yé, ńmɔ ntráhɛ́nlé nkɛ hɛ́nmɛn ánna nkɛ sa nkɛ dɔnmɛn mɔ́n, ló ántɔ sa: – Kasé ɛpɔ, ɛgɛ tɛ́ mɛn phɔ chán.

⁴¹ Mɛ́n bhwe ka Jezwi phɔ kpɛ́ɛ́n, Jezwi tia mɔ́n, ńpa nkɛ pɛ, ló ńkránman nkɛ sa: – Mɛn pɔ, tɛmɛ hɛ phɔ ochán!

⁴² Lóyámɛ́n, khokhóbhé ya mɛ́n phɔ lia, ló mɛ́n phɔ chan.

⁴³ Lóka Jezwi ha nkɛ mɛ́n khrákhrá mɛn phu, lótɛ ńthu nkɛ hɛ́n ka.

⁴⁴ – Khɛ́n Jezwi kranman nkɛ sa: Ɛyé, ɛlé tɔ lóbhwe sé lephan brɛ oyé bhrɔ́ɔ́, khɛ́n tɛmɛ ɛhɔ́n hɛ nbrɛn lo lie nphaháwo owú hɛ phɔ si akhɔ chan. Lómánji, ɛha ńpha khɛ́n Moyízi tɔ lóbhwe, ochɛ́sé néphan khúnbrɛn oyɛ́n salé hɛ phɔ jan.

⁴⁵ Khɛ́n lephan lókɔn lo, ló áyí atɛ, ńtɔ lóphɔ bhwe pi si khúnbrɛn. Lóhɛ́nthé Jezwi le wúsi khɔ́ bhó mɛ́n phɔ thándi ákhúbhɛ́ brɛ hromɛn npɔhɔ́n, anmá ási ajanbu ká njɛ, lótɛ khɛ́n néphan chán si nankhɛ jɛ́ njɛ khúnbrɛn bha gɛ.